Aliya Mustafina

Moskuko oblastean jaio zen 1994an. Aitak brontze olinpikoa eskuratu zuen 1976ko Olinpiar Jokoetako borroka greko-erromatarrean, ama aldiz fisika irakaslea du[2].

13 urte zituela hartu zuen parte aurrenekoz nazioarteko lehiaketa batean, Montrealen, eta orotarako sailkapenean bigarren egin zuen[3]. Urte berean ere bigarrena izan zen Kieven eta Yokohaman jokaturiko probetan. 2010ean Munduko txapelketak jokatu zituen Rotterdamen eta urrezko bi domina eta zilarrezko hiru eskuratu zituen.

2012an Londresko Olinpiar Jokoetan txapeldun olinpikoa izan zen barra asimetrikotan[4] eta beste hiru domina ere lortu zituen; zilarrezkoa taldekako sailkapenean eta brontzezko bi orotako sailkapenean eta zoruko ariketan.

2016an Rioko Olinpiar Jokoetan berriz izan zen txapelduna barra asimetrikotan[5], urte hartan gimnasia artistikoan estatubatuarrek izan zuten nagusitasun handia hautsiz, eta beste bi domina ere eskuratu zituen, zilarrezkoa taldekakoan eta brontzezkoa orotariko sailkapenean.

Rioko Jokoen ondoren atsedenadia hartu zuen alaba izan baitzuen[6]. Hurrengo urteetan lehiara itzuli bazen ere ez zuen berriz maila bera erakutsi eta 2021ean kirol ibilbideari amaiera eman zion[7]. Urte berean Errusiako gazte mailako selekzioko entrenatzaile kargua hartu zuen[8].

2015ean Alexey Zaitsev bobsleigh lasterkariarekin harremana hasi zuen eta 2016an ezkondu ziren. 2016ko azaroaren 3an ezkondu ziren Krasnodarren[3] eta 2017ko ekainaren 9an Alisa izeneko alaba izan zuten[3]. 2018ko apirilean dibortziatu egin ziren[9].