Edmund Leach

Edmund Leach
Bizitza
Jaiotza	Sidmouth (en) eta Lancashire, 1910eko azaroaren 7a
Herrialdea	Erresuma Batua
Heriotza	Cambridge, 1989ko urtarrilaren 6a (78 urte)
Hezkuntza
Heziketa	King's College (en) ; Clare College (en)
Tesia	Cultural change, with special reference to the hill tribes of Burma and Assam (en)
Tesi zuzendaria	Bronisław Malinowski
Doktorego ikaslea(k)	Fredrik Barth
Hizkuntzak	ingelesa
Jarduerak
Jarduerak	antropologoa
Lantokia(k)	Cambridge
Enplegatzailea(k)	Cambridgeko Unibertsitatea
Jasotako sariak	ikusi Fellow of the British Academy ; Huxley Memorial Medal (1980) ;
Influentziak	Claude Lévi-Strauss
Kidetza	Britainiar Akademia; Arteen eta Zientzien Ameriketako Estatu Batuetako Akademia

Sir Edmund Ronald Leach (Sidmouth, Ingalaterra, 1910eko azaroaren 7a - Cambridge, Ingalaterra, 1989ko urtarrilaren 6a) britainiar antropologoa izan zen.

Biografia

Ingeniaritza ikasi zuen, eta Bronislaw Malinowskiren eta Alfred Reginald Radcliffe-Brownen ikasle izan zen. Cambridgeko King's Collegeko ikerketa-zuzendari izan zen, eta Stanfordeko Center for Advanced Studies in Behavioral Sciences erakundeko kide.

Ezaguna izan zen bere lan etnografikoengatik, eta Birmaniako katxiei buruzko lanengatik. Ortodoxiei, funtzionalismoari edo estrukturalismoari, batez ere, aurre egin zien beti.

Bi lanek eta artikulu-bilduma batek biltzen dituzte Leachen metodoaren oinarriak. Birmaniako goi lurretako sistema politikoak. Katxien gizarte-egituren analisia (1954) lanean, Leachek Radcliffe-Brown antropologoaren funtzionalismoa kritikatu zuen.

Bestalde, gizartearen egituraren eta kultura-aldaketaren teoria zalantzan jarri zituen.

Pul Eliya. A Village in Ceylan. A Study of Land Tenure and Kinship (1961) lanean, berriz, ahaidetasun-egitura sistema ideal gisa eman zuen, eta gizarte-jokaerak egokitzapen ekologikoko fenomenoaren bidez azaldu zituen; hortaz, antropologia estrukturalaren erabat kontrakoa zen haren pentsamendua. Critique de l'anthropologie (1961) artikulu-bilduman, bide taxonomikoaren mugak azaldu zituen. Nolanahi dela ere, eredu formalekiko zuen interesak, ahaidetasunaren terminologietara egokitutako ereduekikoak, batez ere, Lévi-Straussen estrukturalismora hurbiltzen dute.

Leachek, bestalde, etengabe jarri zituen zalantzan ahaidetasunaren, ezkontzaren edo errituen alorrean antropologiak, oro har, onartzen dituen oinarriak. Eragin handia izan du gaur egungo antropologian.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Datuak: Q550729

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.