Снег
турэцк.: Kar
Выданне
Заснежаны помнік Атацюрку ў Сарыкамышы, правінцыя Карс, Турцыя
Жанр раман
Аўтар Архан Памук
Мова арыгінала турэцкая
Дата напісання 1999 — 2001
Дата першай публікацыі 2002

«Снег» (турэцк.: Kar) — раман турэцкага пісьменніка Архана Памука. Упершыню апублікаваны на турэцкай мове ў 2002 годзе.

Апісанне

Паводле аўтара, уся кніга з’яўляецца сумессю трагедыі і фарсу, іроніі і драмы, смеху і слёз[1]. Дзеянне рамана адбываецца ў 1990-х гадах[2]. Спачатку гісторыя распавядаецца пераважна ад трэцяй асобы з пункту гледжання Ка, галоўнага героя. Нягледзячы на гэта, часам дае аб сабе ведаць і апавядальнік, які ўсё ведае. Ён прадстаўляецца сябрам Ка, што распавядае яго гісторыю на аснове дзённікаў і перапіскі Ка. Гэты апавядальнік часам дае чытачу інфармацыю, якую Ка на той момант яшчэ не ведае, ці прадвяшчае наступныя падзеі гісторыі. Пазней мы даведваемся, што апавядальніка клічуць Архан і ён з’яўляецца пісьменнікам. У канцы рамана апавядальнік сам становіцца дзеючай асобай.

Месцам дзеяння абраны горад Карс (у адрозненне ад большасці раманаў Памука, якія разгортваюцца ў Стамбуле[3]). Гэты горад не падобны да іншых турэцкіх гарадоў, бо пасля шматгадовай прыналежнасці Расійскай імперыі ён захаваў унікальную для Турцыі архітэктуру[4].

На турэцкай мове мянушка галоўнага героя Ка (утворана ад ініцыялаў яго поўнага імя, Керым Алакушоглу), горад Карс і назва рамана (турэцк.: Kar) сугучныя.

Змест

Ка — паэт, які вяртаецца ў Турцыю пасля 12 гадоў палітычнага выгнання ў Германіі. Ён адправіўся ў Карс па некалькіх прычынах: па-першае, як журналіст, па просьбе стамбульскага знаёмага журналіста для расследавання серыі самагубстваў юных дзяўчат; па-другое, у надзеі сустрэць жанчыну, якую ён ведаў. Цяжкі снег прыкладна на тры дні адразае Карс ад знешняга свету. За гэтыя тры дні Ка гутарыць з такімі людзьмі, як былы камуніст, прыхільнік свецкай улады, фашысцкі нацыяналіст, верагодны ісламскі экстрэміст, умераныя ісламскія дзеячы, маладыя курды, ваенныя, супрацоўнікі сакрэтнай службы і паліцыі, актор-рэвалюцыянер. Падчас вымушанай ізаляцыі горада ў Карсе адбываецца ваенны пераварот.

Асноўнай тэмай кнігі з’яўляецца ўзаемадзеянне секулярызма і рэлігіі, але ў рамане ёсць і адсылкі да ўсёй гісторыі Турцыі дваццатага стагоддзя. Паводле выказвання аўтара, галоўны герой апынуўся заціснутым паміж еўрапейскімі ідэаламі і рэаліямі Турцыі[5].

Узнагароды і прэміі

Зноскі

  1. ↑ La durée d’un flocon (фр.). L'Humanité (6 кастрычніка 2005). — «Tout le livre est un mélange de tragédie et de farce, d’ironie et de drame, de sourire et de larmes.»  Архівавана з першакрыніцы 23 кастрычніка 2005. Праверана 18 студзеня 2018.
  2. ↑ Buchan, James. Frozen assets (англ.). The Guardian (29 мая 2004). Праверана 12 лістапада 2017.
  3. ↑ Человек Памук (руск.). Esquire (29 сакавіка 2017). Праверана 12 лістапада 2017.(недаступная спасылка)
  4. ↑ The Russian Houses of Kars (англ.). Minor Sights (4 кастрычніка 2014). Праверана 12 лістапада 2017.
  5. ↑ Интервью Нобелевского лауреата по литературе Орхана Памука (руск.). Meduza (2 лістапада 2016). Праверана 12 лістапада 2017.

Спасылкі

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.