Busturialdea Arraun Elkartea

Mundaka zuria zen eta Elantxoberen elastikoa berdea. Kolore bi horiek konbinatzen ditu Busturialdearen elastikoak. Trainerua elantxobetarren "Artarri" gorria da.

Aurretik Elantxobe Arraun Elkarteak eta Mundakako Arraun Taldeak beren bideak eginak zituzten 2007an Busturialdea Arraun Elkartea sortu zutenerako. Mundakarrak Kontxan aritu izanak ziren eta elantxobetarrek 1998an Bizkaiko Traineru Txapelketa irabazia zuten.

Beren arteko lehenengo elkarketa 1999an izan zen, orduan Bermeo ere beraiekin zela Urdaibai Arraun Elkartea eratu zuten, baina berehala etorri ziren hiruren arteko desadostasunak eta elkarteak ez zuen askorik irau. Hala ere bermeotarrek Urdaibai izenarekin jarraitu dute.

Honen ondoren Elantxobek Arkoterekin batera Bateratze talde arrakastatsua sortu zuen eta Mundaka aldiz Algortarekin batu zen. Azkenean 2007an Busturialdea taldea osatu zuten eta KAE Ligan aritu izan da lehen eta bigarren maila ezagutu dituelarik. Lehenengo urtean bertan herriko bandera irabaztearekin estreinatu zuen palmaresa. 2009an ordea berriz banatzea erabaki zuten, baina Elantxobek Busturialdea izenarekin jarraitu zuen.

2011ean KAE 2. maila irabazi (7 bandera ere bai) eta KAE 1 ligara igo zen. Lehenengo estropada etxean jokatu eta bigarren postua lortu zuen Orio Arraunketa Elkartearen atzetik. Beste bigarren postu batzuk ere lortu zituen arren Ligako azken sailkapenean laugarren gelditu zen, inoizko posturik onena. Hurrengo urteetan taldeak banaturik aritu ziren, tarteka Mundaka Bermeo B-rekin batera ere aritu da, baina 2018an berriz elkartzea erabaki zuten trainerua uretaratu ahal izateko.

2021ean denboraldi bikaina burutu zuen, KAE 2. mailako liga irabazi eta KAE 1. mailara igo zen. Hurrengo bi urtetan jaitsiera play-offak jokatu zituen eta 2023an KAE 2 Ligara itzuli zen.