James Brooks (margolaria)

James Brooks (margolaria)
	;
Bizitza
Jaiotza	Saint Louis, 1906ko urriaren 18a
Herrialdea	Ameriketako Estatu Batuak
Heriotza	East Hampton (New York), 1992ko martxoaren 9a (85 urte)
Hobiratze lekua	New York
Hezkuntza
Heziketa	Art Students League of New York (en) ; Southern Methodist University (en)
Jarduerak
Jarduerak	margolaria, grabatzailea eta irakaslea
	Parte-hartzailea 9th Street Art Exhibition (en) ; Documenta II (en) ;
Enplegatzailea(k)	Columbia Unibertsitatea ; Pratt Institute (en) ; Queens College (en) ; Pennsylvaniako Unibertsitatea ; Federal Art Project (en) (1936 - 1942)
Jasotako sariak	ikusi John Simon Guggenheim Memorial Foundation beka ;
Kidetza	American Abstract Artists (en) ; Ameriketako Estatu Batuetako Arte eta Letren Akademia
Mugimendua	Espresionismo abstraktua

James Brooks (St Louis, Missouri, AEB, 1906ko urriaren 18a - Brookhaven, New York, AEB, 1992ko martxoaren 9a) estatubatuar margolaria izan zen.

Biografia

Aita saltzailea zuen, eta Jamesen gaztaroan, familia hara-hona ibili zen aitaren bidaiak zirela eta; horrela, Oklahoma, Colorado eta Texasen bizi izan zen, 1911tik 1922ra bitartean. Hegoaldeko Unibertsitate Metodistan egin zituen arteko ikasketak, eta Dallasko Arte Institutuan ikasi zuen, harik eta 1926an New Yorkera aldatu zen arte. Han, gauez osatu zituen bere ikasketak, Arteko Ikasleen Elkartean eta bere estudioan. Garai hartako obretan gai sozialak agertu zituen, eta kezka berezia erakutsi zuen 30eko hamarraldiko Ameriketako arkitekturaren gainbeherarekin eta dekadentziarekin.

Lehenengo lanekin hasi zen ospea irabazten; WPAren Arte Egitasmo Federalean lanean jardun zuen, sei urtetan egindako muralekin; aipagarriak ditu New Jerseyko posta-bulegorako murala, Long Islandeko liburutegi batekoa eta New Yorkeko Nazioarteko Itsas Portuaren eraikinerako bi urte eta erdiko proiektu bat. Gudarostean denboraldi bat igaro ondoren, New Yorkera itzuli zen, eta abangoardiako pintoreak ezagutu zituen han.

Picassoren eta Georges Braqueren kubismoaren eraginpean lan egin zuen, eta haien eraginez hasi zen "berriro pintatzen nola ikasi" asmatzen. Errealismoaren bidea utzi, eta abstrakzioan murgilduz joan zen pixkanaka. 1949an egin zuen bakarkako lehen erakusketa, eta hurrengo urteetan zehar, bere arteak espresionismo abstraktuaren anbiguotasun aberatsaren maisutasuna iritsi zuen.

Brooks sarritan izan da subkontzientearen olerkaritzat hartua, eta eragin handia izan du espresionismo abstraktuaren bilakaeran; bere karreran zehar, adierazkortasun handiko lanak egin zituen eta bere bilakaeran aldaketarako eta egokitzapenerako trebetasun aparta erakutsi zuen, bere artearen definizio berriak etengabe emanez.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Datuak: Q472785

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.