Hamlet Gonashvili
Hamlet Dimitri Gonashvili ( 1928ko ekainaren 20a, Anaga - 1985eko uztailaren 25a, ibid.) - georgiar abeslaria eta irakaslea izan zen. Tenor errejistrokoa, Ekialdeko Europan oso ezaguna bihurtu zen "Georgiako ahotsa" ezizenarekin. Azken urteetan Kaukasia inguruan musika herrikoiak izan duen gorakadaren pizgarri nagusietako bat izan zen.
| Hamlet Gonashvili | |
|---|---|
| Bizitza | |
| Jaiotza | Anaga (en)  , 1928ko ekainaren 20a |
| Herrialdea |  Georgia |
| Heriotza | Anaga (en) , 1985eko uztailaren 25a (57 urte) |
| Hobiratze lekua | Didube Pantheon (en) |
| Jarduerak | |
| Jarduerak | abeslaria |
| Musika instrumentua | ahotsa |
.svg.png.webp){kind=logo}   | |
Datu biografikoak
Hamlet Gonashvili Anaga herrian jaio zen. Institutuan zenbait kantaldi publiko egin zituen, eta antzerkian aritu zen; Mikheil Kveselava errektoreak kantugintzara bideratu zuen. Biologia ikasi zuen. Tbilisiko Turismo Bulegoan lan egin zuen, berarentzat atsegina zen ogibidean. 1985 urtean ezbeharrez hil zen: sorterrira ama bisitatzera joanda, sagar-uzta lanetan ari zela zuhaitzetik erorita. Saburtalo hilerrian ehortzi zuten.
Kantugintza
1953tik aurrera Georgiako Estatuko Kantu eta Dantza Taldean aritu zen (1969an taldeak "Rustavi" izena hartu zuen); 25 urtez Gonashvili talde horretako bakarlaria izan zen. Bertako errepertorioa Kartli, Kakheti, Megrelia eta Abkhazia eskualdeetako abestiek, Imeretiko eta Guriako himnoek eta Georgiako konpositoreen lanek osatu zuten, arrakasta handia erdietsiz.
Hamleten abesteko eran tinbre leuna, errendimendu teknika birtuosoa, gustu fina, arintasuna eta soinuaren argitasuna nabarmendu ziren. Gainera taula gainean prestutasun handia zuen, eta kantatzerakoan oldarkortasuna ere lor zezakeen. "Rustavi" konpainiarekin ia mundu osora bidaiatu zuen eta entzun zutenen gainean -musikari profesionalak barne- inpresio handia eragin zuen. Melodia artikulatzeko gaitasunari esker, Gonashvilik Georgiako folklorea eta musika klasikoa modu trebean uztartu zituen; Iakob Bobokhidze musikariak, adibidez, bere konposizio batzuk berak abesteko moldatu zituen.
Ekialdeko Europatik kanpo ez da oso ezaguna; baina hark interpretatutako abestiak zenbait filmetan eta ikuskizun jendetsuetan erabili izan dira, gertaera mistiko ikusgarriak irudikatzeko. [1]
Ohoreak
1980 urtean Georgiako "Herriaren Artista" izendapena jaso zuen.
2001ean Idazleen eta Irudi Publikoen Didube Panteoira eraman zuten.
