Ivan Lendl

Ivan Lendl (Ostrava, Txekoslovakia, 1960) tenislari profesional ohia da. Jaiotzez txekiarra, 1992an estatubatuar herritartasuna hartu zuen.

Ivan Lendl
Irudi gehiago
Bizitza
Jaiotza	Ostrava, 1960ko martxoaren 7a (64 urte)
Herrialdea	Txekoslovakia  (1960 -  1992)  Ameriketako Estatu Batuak  (1992 -
Bizilekua	Goshen (Connecticut)
Familia
Aita	Jiří Lendl
Hezkuntza
Hizkuntzak	txekiera ingelesa
Jarduerak
Jarduerak	tenislaria, tenis entrenatzailea, arte bildumagilea eta golf-jokalaria
Tenis
Jokaera	eskuina
Bakarka i/g	1068–242
Binaka i/g	186–139
Rankinga	1 tennis singles (en) (1983ko otsailaren 28a) 20 tennis doubles (en) (1986ko maiatzaren 12a)
Lateralitatea	eskuina
Pisua	79 kilogramo
Altuera	188 zentimetro
Jasotako sariak	ikusi International Tennis Hall of Fame

1975ean hasi zen gazte-mailako nazioarteko txapelketa nagusietan jokatzen, eta haren mailako tenislari onena bilakatu zen 1978an. 1979an, profesionaletara igaro, eta, 1980an, zazpi txapelketa irabazi zituen.

Garaipen ugari erdietsi arren —izen handiko Volvo saria 1982an eta 1983an—, ez zuen Grand Slameko lehiaketarik irabazi, 1984ko Roland Garrosen John McEnroe mendean hartu zuen arte. 1985ean, Estatu Batuetako Irekia irabazi zuen, berriro ere McEnroe mendean hartuz, eta, hurrengo bi urteetan, Estatu Batuetako nahiz Frantziako lehiaketak irabazi zituen.

Munduko tenislari onena izan zen 1985-90 bitarteko hainbat alditan, eta Australiako Irekia ere bi aldiz irabazi zuen, 1989an eta 1990ean. Indar eta gaitasun fisikoagatik da ezaguna, edozein motatako pistetan moldatzen delako, belar gainean izan ezik; horrek eragotzi zion, hain zuzen, Wimbledongo Lehiaketa irabaztea. Jokalari garrantzitsua izan zen, halaber, 1980an Txekoslovakiak Davis Kopan lortutako lehen garaipenean. 1992an lortu zuen Estatu Batuetako hiritartasuna, eta 1994an utzi zion tenisean jokatzeari, sorbaldan zuen arazo batengatik.

2012aren hasieraz geroztik, Andy Murrayren entrenatzailea da.