Biktima

Kabali sa isinumite para sa Ikaduwang Saringsing: Paghimukat nin mga Obrang Literatura na ginibo sa Palestina, Pili, Camarines Sur

Maamay kang napagmata sa tinoraok nin manok,

senyal nin kaomagahon asin pagbuhat kaidto pa.

Aram ko na pinirit mong magin obligasyon ini sa sadire,

Ta sabi kan doctor kaipuhan mong mag-ehersisyo;

Mala ngani, sa gabos na panahon pirme sana ikang nakasakay

Sa motorsiklo o sa karag-karag na lumang awto mo.

An mga gugurang nagsasabi na maglakaw o magdalagan,

Magpagan-ot nin todo maski paminsan-minsan man lang.

Pirmeng giromdomon na an ehersisyo magin regular na bisyo,

Tanganing mawaraan ka nin takot na daogon

an estrok o hayblad, o delikadong atake sa puso.

Alagad hilinga baya an iba, sa hugak na kaantabay,

Habong mag-ehersisyo, an taba an mas gusto;

Sa isip ninda pampagabat sa hawak o pampadakula

Mas kursunada an bilbil, paghuna maskulado na.

Sa pagkaudto, matapos magkakan hapihap an tulak ninda,

Sa kabasugan naghihikab aba anang siram baga!

Nakahiling sa duyan, yaon sa isip siyestang hapon na.

Orog na kun maparos, malimpoy sa irarom nin kahoy

Mahukgragong na turog, maribok sa pag-iriba,

An mga nanok na langaw napagmata, nagpipiyesta

sa wagak na laway na nagtotoro gikan sa ngiwi ninda.

Uya man an amigo kong apod kan barkada si Taba,

An ehersisyong kapon mala ngani imbento niya daa:

Kadikit na lakaw-lakaw, pagan-ot, karigos, higda,

turog, mata, iyo an regular na opisyo niya,

tamang-tama na preparasyon sa irinoman, sabi niya.

Dae siyang labot sa agom o ake niyang gurutom na,

Basta, habang makusog pa daa, sige sana mag-orogma kita,

Ta noudma malay mo, an gabos na ini magka-urubos na;

Sa langit mayong inomong tuba, gin, wiski o brandi, aram ta

Mas maray digde sa daga magbuburat kesa langit na ika gadan,

An inomon siyertong init sa lalamunan, pampabuhay nin daghan!

Alagad, sarong aldaw an mga barkada nagngangalas mayo siya,

Sa dating iribahan, nagkukulang an maribok, mamondoon baga;

Impit an estoryahan, maluluya, may nagluluha pa,

Ta ini si Taba na padaba ninda, mala nakahigda na,

Nakapirong an mata sa kahon na an salamin itso-diretsohan na.

Sabi kan gurang: Mga Nonoy, uya, nahihiling nindo na,

An bunga nin mga bisyo, pampaamay na pagturog sa buhay ta,

Kun ika mas paorog an barkada, lingaw ngonyan sa pamilya,

Isip-isipa baya, nonoy, hilinga si Taba na saindong barkada

Sa kadunungan nin isip sa paghuna niya, nagin biktima!