Atertu arte itxaron

Atertu arte itxaron Katixa Agirrek idatziriko lehen eleberria da, 2015. urtean Elkar argitaletxearen eskutik argitaratua. Urte hartan bertan, 111 Akademia Saria literatura saria jaso zuen. Eleberriak Euskal Herrian barrena gertatzen den Road Movie antzeko bat du oinarrian. Trama nagusia bikotearen bidaia den arren, eleberriak baditu beste bi hari ere, eleberria irakurri ahala hari nagusiarekin korapilatzen direnak.

    Atertu arte itxaron
    Jatorria
    Egilea(k)Katixa Agirre
    Argitaratze-data2015
    IzenburuaAtertu arte itxaron
    ArgitaletxeaElkar
    Ezaugarriak
    Genero artistikoaeleberria
    Hizkuntzaeuskara
    Historia
    Jasotako sariak

    Argumentua

    Road Movie antzeko bat Euskal Herrian barrena. Uliak bere sorterria erakutsi nahi dio bikotekideari, eta ibilbide lasai bat prestatzen dute, udan zehar, bigarren mailako errepideetan, Gustavoren BMW berrian. Dena ez da horren lasaia, ordea. Uliak badu aitortu gabeko sekreturik, eta bidean topaturiko ezagunen batek ekaitza iragartzen du bikotearen harmonian, zeruko laino beltzen antzera. (ikus kontrazala) Eleberria zuhaitz bat balitz, enborra Uliaren eta Gustavoren bidaia litzateke. Enborrak bi adar lituzke: bata, Benjamin Britten konpositore britainiarraren bizitza; bestea, Uliaren gurasoen istorioa. Eleberriak historiatik eta istoriotik dauka.

    Egitura eta estiloa

    Eleberria kapitulu motzetan egituratua dago, kapitulutik kapitulura, hainbatetan, denboran jauziak gertatzen direlarik. Narratzailea aldakorra da, bigarren pertsona eta hirugarrena nahastea gustatzen zaiolarik. Enborrean bigarren pertsona erabiltzen duen arren, adarretatik joatean hirugarren pertsonan kontatzen digu eleberria.

    Pertsonaia nagusiak

    Honakoak dira eleberrian azaltzen diren pertsonaia nagusiak:

    • Ulia: Bera da protagonista eta hainbatetan narratzailea. Gustavoren bikotea, musikaria eta Madrilen bizi arren Gasteiztarra da.
    • Gustavo: Uliaren bikotea, unibertsitateko irakaslea eta Madrildarra da.
    • Sarah: Istorioan zehar noizbehinka agerpenak egiten dituen kazetaria.
    • Mariluz: Uliaren ama.
    • Jota: Preso dagoen Uliaren aita.
    • Joseba: Mariluzen bikote ohia.
    • Benjamin Britten: Konpositore britainiar bakezalea.

    Itzulpena

    Katixa Agirre idazleak berak Pre-Textos argitaletxearen bidez gaztelaniara itzuli zuen eleberria 2017. urtean. Izenburua ez zuen bere horretan itzuli; Los Turistas Desganados izenburupean argitaratua izan zen.

    Kanpo estekak
    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.