Erdarakada

Erdarakada euskaraz mintzatzean beste hizkuntza bateko esaldiak hitzez hitz itzultzean egiten den akatsa da, hots, euskarazko barbarismoa. Erdaraz jakin gabe ezin uler daitezkeen esaldiak dira erdarakada garbienak eta, sintaxiaren aldetik, erdarazko egituren araberakoak garrantzi handiagokotzat jo ohi dira, hitz mailan geratzen direnak baino. Jatorria edozein hizkuntza izan daitekeen arren, euskarak gertuen dauzkan hizkuntzetatik datozenak ohikoenak dira: gaztelaniatik Hego Euskal Herrian eta frantsesetik, Ipar Euskal Herrian.

Adibideak

Hona hemen gaztelaniatiko erdarakada batzuen adibideak:

  • Mikel le ha tomado el pelo a Ane.
    • *Mikelek ilea hartu dio Aneri (erdarakada).
    • Mikelek Aneri adarra jo dio / Mikelek Aneri ziria sartu dio (ongi).
  • Te echo en falta.
    • *Faltan botatzen zaitut (erdarakada).
    • Zure falta sumatzen dut / Zure falta nabari dut / Zure hutsunea nabaritzen dut / Zure mina dut (ongi).
  • ¿Está Jone por aquí?
    • *Dago Jone hemendik? (bi erdarakada).
    • Jone hemen (al) da? / Jone hemen (al) dago? (ongi).
  • En Bizkaia se dio un gran desarrollo industrial.
    • *Bizkaian garapen industrial handi bat eman zen (bi erdarakada).
    • Bizkaian garapen industrial handia izan zen / gertatu zen (ongi).

Frantsesetiko batzuk:

  • Je pense à toi.
    • *Zuri pentsatzen dut (erdarakada).
    • Zutaz pentsatzen dut / Zuregan pentsatzen dut (ongi).
  • Le gouvernement te paye.
    • *Gobernuak pagatzen zaitu (erdarakada).
    • Gobernuak ordaintzen dizu / Gobernuak pagatzen dizu (ongi).
  • Elle est arrivée hier.
    • *Atzo arribatu da (erdarakada).
    • Atzo arribatu zen / Atzo iritsi zen / Atzo heldu zen / Atzo ailegatu zen (ongi).
  • Un grand merci à tous.
    • *Milesker handi bat guztiei (erdarakada).
    • Milesker guztiei / Esker mila guztiei / Eskerrik asko guztiei (ongi).
  • Tu aimes le vin ?
    • *Ardoa maite duzu? (erdarakada).
    • Ardoa gustatzen (al) zaizu? / Ardoa atsegin (al) duzu? / Ardoa atsegin (al) zaizu? / Ardoa laket duzu? (ongi).

Ikus, gainera

Kanpo estekak
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.