Gil L. Gregorio

Nagpoon an pagsurat niya sa lengguwaheng Bikol kan saiyang pinunan asin natapos na palison an tolong estandarteng Ingles na libro kan An Simbahan ni Jesukristo nin Mga Banal sa Huring-Aldaw: An Libro ni Mormon, Doktrina asin Mga Tipan, asin an Perlas nin Dakulang Kahalagahan. Habang saiyang pinagpalis an mga tataramong Ingles sa Bikol nagkaigwa siya nin dakulang kamawotan na makapaggibo nin rawitdawit na kaidto bako pang gayo pamilyar na gibohon niya.

An pinaka-enot niyang rawitdawit sa Bikol iyo an Buhay Paraoma na an inspirasyon naguno sa mga amigo niyang mga paraoma sa San Jose, Camarines Sur asin man nin huli sa imbitasyon ni Irvin Sto. Tomas na iyo an pangenot na nagpupublikar kan An Tambobong nin Literaturang Bikolnon. An ikaduwa iyo an Panyong Sinublian na ipinagpublikar man sa libro na may titulong, Sagurong: 100 na Kontemporanyong Rawitdawit sa Manlain-lain na Tataramon Bikol.[7] An duwang rawitdawit na ining naipublikar iyo an nakapagtao saiya nin dakulang inspirasyon tanganing ipagpadagos niya an pagsurat sa lengguwaheng Bikol. Madahomon an lengguwaheng Bikol asin dakula an saiyang kangangalasan kan saiyang madiskubre na garo baga kadikiton sana an igwa nin interes na mga Bikolano na magbasa kan sadiri nindang mga literatura.

Nagpoon siyang maghanap nin mga kapwa parasurat asin nakanagbo siya sa mga persona ninda Ramon Olano Jr. asin Irvin Sto. Tomas na mga miyembro kan Sumaro Bikolnon. Si Irvin Sto. Tomas man an nakapag-agyat saiya na magin kaayon sa Wikimedia Philippines, Inc. [8] Kaya an taon 2010, iyo an kapinonan kan pagsurat niya nin rawitdawit o mga prosa asin mga saysay sa lengguwaheng Bikol na pinagkaag niya sa saiyang mga Bikol na blog, asin sa pagsurat niya sa sadiring lengguwahe, pinaghingoha niya na magin siring sa Filipino (Tagalog) an espeling o letra kan mga tataramon na tanganing magin sayon ini sa mga parabasa. Iyo ini an estilo na gusto niyang paurogon sa gabos niyang isinusurat sa Bikol.

May nagkapirang tigsik naman siyang sinurat na saiyang pinagpublikar sa saro niyang online blog. An mga titulo iyo an mga minasunod:

• Sutil-sutilon
• Helmet...Anggot...Barkada

An tolo [18] kan saiyang mga naggibong mga rawitdawit sa Ingles an napili kan International Selection Committee of the International Library of Poetry bilang sertipikadong semi-finalist sa Monthly International Open Poetry Contest kan mga bulan nin Mayo asin Abril 2002 na iyo an mga minasunod:

• The Windowless Shop (April 2002)[19][20]
• The Prized Pendulum (May 2002)[21][22]
• The Ring Not Her Own But Hers (May 2002)[23][24]

Igwa man siyang nagkapirang mga rawitdawit sa Ingles na pinagpublisa kan The Poet Sanctuary [25] antolohiya na may titulong Muses of the Snow[26] kan Nobyembre 18, 2003 dangan The Blossoms of Creativity [27] na pinagpublisa kan Disyembre 28, 2004. Alagad dae siya nakabakal kan duwang antolohiyang ini nin huli sa pinansyal na kadaehan.

An Ingles niyang rawitdawit na may titulong What is Love? Nakapublisa man ini sa librong A View from Afar Off: A Poetic Legacy from Heaven (ISBN: 0-9775954-8-X/13 Digit ISBN: 978-0-9775954-8-8) under Carpe Diem Publishing Company, South Australia pinagpublisa man kan antolohiya nin rawitdawit Blg. 7 kan Voicesnet International Poetry Publishing.[28]

Siya nanombraran bilang saro sa kinseng Writing Fellows kan nakaaging 8th Juliana Arejola-Fajardo Workshop sa Pagsurat-Bikol na may temang, Mapping the Literary Terrain of Kabikolan,na ginibo kan Abril 10-13, 2012 sa Ruby Hall, Crown Hotel, sa siyudad nin Naga. An workshop ginibo na yaon sa lindong kan National Commission for Culture and the Arts (NCCA) na pinapangenotan ni Carlo A. Arejola bilang Convernor/Workshop Director asin Priscilla S. Macansantos, Ph.D. bilang Chair kan National Committee on Literary Arts. [29]

An mga minasunod na rawitdawit iyo an saiyang pinagsumite bilang entra sa workshop:

• Gurukgutok, Pughak, Bunga nin Hugak
• Kalinturang Bangag
• Sipngang Pamukaw, Paimbong
• Paghikos(nin Tataramong Busay)
• Giyera sa Tuprik nin Laway

• Ikatolong puwesto sa bulanan na Gawad Obrang Literaturang Bikolnon [30] an saiyang entra sa Saysay na may titulong "Ebenezer, ano baya an lunyang nin sarong tunay na Parasurat?".