Piotr SKARGA blazono Pawęża, SJ, alia formo de la nomo: Piotr Powęski (naskiĝis la 2-an de februaro 1536 en Grójec, mortis la 27-an de septembro 1612 en Krakovo) – pola jezuito, teologo, verkisto kaj predikanto, grava pola reprezentanto de kontraŭreformacio, kortega predikanto de Sigismondo la 3-a Vasa, rektoro de Kolegio de Jezuitoj en Vilno, la unua rektoro de Vilna Universitato.
Vivo kaj agado
En la jaroj 1552-1555 studis en Akademia Krakowska, akirante gradon de bakalaŭro ĉe Filozofia Fakultato. En 1564 en Lvovo ordiniĝis kaj kiel kanoniko komencis agadon de predikanto, i.a. ĉe Lvova Katedralo. Post kelkaj jaroj vojaĝis al Italio, kie en Romo en 1569 eniris monaĥejon de jezuitoj. Reveninte post du jaroj okupiĝis pri fondado en Pollando jezuitajn kolegiojn kaj pri bonfaranta agado por protekti homojn kontraŭ procentego. Estis planita unua rektoro de Kolegio en Poznań, kiu fine iĝis Jakub Wujek. Li estis eminenta animzorganto de Litovio kaj Belorusio, fondis kelke da jezuitaj kolegioj, ekz. en Polack, Rigo kaj Tartu.
