Kalye Peñafrancia

An Kalye Peñafrancia sarong tinampo namomogtak sa siyudad nin Naga, Camarines Sur, Filipinas. Kan panahon kolonyal, an lansangan na ini inaapod na Via Gainza. Magkapirang tinampo man an nasaranga igdi. Sa poro kaini nasumpay an tinampo kan San Felipe. An Kalye Liboton, ngonyan inapod nang M.T.Villanueva Ave. nasanga pawala. Siring man an Magsaysay Avenue nasanga igdi patoo. Dakul pang mga tinampo na nasaranga igdi arog kan mga tinampo sa solar na dati sadiri kan Mitra (Simbahan Katoliko) asin an mga ini pasiring pampang kan Salog Naga, arog halimbawa kan Eskinita Santiago, Eskinita San Jose, asin iba pa. Pag'abot sa tongod kan Unibersidad de Sta. Isabel nasanga man an Kalye Santonja patoo. Tapos sa enotan pa, ini an mga surunod-sunod na nakabit sa kalyeng ini: an Kalye Paz, Kalye Dimasalang, Kalye P. Diaz , Kalye Arana, Kalye P. Burgos, Kalye Prieto asin an Kalye Caceres sa poro na nanggad.

An Kalye Peñafrancia (pasiring San Felipe)
An Kalye Peñafrancia (pasiring sentro)
An mapa kan Naga

Nagaatubang sa kalyeng ini an Simbahan nin San Francisco asin an monumento para sa Kaglimang Martir kan Bicolandia.

An nagpagibong pinakaenot kaini iyo si Rektor Santonja sa orden ni Obispo Francisco Gainza kaya nangaran ki Obispo Gainza an kalye. Nagin ining Kalye Peñafrancia sa ri'gon kan sarong ordinansa pinanday kan Enero 29, 1954. [1]

Hilinga man

Toltolan

  1. Ordinance No. 1954-132 Archived 2011-02-23 at the Wayback Machine.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.