Зна́кі адро́знення — знакі на абмундзіраванні (форме адзення, форменнай вопратцы) для абазначэння персанальных воінскіх і спецыяльных званняў, класных чыноў і пасад, і прыналежнасці да віду ўзброеных сіл, роду войскаў, службе або ведамству.

Уключаюць у сябе: пагоны, эпалеты, знакі на галаўных уборах (кукарды) і на пятліцах (эмблемы), нагрудныя і нарукаўныя знакі — гаржеты, гузікі, нашыўкі, лычкі, шэўроны, канты і лампасы, іншыя элементы формы адзення (папаха, аксельбант і г. д.).

Гісторыя з’яўлення знакаў адрознення

Знакі адрознення — адзін з самых старажытных артэфактаў. На працягу ўсёй гісторыі плямёнаў існавалі асаблівыя сімвалы, якія дазвалялі адрозніць членаў аднаго роду ад іншага. Такія знакі лічыліся святымі, аказвалі нябачную падтрымку, былі свайго роду аб’яднаўчым пачаткам. Акрамя таго, знакі адрознення дапамагалі выбудаваць іерархічную лесвіцу. Пры гэтым знешні выгляд такіх знакаў кардынальна змяняўся на працягу чалавечай гісторыі.

Спачатку сімволіка была далёкая ад сучаснага фармату. Бо першыя знакі адрознення — гэта былі татуіроўкі. Акрамя таго, у розных народнасцяў у якасці знакаў адрознення выкарыстоўваліся пёры, каменныя каралі, ракавінкі і іншыя ўпрыгажэнні, якія дапаўнялі вопратку першабытных людзей.

Калі менавіта гэтыя знакі ператварыліся ў сучасныя нам пагоны, шэўроны, зорачкі і нашыўкі, сказаць складана. Але ўжо ў Старажытным Кітаі сустракаюцца першыя знакі адрознення на вопратцы. Іх насілі грамадзянскія людзі, і яны пазначалі пасады чыноўнікаў.

Прыкладна тады ж з’явіліся правобразы ваенных нашывак. Шырока вядомыя нашыўкі рымскіх легіянераў. У кожнай кагорты або падраздзялення Рымскай імперыі была свая эмблема, якая несла ў сабе вельмі важную для паплечнікаў інфармацыю. Затым такога роду апазнавальныя знакі распаўсюдзіліся па ўсёй Еўропе.

З часам знакі адрознення значна трансфармаваліся.

Так, адной з разнавіднасцяў знакаў адрознення сталі нашыўкі, якія сталі неад’емным элементам прафесійнага, карпаратыўнага і нават цалкам звычайнага адзення. Нашыўкі часта выкарыстоўваюцца ў моладзевай вопратцы. Існуе спецыяльная навука сігнуманістыка, якая займаецца калекцыянаваннем і сістэматызацыяй розных нашывак, а таксама шэраг геральдычных правілаў, паводле якіх складаюцца малюнкі на нашыўках.

Сёння складана ўявіць без тых ці іншых знакаў адрознення пэўныя віды прафесійнага і карпаратыўнага адзення, афіцыйную форму і вопратку спартсменаў і ваеннаслужачых.

Спасылкі

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.