ཡ་མཚན་ཅན་གྱི་ མགར་ས་བཀྲིས་མཐོང་སྨོན་རྫོང་འདི་ མགར་ས་ རྫོང་ཁག་གི་བདག་སྐྱོང་གི་ཕྱག་ལཱ་གནང་ས་ཨིནམ་དང་ རྫོང་ཁག་འདི་ནང་ལུ་ དགོན་ཁ་སྟོད་དང་ ཁ་སྨད་ཟེར་ཡོདཔ་ཨིན་མས། ས་གནས་དེ་ཁ་གི་ མི་ཚུ་གིས་འབད་བ་ཅིན་ སའི་ཆགས་ཚུལ་དེ་ ཚེ་རིང་མོའི་བཟོ་དབྱིབས་བཟུམ་སྦེ་ ཡོདཔ་ཨིནམ་དང་ བཀྲིས་མཐོང་སྨོན་རྫོང་འདི་ དེའི་བྱང་ཁོག་གུ་བཞེངས་ཡོདཔ་ཨིན་ཟེར་བཤདཔ་ཨིན་མས།
གཏམ་རྒྱུད་དང་འཁྲིལཝ་ད་ སྤྱི་ལོ་ ༡༦༡༦ ལུ་ མཐུ་ཆེན་ཆོས་ཀྱི་རྒྱལ་པོ་ ཞབས་དྲུང་ངག་དབང་རྣམ་རྒྱལ་མཆོག་ འབྲུག་ལུ་བྱོན་པའི་སྐབས་ལུ་ མགར་ས་གི་གནས་བདག་གིས་ ཞབས་དྲུང་ངག་དབང་རྣམ་རྒྱལ་མཆོག་ལུ་ ཕེབས་སུ་ཞུ་ནིའི་དོན་ལུ་ རྩ་རི་ སྐྱིད་བུ་ཐང་ལུ་སོང་ཡོདཔ་ཨིན་མས། དེའི་སྐབས་ ཞབས་དྲུང་མཆོག་གིས་ གནས་བདག་འདི་ལུ་དབང་གནང་སྟེ་ བཀྲིས་མཐོང་སྨོན་ཟེར་ མིང་གསརཔ་བཏགས་གནང་ཡོདཔ་ལས་ དེ་ལས་རྟ་དྲངས་ཏེ་ རྫོང་འདི་གི་མིང་ལུ་ཡང་ བཀྲིས་མཐོང་སྨོན་རྫོང་ཟེར་བཏགས་གནང་ནུག། མ་གཞི་ མགར་ས་རྫོང་འདི་ ནམ་བཞེངས་བཞེངསམ་ཨིན་ན་ ཏན་ཏན་ཅིག་ག་གི་ཡང་མ་ཤེས་དེ་འབད་རུང་ རྒྱལ་རབས་མཁས་པ་མང་ཤོས་ཅིག་གིས་ རྫོང་འདི་ ཞབས་དྲུང་ངག་དབང་རྣམ་རྒྱལ་མཆོག་གིས་ སྤྱི་ལོ་ ༡༦༤༨ ལུ་ ཕྱིའི་དགྲ་བྱང་ཕྱད་ཚུ་ལས་ སྲུང་སྐྱོབ་འབད་ནིའི་དོན་ལུ་ བཞེངས་ཡོདཔ་སྦེ་བཤདཔ་ཨིན་མས།
མགར་ས་རྫོང་འདི་ རྒྱལ་ཁབ་ནང་གི་རྫོང་གཞི་གཞན་ཚུ་དང་མ་འདྲཝ་སྦེ་ ཡོདཔ་ཨིན་མས། དེ་ཡང་ རྫོང་དེའི་ཕྱོགས་སོ་སོ་ལུ་ དབྱིབས་ ཐེ་སྒོར་སྒོར་སྦེ་ཡོད་མི་ ལྟ་རྫོང་གསུམ་ཡོདཔ་ཨིནམ་དང་ ཐོག་ཚད་གསུམ་འབད་མི་ དབུ་རྩེ་དེ་ ཧེ་མ་དུས་རབས་ ༡༣ པའི་ནང་ བོད་ཀྱི་གྲུབ་ཐོབ་ གཏེར་ཁུངས་པ་གིས་ མཚམས་གཅད་ཡོད་པའི་བྱག་ཕུག་དེ་འཕྲང་སྟེ་ བཀལ་ཡོདཔ་ཨིན་མས།
གཞུང་དགེ་འདུན་གྲྭ་ཚང་གི་ སྒྲ་པའི་སློབ་དཔོན་གྱི་དབུ་བཞུགས་མཛད་དེ་ དགེ་སློང་ཚུ་གིས་ ལོ་ལྟར་བཞིན་དུ་ ཟླཝ་བཅུ་པའི་ནང་ གནས་བདག་གཞི་བདག་ཚུ་ལུ་གསོལ་ཁ་ཕུལ་ནིའི་དོན་ལུ་ མགར་ས་ལུ་བྱོན་སྲོལ་ཡོདཔ་ཨིནམ་དང་ དཔལ་ཡེ་ཤེས་མགོན་པོ་མཆོག་ལུ་གུས་བསྟུད་ཞུ་ནིའི་དོན་ལུ་ ཚེས་ཉེར་དགུ་ལུ་ ཡེ་ཤེསམགོན་པོའི་གསོལ་ཁ་ཚུ་ཡང་ གནང་སྲོལ་ཡོདཔ་ཨིན།
ཧེ་མ་དུས་རབས་ བཅུ་གསུམ་པའི་ནང་ གཏེར་ཁུངས་པའི་སྐབས་ལུ་ བོན་གྱི་བླམ་མཁས་པ་གཅིག་ཡོདཔ་ཨིན་མས། ནམ་ཅིག་གི་ཚེ་ སྒྲུབ་རྟགས་ཚུ་སྟོན་པའི་སྐབས་ལུ་ བོན་གྱི་བླམ་མཁས་པ་དེ་གིས་ བྱག་དེ་གུ་ལས་ཡར་འཇམ་ཏོང་ཏོ་སྦེ་བྱོན་ཡོདཔ་ལས་ གཏེར་ཁུངས་པ་ཡང་ དེ་བཟུམ་མའི་མཛད་ཤུལ་བཟང་པོ་ལུ་གཟིགས་ཏེ་ ཐུགས་ལུ་རངས་དང་ཡིད་ཆེ་སྦོམ་སྦེ་རང་བྱུང་ཡོདཔ་ལས་ བོན་གྱི་བླམ་དེ་ལུ་ གུས་ཞབས་འབད་ཡོདཔ་ཨིན་མས།
ད་རེས་ནངས་པ་ བོན་གྱི་བླམ་དེ་ལུ་ གུས་བསྟུད་ཞུ་ནིའི་དོན་ལུ་ དཔལ་ཡེ་ཤེས་མགོན་པོ་ལུ་ གསོལ་མཆོད་ཚུ་ཕུལ་བའི་སྐབས་ བོན་གྱི་བླམ་གཅིག་གིས་ཡང་ ཁོ་རའི་ཆོས་ཕྱོགས་མཛད་སྒོའི་ན་བཟའ་ཆ་ཚང་བཞེས་དེ་ འདི་ནང་ལུ་ བཅའ་མར་གཏོགས་སྲོལ་ཡོདཔ་ཨིན་མས། མགར་ས་ ཚེས་བཅུ་དེ་ ལོ་ལྟར་བཞིན་དུ་ ཐིབ་ཕུག་ཚེས་བཅུ་དང་ འདྲན་འདྲ་སྦེ་གནང་སྲོལ་ཡོདཔ་ཨིནམ་དང་ ཚེས་བཅུ་ཉིནམ་དང་པམ་དེ་ ཕུག་ལྷ་ཁང་ནང་ལུ་སྦེ་གནང་སྲོལ་ཡོདཔ་ཨན་མས།