Les Deux Magots (prononco [le dø maɡo], "la du [fremdlandaj] komercistoj") estas fama kafejo de Parizo. Ĝi troviĝas en la kvartalo Saint-Germain-des-Prés, en la 6-a arondismento de la franca ĉefurbo.
Deveno de la nomo
La nomo de la kafejo devenas de la nomo de eksa butiko de novaĵoj, kiu iam situis sur la sama loko (6, placo Saint-Germain-des-Prés).
Historio
La kafejo aperis ĉirkaŭ la jaro 1885. Pluraj verkistoj tiam ekkutimis kuniĝi tien, interalie Paul Verlaine, Arthur Rimbaud kaj Stéphane Mallarmé. Ekde tiam, la kafejo ĉiam konservis gravan rolon por la kultura vivo de Parizo.
En 1933, la kreado de la premio Deux Magots konfirmis ĝian literaturan rolon. La kafejo estis sekve frekventita de multaj artistoj, ekzemple Elsa Triolet, André Gide, Jean Giraudoux, Pablo Picasso, Fernand Léger, Jacques Prévert, Ernest Hemingway, Jean-Paul Sartre, Simone de Beauvoir, Bob Welch aŭ Umberto Eco.
Vidu ankaŭ
Eksteraj ligiloj
- Oficiala retejo de la kafejo Arkivigite je 2021-12-03 per la retarkivo Wayback Machine