Wenceslao Retana

Si Wenceslao Emilio Retana y Gamboa ( ? 1862 - Enero 21 1924) sarong Espanyol na administrador kolonyal, parasurat, historyador, parapalagda', paradamot nin mga libro, asin maogid na paraadal kan mga bagay na Filipino. Nabantog siya komo saro sa pinakasangkap na kolektor nin Filipiniana.

Wenceslao E. Retana
Kamundagan	1862
Kagadanan	1924
Iba pang mga ngaran	W.E. Retana
Trabaho	Parasurat, Filipinolohista

Namundag siya sa probinsya nin Madrid sa lugar na inapod Boadilla del Monte kan taon 1862. Nag'adal siya na magin sarong inhinyero militar duman sa Guadalajara.

Dangan kaidto nagin siyang halangkaw na opisyal sa Ministerio de la Gobernacion. Kan taon 1884 natoka siya sa Filipinas komo sarong opisyal sa pinansya sa Batangas.

Naagom niya si Dona Adela Ramirez de Arellano, aki nin sarong distinguidong pamilya sa Manila. An mag'agom nagkaigwa nin walong aki, apat na babae, apat man na lalake. Saro sa aki niya iyo si Alvaro Retana, na ngapit nagin bantogan na baklang parasurat sa Espanya.

Huli sa helang sa puso, buminalik siya sa Espanya kan taon 1890. Duman nanombrahan siya sa iba-ibang katongdan sa gobyerno. Nagin siyang sekretaryo kan International Congress of American Scholars asin sekretaryo kan Congress of Geographic Orientalist of Madrid. Laen pa kan mga katongdan niya sa gobyerno, si Retana nagin aktibong gayo bilang peryodista, editor asin correspondent. Sa siring na opisyo, nagsirbe siya sa La Voz Española, asin Heraldo de Madrid, editor kan La Oceanía Española, katuwang na editor kan La Opinión, correspondent kan La España Oriental asin El Porvenir de Bisayas, La Política de España en Filipinas, La Época, El Nacional, La España Moderna, Nuestro Tiempo, Raza Española, Boletín de la Academia de la Historia, La Política Moderna, asin kan Guttemberg (1904). An saiyang tagong-pangaran "Desengaños".

Siya nagsurat manongod haros gabos na aspeto kan buhay Pilipino, magin man sa pulitika, relihiyon, arte asin kultura. Mala ta arog kahiwas an saiyang adal , an kabantogan niya lakop nanggad sa kinaban na sinasabi gayod segunda sana ki Ferdinand Blumentritt. Kan Oktubre 13, 1922 naako siya bilang kaapil sa Real Academica de Historia. Sa saiyang kayaman na buhay, nagin pa siyang diputado sa Espanyol na Cortes, hepe kan polisya sa Barcelona, asin gobernador sibil nin duwang probinsya sa Espanya.

Igdi sa Kabikolan, an obra niyang Archivo del bibliofilo filipino dakula na gayo an papel sa lantad nin kultura ta iyo ini an nagdara asin igdi nadukayan an epikong Ibalong na ilinakip ni Jose Castaño sa saiya man na obra, an Breve noticia acerca del origen, religion, creencias y supersticiones de los antiguos Indios del bicol.