Laŭ konsilo de Alektoro, Eteoklo subaĉetis Erifilon per la koliero de Harmonio, por ke ŝi konvinku sian edzon partopreni la ekspedicion de la Sep kontraŭ Tebo. Bildo sur ruĝ-figura atika vazo (ĉ. 450-440 a.K.).

Alektoro (el la greka Ἀλέκτωρ) estis la nomo de diversaj roluloj de la helena mitologio:

Alektoro, reĝo de Argolando

Alektoro estis reĝo de Argolando^[1], filo kaj heredinto de Anaksagoro. Lia patro disdividis la regnon en tri partojn (li donacis du trionojn al Melampo kaj Biaso), do Alektoro regis nur trionon de Argolando, inkludite la ĉefurbon Argo. Lin heredis sia filo Ifiso, kvankam kelkaj versioj konsideris Kapaneon filo kaj sekvanto lia.

Poliniko venis al lia kortego por preni konsilon pri la plej taŭga maniero konvinki Amfiarao partopreni la ekspedicion de la Sep kontraŭ Tebo, kvankam pliaj versioj asertas ke estis lia filo Ifiso, tiun kiu gastigis la filon de Edipo^[2][3]. Fine Alektoro konsilis lin subaĉeti la edzinon de Amfiarao per la fama koliero de Harmonio por ke ŝi konvinku sian edzon aliĝi la ekspedicion, kun fatalaj konsekvencoj.

Antaŭe:	Mitaj reĝoj de Argolando	Poste:
Anaksagoro	Alektoro	Ifiso

Alektoro, reĝo de Eliso

Li estis reĝo de Eliso, en Peloponezo^[4]. Lia patro estis Epejo, do Alektoro estis frato de la princino Hirmino. Li estis aliancanto de Forbaso, kiu venis el Tesalio por kune batali kontraŭ Pelopso, la najbara reĝo kiu volis unuigi la tutan Grekion. Dankeme, Alektoro donacis duonon de sia reĝlando al Forbaso kaj edziĝis al lia filino, Diogenio, kiu naskis al li filon nomiĝintan Amarinkeo. Siavice, Forbaso edziĝis al Hirmino, kun kiu li patriĝis de Aŭgeo (laŭ malmultnombraj fontoj) kaj Aktoro^[5][6].

Aliaj roluloj same nomiĝintaj

Krom la antaŭe priskribitaj, Alektoro estis ankaŭ la nomo de la jenaj roluloj de la helena mitologio:

1. La patro de Leito, argonaŭto kaj ĉefo de la beotianoj en la Troja milito^[7]. Homero nomis lin Alektriono^[8], kaj Diodoro Sicila Elektriono, krom konsideri lin filo de Itono^[9]. Laŭ Johano Tzetzes, Alektoro estis ankaŭ la patro de Klonio, Arkesilao kaj Protoenoro (kiujn Diodoro konsideris nevoj liaj) kun diversaj patrinoj: li estis patro de Leito kun Polibulo, de Arkesilao kun Kleobulo, de Protoenoro kun Arteiso kaj de Klonio kun Akteiso^[10].
2. Alektoro el Sparto, filo de Argeo kaj Hegesandro, estis siavice patro de Ifiloĥo (aŭ Eĥemelo), edzino de Megapento, la filo de Menelao^[11].
3. Magnisia princo, filo de la gereĝoj Magno kaj Naiso^[12]

Referencoj

.

Eksteraj ligiloj

• angle Alektoro ĉe Theoi.com Arkivigite je 2011-11-11 per la retarkivo Wayback Machine