Магл (англ.: muggle) – тэрмін з серыі раманаў пра Гары Потэра, які азначае чалавека, які не мае ніякіх здольнасцей да магіі, прычым яго бацькі таксама не маюць магічных здольнасцей. Афіцыйная назва маглаў – немагічнае насельніцтва. Магламі з’яўляецца пераважная большасць людзей, і большасць маглаў нічога не падазраюць аб існаванні чарадзейства і свету чараўнікоў. Чарадзеі, якія нарадзіліся ў сем’ях маглаў, завуцца магланароджанымі; цудадзеяў, якія нарадзіліся ў змешаных сем’ях (гэта значыць ад магла і чыстакроўнага чараўніка), завуць паўкроўкамі. Дзеці, якія нарадзіліся ў сем’ях чараўнікоў, але не маюць ніякіх магічных здольнасцей (такое здараецца вельмі рэдка), называюць сквібамі.

Дж. К. Роўлінг сцвярджае, што яна прыдумала слова «магл» на аснове англійскага слова «mug», якое абазначае чалавека, якога можна лёгка падмануць, ашукаць (разявака). У пацвярджэнне гэтага, у кнігах маглаў таксама называюць «прасцякамі». Яна дадала да гэтага слова -гл (-gle), каб зрабіць яго меней абразлівым. Слова «muggle» было дабаўлена ў 2003 годзе ў слоўнік Oxford English Dictionary, як слова, якое азначае няўмелага чалавека, якому не хапае майстэрства.