Iñigo Jaca

Iñigo Jaca Arrizabalaga (Zumarraga, 1948ko ekainaren 13a) mediku euskalduna da. Bruselako Unibertsitate Askean ikasi eta medikuntzako titulua lortu zuen (1977an), bere ibilbide profesionala Belgikan hasiz. Bertan, flandriar eta frankofonoen arteko gatazka linguistikoen lekuko zuzena izan zen, eta horrek eragina izan zuen bere euskararen aldeko jarreretan.[1]

Iñigo Jaca
Bizitza
Jaiotza	Zumarraga, 1948ko ekainaren 13a (75 urte)
Herrialdea	Gipuzkoa, Euskal Herria
Hezkuntza
Heziketa	Bruselako Unibertsitate Askea
Hizkuntzak	euskara gaztelania frantsesa
Jarduerak
Jarduerak	medikua

Zuzenbidean lizentziaduna ere bada, EHUn.

Donostiako Arantzazu Erresidentzia Sanitarioko zuzendaria izan zen (1983-1986). Gero, Arantzazu Ospitaleko gerentea (1986-1988), Gurutzetako Ospitaleko Zuzendari gerentea (1988-1991) eta Donostiako Institutu Onkologikoko zuzendari nagusia (1991-2009).[2]

1990ean senidetze bat egin zen Gurutzetako Ospitalaren eta Tbilisiko Burdinbideetako Langileen Ospitalaren artean (Georgia, orduan SESB). Goma-n (Zairen) proiektu bat idatzi zuen 1995ean : “Le Project d´Appui au fonctionnement des activités de la Zone de Santé de Rwanguba dans le contexte du Programme d´appui transitoire au secteur de santé financé par l´Union Européenne” (“Rwanguba Osasun Eremuko jardueren funtzionamendurako laguntza proiektua, Europar Batasunak finantzatuta duen aldi baterako osasun arloko laguntza egitarauaren barruan”). Proiektu horrek 100 miloi pezetako laguntza jaso zuen.

Euskararen erabilera osasun-arloan sustatzeko hainbat ekimenetan parte hartu du. Besteak beste, euskara ikastaroak antolatu zituen Arantzazu Erresidentzia Sanitarioko zuzendaria zenean, eta OEE erakundearen sorreran parte aktiboa izan zuen.

Arlo politikoan, gaztetan diktadura frankistaren aurkako borrokan aritu zen, ETAko Fronte Politikoan, erbesteko bidea hartuz 1972an.

Urte luzeetan hainbat artikulu eta kolaborazioak idatzi ditu, euskaraz zein gaztelaniaz, Euskal Herriko hainbat komunikabidetan.[3][4]