| Сміт | |
|---|---|
| англ. Smith | |
.jpg.webp) Гавань на востраве | |
| Характарыстыкі | |
| Плошча | 11,5 км² |
| Насельніцтва | 276 чал. |
| Шчыльнасць насельніцтва | 24 чал./км² |
| Размяшчэнне | |
| 37°59′03,50″ пн. ш. 76°02′19,80″ з. д. | |
| Акваторыя | Чэсапікскі заліў |
| Краіна | |
 | |
 Медыяфайлы на Вікісховішчы | |
Сміт (англ.: Smith) — найбуйнейшы востраў Чэсапікскага заліва. Большая частка адміністрацыйна належыць да амерыканскага штата Мэрыленд, поўдзень — да амерыканскай садружнасці Вірджынія. Плошча — 11,5 км². Насельніцтва (2010 г.) — 276 чал.
Геаграфія
Востраў Сміт знаходзіцца ў 7,8 км на захад ад узбярэжжа штата Мэрыленд. Большая частка вострава ўяўляе забалочаныя землі, злучаныя вузкімі пратокамі. У выніку эрозіі і падвышэння ўзроўню акіяна плошча сушы паступова скарачаецца. У 1922 г. пасля чарговага ўрагана было затоплена больш за палову тагачаснай тэрыторыі. У мінулым воды каля Сміта славіліся багаццем крабаў.
Гісторыя
Першаадкрывальнікам вострава лічыцца Джон Сміт, які высадзіўся на мясцовы бераг у 1608 г. і даў яму назву астравы Расэлс. Сучасную назву востраў атрымаў паміж 1659 г. і 1686 г., калі на ім апынуліся перасяленцы з Корнуала, Уэльса і Англіі. Адным з першых землеўладальнікаў быў Генры Сміт, у гонар якога нараклі ўвесь востраў. Да 1807 г. тут спыняліся піраты. Галоўным заняткам тубыльцаў здаўна з'яўляліся рыбалоўства, лоў крабаў і вустрыц.
У нашы дні на востраве Сміт існуюць тры паселішчы. Сувязь з мацерыком адбываецца толькі дзякуючы лодкам і нерэгулярнаму парому. Улады штата Мэрыленд высоўваюць праекты перасялення мясцовых жыхароў у сувязі з небяспекай затаплення, аднак сустракаюць іх адмоўную рэакцыю. Тубыльцы Сміта стварылі грамадскую арганізацыю, што збірае грошы на выратаванне сушы.
Культура
Многія жыхары вострава Сміт з'яўляюцца прамымі нашчадкамі перасяленцаў XVII ст. Яны размаўляюць на асабістым дыялекце, што сфарміраваўся ў выніку ізаляцыі.