HMS Royal Oak (08)

HMS Royal Oak Britainia Handiko Royal Navyren Revenge-klaseko korazatua izan zen. 1914an uretaratu eta 1916an osatu zuten[1], eta Jutlandiako guduan erabili zen lehen aldiz. Bake-garaian, Atlantikoan eta Mediterraneoko eta Britainia Handiko jurisdikziopeko uretako flotetan izan zen, eta behin baino gehiagotan jasan zituen erasoak. Itsasontziak mundu mailako arreta erakarri zuen, 1928an goi-mailako ofizialak epaitu zituztenean, oso prozesu polemikoan. Bere ibilbideko hogeita bost urteetan Royal Oak modernizatzeko saioek ezin izan zuten abiadura falta konpondu, eta Bigarren Mundu Gerraren hasieran ez zegoen, jada, lehen borroka-lerroan.

HMS Royal Oak (08)
Irudi gehiago
Fabrikazioa
Fabrikatzailea	HMNB Devonport (en)
Jatorrizko herrialdea	Britainia Handia eta Irlandako Erresuma Batua
Historia
Naufragioa
Gila jartzea	1914ko urtarrilaren 15a
Uretaratzea	1914ko azaroaren 17a
Esleipena	1916ko maiatzaren 1a
Kudeatzailea	Royal Navy
Gatazka	Bigarren Mundu Gerra eta Lehen Mundu Gerra
Kokapena
Koordenatuak	58°55′51″N 2°59′00″W
Estatu burujabe	Erresuma Batua
Herrialdea	Eskozia
Uhartedi	Orkadak
Ezaugarriak
Dimentsioak	8,7 () × 27 () × 189,1 () m
Erruna	27 m
Zingoa	8,7 m
Abiadura	22 kn
Autonomia	7.000 nmi (10 kn)
Armamentua	BL 15 inch Mk I naval gun (en) (8) BL 6 inch Mk XII gun (en) (12) Kanoi (8) Kanoi (16)

1939ko urriaren 14ko gauean, korazatua Scapa Flowen ainguratuta zegoen, Orkadetako ainguraleku batean, Eskoziako iparraldean, U-47 itsaspeko alemaniarrak torpedoz eraso eta hondoratu zuenean. 1.234 tripulatzaileetatik 833 hil zen gau horretan edo zaurien ondorioz, horietatik asko adin-txikikoak. Korazatu zaharra galtzeak —Bigarren Mundu Gerran hondoratutako Britainia Handiko Itsas Armadako bost korazatu eta borroka-gurutzaontzietako lehena— ez zuen ia eraginik izan Ingalaterrako itsas armadaren eta haren aliatuen nagusitasunean, baina eragin nabarmena izan zuen gerra-garaiko moralean.[2] Erasoaren ondorioz, Alemaniako gerra-heroi ospetsu bihurtu zen U-booteko komandantea, Günther Prien korbeta-kapitaina, Kriegsmarineko itsaspeko lehen ofiziala Burdinazko Gurutzearen Zaldunen Gurutzea irabazi zuena. Britainiarrentzat, Royal Oaken aurkako erasoak erakutsi zuen alemanak gai zirela ontzigintzako gerra beren uretara eramateko, eta eragindako inpresioaren ondorioz berehala indartu zen portuetako segurtasuna.

Gaur egun, hogeita hamar metroko sakoneran dago korazatua, ia buelta emanda, eta kroskoa azaletik bost metrora baino ez du. Royal Oaken hondarrak gerra-hilerri deklaratuta daude, eta, galera gogoratzeko urteroko zeremonia batean, Royal Navyko urpekariek beren bandera ofiziala, Pabiloi Zuria edo San Jurgiren bandera jartzen dute ontziaren urpeko poparen gainean. Itsasontziaren hondarren artean urpekaritza egitea guztiz debekatuta dago baimen berezirik izan ezean.