Ĝ, minuskle ĝ, estas la 9-a litero de la Esperanta alfabeto, havanta la prononcon [d͡ʒ] kaj la nomon "ĝo". La litero estas ankaŭ uzata en la aleuta lingvo (Unangam Tunuu), havanta prononcon iom similan al voĉa [ĥ] (voĉa uvula frikativo [ʁ]).

Ĝ estas invento de Zamenhof, modifo de G per aldono de cirkumflekso.

Analogaj literoj kaj literkombinoj en aliaj lingvoj

• g en la angla lingvo kiel en George (Georgo)
• j en la angla lingvo kiel en Japan (Japanio)
• џ en la serba kaj makedona lingvo kiel en Џибути (Ĝibutio)
• dzs, aparta litero en la hungara lingvo kiel en Dzsungel (ĝangalo)
• dsch en la germana lingvo kiel en Dschungel (ĝangalo)
• gi/g en la itala lingvo kiel en Gianna/Giovanna (Johana) / gennaio (Januaro)
• dj en la franca lingvo kiel en Djibouti (Ĝibutio)
• dż en la pola lingvo kiel en Dżibuti (Ĝibutio), Dżakarta (Ĝakarto/Jakarta)
• cz en la pola lingvo kiel en liczba (nombro)
• dž en la ĉeĥa lingvo kiel en Džibutsko (Ĝibutio)
• dž en la bosna lingvo kiel en Džibuti (Ĝibutio)
• дж en la rusa lingvo kiel en Джибути (Ĝibutio)
• ჯ en la kartvela lingvo

Surogataj skribosistemoj

Kiel surogata skribosistemo, eblas eviti la ĉapelan signon en situacioj kiam uzo de la normala litero ĝ teknike problemas (historie en nacilingvaj tajpiloj aŭ en telegramoj, moderne ekzemple en poŝtelefonaj mesaĝetoj aŭ iuj retpoŝtaj programoj): tradicia helpa kodo en Esperanto estas la h-sistemo, do reprezentigo de la litero per kombino "gh", kvankam en la 20-a jarcento pli kaj pli uziĝis la x-sistemo, do reprezentigo de la litero per kombino "gx" (avantaĝa por aŭtomata anstataŭigo per la vera ĉapelita litero). Aliaj sistemoj malpli ofte uzatas: el ili menciindas la uzo de la kombinoj gˆ kaj g'.

En komputiloj

En Unikodo, Ĝ kaj ĝ havas la kodojn 284 (deksesume U+011C) kaj 285 (deksesume U+011D), respektive.