Plurlingvula kunveno aŭ Poliglota renkontiĝo (angle Polyglot Gathering) estas ĉiujara renkontiĝo organizata por plurlingvuloj kaj lingvoŝatantoj.
Principo
Ĉi tiu evento daŭras kvar tagojn kaj kutime venigas pli ol 300 partoprenantojn. Dum la tago okazas prelegoj pri diversaj temoj (metodoj de lingvolernado, prezentoj de unuopaj lingvoj, ktp.), vespere okazas lingvorilata distra programo, kiel ludoj, lingvaj kvizoj aŭ multlingvaj koncertoj (ekzemple de JoMo). La ĉefa komuniklingvo estas la angla, sed ĝi ne estas deviga kaj prelegoj okazas ankaŭ en aliaj lingvoj (ekzemple la germana, franca, hispana, itala, rusa aŭ en Esperanto).
Historio
La unua plurlingvula kunveno okazis en 2014 en Berlino. Pluraj el ĝiaj ĉefaj organizantoj (interalie Chuck Smith kaj Judith Meyer) volis krei kunvenon por lingvoŝatantoj kaj transdoni la etoson de Esperanto-renkontiĝoj al neesperantista publiko. Pro tio la funkciado de la kunveno estas tre inspirita de Esperantujo kaj enhavas ekzemple gufujon kaj aligatorejon (kaj tiuj du Esperantaj vortoj estas uzataj angle).
Celgrupo
La Polyglot Gathering ne aparte celas Esperanto-parolantojn, nek estas celo iel tro puŝi en ĝi Esperanton. Ĝi estas por ĉiu plurlingvemulo, sendepende de tio, kiajn/kiujn lingvojn tiu aŭ alia parolas kaj kiomgrade. Tamen estas ege interesa rilato de Esperanto en la tuto: unue, ĝin elpensis kaj la tri unuajn fojojn organizis tri esperantistoj. En 2017 transprenis la organizadon E@I kune kun la slovaka poliglotino Lýdia Machová. Rezulte: ĉirkaŭ kvarono de la patroprenantoj nun scipovas Esperanton. Ne hazarde pluraj programeroj devenas rekte el la Esperanto-kulturo. Eble ankaŭ pro tio eĉ neesperantistoj bone sentas sin dum la evento – la Esperanta etoso penetras en ilin, eĉ se ili mem la lingvon (ankoraŭ) ne parolas. Multaj venintoj ekhavas ĉi tie la unuan eblon praktiki Esperanton, aŭ eĉ entute ekscias pri la lingvo kaj tuj vidas, kiom ĝi praktike uzeblas – ja preskaŭ la tuta organiza teamo uzas ĝin kiel laborlingvon. Eĉ se la angla estas la ĉefa lingvo de la evento, Esperanton eblus titoli kiel la dua lingvo kaj ĉefe “la unua organiza lingvo”[1]
Okazintaj kaj okazontaj kunvenoj
| Jaro | Urbo | Nombro de partoprenantoj | Landoj | Fonto |
|---|---|---|---|---|
| 2014 | Berlino | 231 | 35 | [2] |
| 2015 | Berlino | 344 | 52 | [3] |
| 2016 | Berlino | ~400 | [4] | |
| 2017 | Bratislavo | 458 | 52 | [5] |
| 2018 | Bratislavo | 538 | 56 | [6] |
| 2019 | Bratislavo | [7] | ||
| 2022 | Teresin | [8] | ||
| 2023 | Teresin | [9] | ||
| 2024 | Prago |
Referencoj
- ↑ Peter Baláž, La plej granda renkontiĝo de plurlingvemuloj, La Ondo de Esperanto, p. 6-7, n-ro 7, 2018.
- ↑ Interlinguistische Informationen. Nr. 96-97 (3-4/2015), p. 2
- ↑ Interlinguistische Informationen. Nr. 96-97 (3-4/2015), p. 2
- ↑ Tsar Experiences
- ↑ How to get fluent
- ↑ Ondo de Esperanto, 7/2018, p. 6
- ↑ (en) Polyglot Gathering 2019
- ↑ Polyglot Gathering 2022
- ↑ (en) Polyglot Gathering 2023
Vidu ankaŭ
Eksteraj ligiloj
- (multlingva) Oficiala retejo
- (plurlingve) Jutuba kanalo de Polyglot Gathering (Plurlingva kunveno)
- Prezentado en 11 lingvoj de la Kongreso de Poliglotoj
- (angla) Prelego de Rakoen Maertens dum plurlingvula kunveno en 2021 pri Esperanto kaj UN (Esperanto and the United Nations: Challenges on Language and Cultures of the World)
- (angla) Prelego de Benny Lewis dum plurlingvula kunveno pri vertikalaj, mallongaj videaĵoj (TikTok), Reels (Instagram) aŭ Shorts (YouTube) por lingvolernantoj kaj poliglotaj videokreantoj.
- (angla) Trapped in the Anglosphere: compassion for native-English speakers - Laura-Jane Baxter | PGO 2022