La tigraja lingvo (propralingve ትግርኛ [tigriññā], literumata ankaŭ Tigrinya, Tigrigna, Tigrina, Tigriña, malpli ofte (anglalingve) Tigrinian, Tigrinyan), estas ŝemida lingvo parolata en Eritreo kaj Etiopio. Ĝi estas skribata per la etiopa skribo, silaba skribo, skribata de maldekstre al dekstre.

Ĝi estas parolata

• de la popolo Tigraja en centra Eritreo, en kiu lando ĝi estas unu el la du ĉefaj lingvoj,
• kaj en la Tigrea Regiono de Etiopio, kie la parolantoj nomiĝas "Tigre" kaj la lingvo estas oficiale rekonata,
• kaj inter elmigrintoj el tiuj regionoj
  • inkluzive iujn el la Beta Israel nun loĝantajn en Israelo.

Oni distingu inter la tigraja lingvo kaj la parenca tigrea lingvo, parolata en la malaltaj regionoj en Eritreo norde kaj okcidente de la regiono kie paroliĝas la tigraja.