Dinah Murray

Tony Greenwood politikariaren eta Jill Greenwood idazlearen alaba, Londresko Hampstead auzoan jaio zen. Murrayren aitabitxia Clement Attlee Erresuma Batuko lehen ministroa zen[2].

Byron House eskolan, Highgaten eta North London Collegiate Schoolen ikasi zuen. Penguin Booksen lan egin zuen editore gisa, Londresko University Collegera joan baino lehen, eta 1969an hizkuntzalaritzan eta antropologian lizentziatu zen[3].

Murray autista zen, eta bere karrera gehiena autismoa ikertzen, eta pertsona autisten aldeko kanpainak egiten eman zuen. 1986an hizkuntzalaritzako doktoretza lortu zuen Londresko University Collegen. 1996tik 2013ra WebAutism ikasgaiko irakasle laguntzailea izan zen Birminghamgo Unibertsitatean[2].

1990eko hamarkadan Londresen komunitateko langilea izan zen, eta esperientzia horrek APANA (Autistic People Against Neuroleptic Abuse) erakundea sortzera eraman zuen[3]. Urte horietan, Wenn Lawson eta Mike Lesser ikertzaile autistekin elkarlanean aritu zen, monotropismoaren teoria garatzeko[2]. Mike Lesserrekin batera, Autism and Computing erakundea sortu zuen[3].

2017an, National Autistic Societyk Bizitzako Lorpen Saria eman zion[1]. Gainera, AutNav aplikazioa garatzen lagundu zuen[3].

1970ean, David Murray filosofo eta musika kritikariarekin ezkondu zen. Hiru seme-alaba izan zituzten eta beste haur bat zaindu zuten harrera familia gisa. 2016an senarra hil zitzaion[3].

2021eko uztailaren 7an hil zen pankreako minbiziaren ondorioz[3].