Gabriel Ramos

Gabriel Ramos
Bizitza
Jaiotza	Bilbo, 1939
Herrialdea	Bizkaia, Euskal Herria
Heriotza	Bilbo, 1995eko abuztuaren 9a (55/56 urte)
Hezkuntza
Hizkuntzak	gaztelania
Jarduerak
Jarduerak	margolaria eta Irarlea

Gabriel Ramos Uranga (Bilbo, 1939 - ib., 1995eko abuztuaren 9a) bizkaitar pintore eta grabatzailea izan zen.

Arkitektura ikasketak Bartzelonan egin ondoren, Madrilgo San Fernando Arte Ederretako Eskolan ikasi zuen, 1965etik aurrera. Urtebete lehenago, egina zuen bere lehenengo bakarkako erakusketa, Bilbon. Grabatu ikasketak egin zituen Cuencan, eta 1972an Armintzan jarri zuen bere aurreneko grabatu-lantegia. 1986an, Marrazarri lantegi litografikoa ireki zuen, eta lan garrantzitsua egin zuen bertan, grabatuaren alorrean. 1985ean, grabatu-saileko Gure Artea saria eskuratu zuen, eta hurrengo urtean pinturari zegokiona. Urte berean eskuratu zuen, halaber, Bizkaiko Artea Grabatu eta Pintura Saria. 1980tik aurrera, kolorezko akuafortearekin hasi zen lanean, eta erakusketa ugari egin zituen hamarkada horretan, Bilboko eta Arabako Arte Ederretako Museoetan, Frankfurten HOSTOA euskal artisten kolektiboaren barruan, Baden-Badenen, Sevillan, Aachenen, Bilboko hainbat aretotan... Beiragintzan ere hasi zen, eta hark eginak dira, esaterako, Urkiolako San Antonio baselizako beirateak (1989) eta Lekeitioko Osakidetzaren eraikinekoak (1992). Bere muralak Zalla eta Lekeitioko udaletxeetan aurki daitezke. 1994an, Kalkografia Sari Nazionala eskuratu zuen, grabatzaile gisa egindako lanagatik.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Datuak: Q12258083

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.