Benvenuto Cellini

Benvenuto Cellini
	; Irudi gehiago
Bizitza
Jaiotza	Florentzia, 1500eko azaroaren 1a
Talde etnikoa	Italiarra
Heriotza	Florentzia eta Toskanako Dukerri Handia, 1571ko otsailaren 13a (70 urte)
Familia
Ezkontidea(k)	Piera Parigi (en)
Hezkuntza
Hizkuntzak	italiera
Irakaslea(k)	Michelangelo Brandini (en) ; Lucagnolo da Jesi (en)
Jarduerak
Jarduerak	eskultorea, idazlea, domina-egilea, autobiografialaria, arkitektura proiektuen marrazkilaria, urregina, arte-historialaria, zilargina eta musikaria
Lantokia(k)	Florentzia; Erroma; Mantua; Fontainebleau; Paris; Venezia; Lyon; Bolonia; Napoli; Pisa eta Siena
Lan nabarmenak	ikusi Fontainebleau Nymph (en) ; Pertseo Medusaren buruarekin; Frantzisko I.aren gatzontzia;
Kidetza	Accademia delle Arti del Disegno (en)
Mugimendua	manierismoa
Genero artistikoa	margolaritza mitologikoa; margolaritza erlijiosoa
Sinesmenak eta ideologia
Erlijioa	Erromatar Eliza Katolikoa

Benvenuto Cellini (Florentzia, 1500eko azaroaren 3a - 1571ko otsailaren 13a) italiar eskultore trebea, zilargin handia eta idazle zorrotza izan zen, eta manierismoko artistarik garrantzitsuenetakoa. Hala ere, artista dohainari baino, abenturaz betetako bizitzari eta bere izaerari zor dio ospea. Abenturaren, emakumeen eta parrandaren zalea zen Cellini, eta baita artista bikaina ere. Inork ez bezala jaso zituen Donatello eta Michelangelo, bere aurreko eskultore bikainen oreka, grazia eta dohain handiak.

Gurutzefika, El Escorial monasterioa.

Celliniren lanetara zaletu ziren Mediciko Frantzisko I.a eta Cosimo I.a, eta baita Klemente VII.a eta Paulo III.a aita santuak ere.

Biografia

Florentzia, Siena, Pisa eta Erroman ikasi zuen. Hemeretzi urterekin Erromara jo behar izan zuen, Florentzian izan zuen liskar baten ondoren. 1529. urtean lantoki bat sortu zuen Erroman, Klemente VII.a Aita Santuaren laguntzaz, eta urregintzako lan bikainak egin zituen han (Leonardo, Rafael, Michelangelo eta Filippino Lippiren irudietan inspiraturiko diruak eta dominak).

Frantzisko I.ak gonbidatuta, Frantziara aldatu zen, eta bertan bizi izan zen 1540tik 1545era. Frantzisko I.arentzat, Gatzontzia (Kunsthistorisches Museum, Viena), lan ospetsua, egin zuen, urre, zilar eta esmaltezkoa. Itsasontzi baten forma du eta bi irudi agertzen dira: batetik Neptuno -ontziaren babesle- eta bestetik, Ceres, piperbeltzaren zaindari. Lan hori Florentziako eskulturaren oroigarri da, eta Fontainebleauko eskolako manierismoaren dotoretasunaren arabera egina da. Garai hartako obra nagusia, ordea, Fontainebleauko ninfa (1543, Louvre Museoa) behe-erliebe bikaina izan zen. Hura izan zen tamaina handian egin zuen lehenengo saioa.

Perseo, 1545-1554, Loggia dei Lanzi, Florentzia

1545. urtean Florentziara itzuli eta, Mediciko Kosme I.aren babespean, bere eskultura-obra handienak egin zituen ondoko urteetan: Cosme I.a (1545-1548, Museo Nazionale del Bargello, Florentzia), Narciso (1548) eta Perseo (1545-1554, Loggia dei Lanzi, Florentzia), bere eskultura ospetsuena. 1555-1562 bitartean Gurutzefika egin zuen, marmolezko lana. Frantzisko I.a Medicikoak Espainiako Filipe II.ari eman zion opari, eta El Escorial monasterioan dago gaur egun. Lan horretan -erabateko biluzia- aipatzekoak dira anatomiaren xehetasunak.

Gatzontzia, Viena

Idazlanak

Cellinik idatzi zituen literatura lanak ez ziren teoriazkoak izan, praktikoak eta teknikoak baizik. Bi tratatuetan, Trattato dell'Oreficeria (1565) eta Trattato della Scultura (1565-1567), bere eskulturen deskribapen zehatzak eta bizkorrak egiten ditu batetik, eta, bestetik, bere garaiko artistei buruzko zenbait datu ematen ditu.

Bizitzaren azken urteetan bere oroitzapenak idatzi zituen (Vita di Benvenuto di Maestro Giovanni Cellini fiorentino, 1558-1566 bitartean idatzia gutxi gorabehera, eta 1728an Napolin argitaratua) garrantzizko literatura lana da, bai artistaren lana ezagutzeko bai manierismoaren kultura ulertzeko. Liburu biografiko horri esker ezagutzen dira haren joan-etorriak, eta baita brontzearen, zilarraren eta esmaltearen urtzeari buruzko, eta dominak eta gemak lantzeko arteari buruzko xehetasunak ere. Horrez gainera, pasarte bereziak ditu, hala nola, Sant'Angelo gazteluko ihesaldia edo Perseo lanaren urtzea. Vita oso lan famatua izan zen erromantizismoaren garaian.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2012/11/11 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Wikimedia Commonsen badira fitxategi gehiago, gai hau dutenak: Benvenuto Cellini

Datuak: Q190116
Multimedia: Benvenuto Cellini / Q190116

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.