Дразды́ — колішняя вёска на левым беразе ракі Свіслач, з 1978 года ў складзе Мінска. На поўнач ад Драздоў месціцца Зацань, на паўднёвым захадзе — Веснінка, на поўначы — Крупцы.

У цяперашні час Дразды — элітны катэджны пасёлак, у якім жывуць асобы, набліжаныя да Аляксандра Лукашэнкі.

Гісторыя

У 1917 годзе ў Сёмкава-Гарадоцкай воласці Мінскага павета; 5 двароў, 37 жыхароў. З 1934 года ў Менскім раёне^[1]. У 1930-я гады на землях Драздоў быў піянерскі лагер, а пасля гэтая зямля адышла пад дачы НКУС^[2]. У перыяд Другой сусветнай вайны нямецкая адміністрацыя стварыла ў Драздах канцлагер. На паўночны ўсход ад лагера — месца масавых пахаванняў^[1].

Пасля вайны ў Драздах размяшчаліся «дачы Саўміна», тут жылі кіраўнікі камуністычнай партыі, у тым ліку Пётр Машэраў^[2]. У 1976 годзе ля вёскі створанае вадасховішча. У 1978 годзе вёска ўключаная ў межы горада Мінска^[1].

З часу абвяшчэння незалежнасці Беларусі на былых дачах Саўміна жылі замежныя паслы. У 1998 годзе ў Драздах адбыўся дыпламатычны скандал, калі пасля разгону Вярхоўнага Савета Беларусі і рэзкай крытыкі Захаду ўрад Беларусі запатрабаваў, каб дыпламаты 22 краін вызвалілі да 10 чэрвеня свае рэзідэнцыі ў дыпламатычным гарадку ў сувязі з неабходнасцю правядзення там капітальнага рамонту; без папярэджання ў будынках пасольстваў былі адключаны электрычнасць, вада і тэлефонная сувязь. 18 чэрвеня Прэзідэнт Беларусі Аляксандр Лукашэнка абвясціў комплекс Дразды ўласнасцю ўрада і заявіў, што размяшчэнне падраздзялення марскіх пехацінцаў ЗША за 50 метраў ад яго асабістай рэзідэнцыі цалкам выключана. ЗША, Вялікабрытанія, Францыя, Германія, Грэцыя, Італія, Польшча і Японія адклікалі сваіх паслоў з Мінска ў знак пратэсту супраць парушэння Венскай канвенцыі^[3].

Часам назву «Дразды» пераносяць таксама на суседні элітны катэджны пасёлак Вясёлкавы.

Вядомыя асобы

• Зміцер Дрозд (нар. 1973) — беларускі гісторык, архівіст, публіцыст, паэт.

Зноскі

Літаратура

• Дрозды // Минск : энциклопедический справочник / Л. В. Аржаева и др.; редколлегия: И. П. Шамякин (главный редактор) и др.. — Минск: Белорусская Советская Энциклопедия, 1983. — 467 с. — 70 000 экз.
• Рапановіч Я. Н. Слоўнік назваў населеных пунктаў Мінскай вобласці / Рэд. П. П. Шуба. — Мінск: Навука і тэхніка, 1981. — 360 с.
• Сацукевіч І. І. Вёскі, што ўвайшлі ў склад Мінска. — nashapamiac.org. Архівавана з першакрыніцы 9 кастрычніка 2018.

Спасылкі

• Ягор Марціновіч. Ад Абельскай да Ярмошынай: 113 уладальнікаў катэджаў у Драздах, поўны спіс (нявызн.). Наша Ніва (11 мая 2019). Праверана 11 мая 2019.