Вёска Траскоўшчына Краіна Беларусь Вобласць Мінская Раён Мінскі Сельсавет Шчомысліцкі Каардынаты 53°51′38,30″ пн. ш. 27°30′27,70″ у. д. Ранейшыя назвы Грыскоўшчына, Грыскаўшчызна Траскоўшчына на карце Беларусі ±

Траско́ўшчына (таксама Грыско́ўшчына) — колішняя вёска на паўднёвым захадзе Мінска, на беразе ракі Мышкі (прыток Свіслачы). З 1978 года ў складзе Мінска, цалкам знесеная.

Месцілася на паўднёвым усходзе ад Пятроўшчыны, ля сутокаў рэчак Мышкі (або Копраўкі) і Лошыцы.

Назва

Назва Траскоўшчыны адыменнага паходжання, на гэта паказвае ўжо патранімічнае афармленне —шчына.

Аснова Trask- ад антрапоніма (колішняга імя) тыпу Traskus, такое прозвішча вядомае і ў сучаснай літоўскай антрапаніміі.

Імя «Траскус» утворанае ад асновы Tras- і антрапанімічнага суфікса -k-. Гэтая ж аснова таксама ў імені Traseikis, ад якога тапонім Трасейкі (недалёка ад возера Свіцязь).

Яшчэ адна Траскоўшчына каля Ракава, на захадзе ад «мінскай», яе назва найверагодней ад імя той жа асобы.

Таго ж іменнага паходжання на тэрыторыі сучаснага Мінска і былыя вёскі Сморгаўка, Шэйпічы, Лабуншчына (у Каменнай горцы, цяпер не існуе). Існуюць балцка-літоўскія антрапонімы Smurgis, Šeipys, Bugrimas, Labūnas.

Гісторыя

У 1800 годзе вёска на левым беразе ракі Копраўка, уласнасць І. Жыжэмскага, 2 двары, 17 жыхароў, карчма. У 1858 годзе вёска Траскаўшчызна, уласнасць Н. Чарноцкага. У 1897 годзе 8 двароў, 61 жыхар^[1].

У 1917 годзе вёска Сеніцкай воласці Мінскага павета: 14 двароў, 85 жыхароў. З 1924 года ў Падгайскім сельсавеце Самахвалавіцкага раёна, з 1931 года ў адміністрацыйным падпарадкаванні Менскага гарсавета, з 1934 года ў Менскім раёне. 20 студзеня 1960 года вёска пераведзена са складу скасаванага Мядзвежынскага сельсавета ў Шчомысліцкі сельсавет^[2].

У 1978 годзе ўключаная ў межы горада Мінска^[3]. Вёска цалкам знесеная, на яе месцы прамысловая зона ў канцы вуліцы Машыністаў^[4].

Зноскі

Літаратура

• Траскоўшчына // Памяць: Гіст-дакум. хроніка Мінскага р-на / Гал. рэд. Беларус. Энцыкл.: Г. П. Пашкоў (гал. рэд.) і інш.. — Мінск: БелЭн, 1998. — 640 с.
• Тресковщина // Минск : энциклопедический справочник / Л. В. Аржаева и др.; редколлегия: И. П. Шамякин (главный редактор) и др.. — Минск: Белорусская Советская Энциклопедия, 1983. — 467 с. — 70 000 экз.
• Рапановіч Я. Н. Слоўнік назваў населеных пунктаў Мінскай вобласці / Рэд. П. П. Шуба. — Мінск: Навука і тэхніка, 1981. — 360 с.
• Сацукевіч І. І. Вёскі, што ўвайшлі ў склад Мінска. — nashapamiac.org. Архівавана з першакрыніцы 9 кастрычніка 2018.