Асетрападобныя

Сцерлядзь
Навуковая класіфікацыя
Міжнародная навуковая назва

Acipenseriformes Berg, 1940

Даччыныя таксоны

Сістэматыка
на Віківідах
Выявы
на Вікісховішчы
ITIS  161063
NCBI  7899
EOL  8300
FW  35127

Асетрападобныя (Acipenseriformes) — атрад прамянёвапёрых рыб.

Апісанне

Даўжыня ад 27 см да 9 м, маса да 2 т (бялуга). Старажытныя касцёва-храстковыя рыбы, належаць да касцявых, але таксама блізкія да храстковых рыб.

Галава выцягнута ў рыла, шчылінападобны рот знаходзіцца на брушным баку цела. Парныя плаўнікі размешчаны гарызантальна. Хваставы плаўнік з павялічанай верхняй і маленькай ніжняй лопасцямі (гетэрацэркальны), аснова верхняй лопасці ўкрыта ганоіднай рамбічнай луской. Аснова восевага шкілета — пруткая хорда (целаў у пазванкоў няма). Унутраны шкілет храстковы, на галаве скураныя косці. Чэрап пакрыты звонку накладнымі плоскімі касцямі, а на тулаве і хвасце размешчаны пяць радоў касцявых ромбападобных пласцінак (жучак) або скура голая. Прамяні шчэлепнай перапонкі адсутнічаюць. У сэрцы ёсць артэрыяльны конус, у кішэчніку — спіральны клапан.

Пашырэнне

Вядомы з ніжняй юры, сучасныя прадстаўнікі — з верхняга мелу. Падзяляюцца на 2 сямействы: асятровыя і весланосыя.

Жывуць асетрападобныя толькі ў вадаёмах Паўночнага паўшар’я, адносяцца да прахадных і азёрна-рачных відаў. Да атрада належаць асетр, сяўруга, бялуга, сцерлядзь і інш.

Асаблівасці біялогіі

Кормяцца доннымі беспазваночнымі і дробнай рыбай.

Належаць да доўгажывучых рыб. Ікру адкладваюць не кожны год.

Промысел і развядзенне

Гэта каштоўныя прамысловыя рыбы, якія даюць чалавеку высакаякаснае мяса і чорную ікру. У нізоўях вялікіх рэк, дзе жывуць асетрападобныя, дзейнічаюць рыбагадавальнікі, якія штогод выпускаюць у вадаёмы малявак рыб.

Літаратура

  • Асетрападобныя // Беларуская энцыклапедыя: У 18 т. Т. 1: А — Аршын / Рэдкал.: Г. П. Пашкоў і інш. — Мн. : БелЭн, 1996. — Т. 1. — 552 с. — 10 000 экз. — ISBN 985-11-0035-8. — ISBN 985-11-0036-6 (т. 1).
  • Біялогія: вучэб. дапам. для 8-га кл. агульнаадукац. устаноў з беларус. мовай навучання / Л. В. Камлюк, А. С. Шалапёнак; пер. з рус. мовы Г. І. Кулеш. — 3-е выд., дап. — Мн.: Нар. асвета, 2010. — 222 с.: іл. ISBN 978-985-03-1367-6.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.