Aran Goyoaga

Arantzazu Goyoaga Ayarza 1974ko otsailaren 17an jaio zen, Zornotzan (Bizkaia). Amaren aldeko aitita-amamek gozotegi bat zeukaten bere etxe ondoan, oraindik ere Ayarza familiak gobernatzen duena; Nekane amak ere han lan egiten zuenez, haurtzaroaren zati handi bat gozotegiko sukaldean sartuta igaro zuen, ezarian-ezarian gozogintzaren nondik norakoak ikasten eta helduaroan bere lanaren inspirazio-iturri izan ziren usainak barneratzen. Txomin aita, berriz, ingeniaria izan da ogibidez, baina artista bihotzez; estudio bat dauka etxean, eta Aran Goyoagak hantxe kokatzen du beti aita umetako oroitzapenetan, Euskal Herriko landa-paisaiak eta senideen eta ingurukoen erretratuak pintatzen; hortik datorkio, Goyoagak dioenez, artearekiko, argiarekiko, koloreekiko eta testurarekiko jaidura eta jakin-mina.[1]

Euskal Herrian Ekonomia Ikasketak egin ostean, 1998an AEBra joan zen bizitzera, Colorado estatuko Denver hiriburura. Lau urtez negozioen munduan lan egin ondoren, 2002an Floridara aldatu eta West Palm Beach-eko Florida Culinary Institute sukaldaritza-eskolan izena eman zuen.[1] Gozogintzako ikasketak amaituta, 2003 eta 2006 bitartean Floridako hainbat jatetxe eta hotel ezagunetan lan egin zuen; besteak beste, Ritz-Carlton Hoteleko gozogintza-burua izan zen.[2][3]

2008an Cannelle et Vanille bloga abiatu zuen, sukaldean sortu eta ondutako errezetak sarearen bidez zabaltzeko asmoarekin.[4] Sukaldaritzan begiak duen garrantziaz jakitun, argazkigintzan eta estilismo gastronomikoan trebatu zen, bere kabuz eta berariazko eskolarik hartu gabe.[2][3][4] Orduz geroztik horretan dihardu, milaka jarraitzaile dituen bloga[4] noiztenka elikatzen eta Instagram kontua egunero berritzen jarraitzeaz gain beste hainbat lan ere eginez: Instagram kontua etengabe berritu, ikus-entzunezko proiektuak, aldizkari-artikuluak, sukaldaritza-liburuen estilismoa eta fotografia, eta abar.[5][4]

2011tik, estilismo gastronomikoari eta argazkilaritzari buruzko ikastaroak ematen ditu munduan zehar (Euskal Herria, Suedia, Italia, Frantzia, Islandia...),[4] bere sormen-prozesua erakutsiz.[6][4]

2013az geroztik Seattle-n bizi da, eta hantxe dauka bere sukalde-estudioa, errezetak sortzeko, janari-estilismoa lantzeko eta ikastaroak emateko erabiltzen duena.[5]

• 2012an “Small Plates & Sweet Treats: My Family’s Journey to Gluten-Free Cooking” sukaldaritza-liburua argitaratu zuen, non glutenik gabeko errezetak, jangaien eta egunerokotasunaren argazkiak eta haurtzaroko oroitzapenak jasotzen baitituen.[7]
• 2016an, ostera, "A cook's remedy: video series" proiektua abiatu zuen, janariaren eta komunitatearen arteko harremana aztertzen duen bideo-seriea.[8]

• Hainbat telebista-saiotan parte hartu du. Euskal Herrian, Euskal Telebistaren gaztelaniazko ETB2 kateko "Robin Food" programako bi saiotan parte hartu du, 2011n eta 2013an, David de Jorge aurkezlearekin batera.[9]
• Bestalde, bere lana nazioarteko hainbat egunkari eta aldizkaritan agertu da:[4] The New York Times,[10] Food & Wine, Conde Nast Traveler, GFF magazine, Sift, Travel & Leisure, Vogue, Town & Country UK, Wine Enthusiast, Coastal Living, Cherry Bombe, Sweet Paul, eta abar.[5]

• 2009an, The Times aldizkari britainiarrak munduko 50 blog gastronomiko onenen zerrendan sartu zuen, bigarren postuan.[3][4]

• Small Plates & Sweet Treats: My Family’s Journey to Gluten-Free Cooking (2012)(liburua)
• A cook's remedy: video series (2016-2017) (bideoa)

• Finalista 2012 eta 2013ko James Beard Sarietan, blog gastronomiko indibidualik onenari eskainitako kategorian[2][11]
• Finalista 2017ko Saveur Blog Sarietan, bideo gastronomiko onenari eskainitako kategorian (oraindik eman gabe)[12]

• (Ingelesez) Cannell et Vanille Aran Goyoagaren blog pertsonala.
• Aran Goyoagaren webgune ofiziala
• "A cook's remedy: video series"
• (Gaztelaniaz) Aran Goyoaga ETB2ko Robin Food saioan (2013-10-08)
• (Gaztelaniaz) Aran Goyoaga ETB2ko Robin Food saioan (2011-11-01)