Altsasu (telesaila)

Altsasuko taberna batean gauez Guardia Zibileko bi kiderekin gertatutako liskar baten ondorioz, herriko zortzi gazte auziperatuak izango dira.

Maite Iturbe EITBko zuzendariak Euskal Telebistak hiru telesail labur egiteko asmoa zuela iragarri zuen Eusko Legebiltzarreko kontrol batzordean, 2019ko martxoan.[1] 2019ko azaroan Eduardo Barinagak, ETBko zuzendariak, Altsasu auziari buruzko telesail bat egingo zutela iragarri zuen Gure kasa saioan egindako elkarrizketan, eta "fikzio soziala" egiteko apustua nabarmendu zuen. Halaber, presoen senideek proiektua begi onez ikusten zutela aipatu zuen.[2]

Telesaila Baleuko ekoiztetxeak ekoitzi du, eta ETB zein TV3en parte-hartzea du.[3] Eider Gabilondo izan da ekoizpen zuzendaria, eta Idurre Cajaraville produktore eragilea. Asier Urbietak zuzendua, gidoilari taldea Harkaitz Canok, Mikel Alvarezek eta Andoni De Carlosek osatu dute, eta Txabe Atxa izan da casting zuzendaria.[4] Telesaila sortzeko dokumentazio lan handia gauzatu zuten; kasuan inplikatutako hainbat pertsona elkarrizketatu zituzten eta epaiketaren transkripzioa erabili zuten. Auzipetutako gazteekin zein haien senideekin hitz egin zuten.[5] Guardia zibilekin ere hitz egin nahi izan zuten, baina ezezkoa eman zieten.[6]

Grabaketak irailaren 21ean hasi ziren eta bost astez luzatzea aurreikusten da, urriaren 24ra arte.[7] Grabaketa gehienak Altsasun egin ziren, baina Iruñea, Oiartzun eta Segoviako kartzelan ere erabili ziren hainbat eszenatarako.[8]

Telesaila 2020ko abenduaren 9an estreinatu zen ETB1en. Katalunian ere emititu zen, TV3en partaidetza baitu.

ETB 1en abenduaren 9an aireratu zuten. Egun batzuk beranduago espainiar unionismoaren inguruko alderdi zein komunikabideetatik kritika zorrotzak izan zituen. Euskadiko PP + CC - Herritarron Alderdiaren bozeramaileak zera esan zuen: "(ETBko) Telebatzokitik, teleherrikora pasatu gara" "... ETBk terrorismoa (hau da, ETA) zuritu nahi du"[10].

Bestalde komunikabide batzuen arabera, La Razón eta Ok diario egunkarien arabera besteak beste, Altsasu telesailean agertzen diren Guardia Zibilak mozkorti eta biolentoak bezala agertzen dira.[11][12][13] Luis Gordillo Eusko Legebiltzarreko PP + CC talde politikoaren bozeramaileak 2021eko otsailaren 24an adierazi zuenez, telesail horrek, EITBko beste batzuek bezala, "itxuraldatu egin dute [EAEko] historia berria", eta ez zaizkio lotzen "egia judizialari", besteak beste.[14]

Adierazpen horien ondoren, PP + CC taldeak Andoni Aldekoa EITBko zuzendari nagusiaren agerraldia eskatu zuen Eusko Legebiltzarrean telesailari buruzko azalpenak eman zitzan, baita horrek hala egin ere. Bada, Aldekoak erantzun zuen EITB ez dela "liskarrerako elementu bihurtuko" eta, beraz, ez duela Altsasu telesailaren moduko programarik gehiago ekoitziko, "ika-mikarako eta polarizazio politikorako" bidea zelaitu dezaketelako.[14][15]

Altsasuko telesaila egiterakoan, bai Altsasuko gurasoak bai eta gazteen gurasoak bere sentimentuei eta historiari buruzko kontakizuna kontatzeko desiatzen egon ziren. Aldiz, erasotuak izan ziren edo lizkarrean parte hartu zuten Goardia Zibilek eta beraien bikoteek ez zuten elkarrizketan parte hartu nahi izan[16].