Yusif bəy İbrahimli

Yusif bəy İbrahimli (1883, Keşlə – may 1920, Sığnaq qəzası) ― azərbaycanlı siyasətçi, Müsavat partiyasının mərkəzi komitəsinin katibi.

Yusif bəy İbrahimli
Yusif Ağaqulu oğlu İbrahimli
Doğum tarixi
Doğum yeri Keşlə kəndi, Bakı, Bakı quberniyası
Vəfat tarixi
Vəfat yeri
Vəfat səbəbi öldürülüb
Dəfn yeri naməlum
Dəfn tarixi naməlum
Fəaliyyəti siyasətçi
Partiyası Müsavat Partiyası

Həyatı

Yusif Ağaqulu oğlu İbrahimli 1883-cü ildə Bakının Keşlə kəndində anadan olub[1]. Mollaxanada və mədrəsədə təhsil alaraq burada türk, ərəb, fars və rus dillərini öyrənib. 1900-cü ildə Bakıda açılmış Politexnik Sənaye məktəbini bitirib. Əvvəlcə Mantaşovun daha sonra isə Şibayevin neft emalı zavodlarında fəaliyyət göstərib. Tezliklə burada mühəndis operator vəzifəsinə yüksəlib[2].

1911-ci ildə Bakıda gizli şəkildə qurulmuş Müsavat partiyasının ilk üzvlərindən olub. 1913-cü ildə Məmməd Əmin Rəsulzadə Bakıya geri qayıtdıqdan sonra Müsavat partiyasının mərkəzi komitəsinin sədri seçilir[3]. Müsavat Partiyası mərkəzi komitəsinin katibi seçilir[4].

1917-ci il oktyabrın 26–31-ə qədər Bakıda, "İsmailiyyə" binasında keçirilmiş Müsavat partiyasının ilk qurultayında və 1919-cu il dekabrın 2-dən 12-dək davam edən Müsavat partiyasının II qurultayında iştirak edib[2].

Aprel işğalından sonra 1920-ci il may ayında Nəsib bəy Yusifbəyli ilə birlikdə Gürcüstana getmək üçün Bakıdan yola çıxıblar[5]. Yevlaxda ayrılaraq hərəsi fərqli istiqamətlərdə Gürcüstana doğru yol alıblar. Yusif bəy İbrahimli Sığnaq qəzasında naməlum şəxslər tərəfindən güllələnərək öldürülüb. Ehtimallara görə o da Nəsib bəy Yusifbəyli kimi bolşeviklər tərəfindən öldürülüb[6].

Ailəsi

Yusif bəy İbrahimlinin dörd qardaşı, bir bacısı olub[2]. Kiçik qardaşı Bəhram 1918-ci ildə Mart soyqırımında ermənilər tərəfindən öldürülüb. 1937-ci ildə qardaşı Sabit İbrahimli, əmiləri və əmisi uşaqları sürgün olunublar[2].

1912-ci ildə Ziba Əmrah qızı ilə ailə qurub. Bu evlilikdən iki qızı bir oğlu olub. Həyat yoldaşı Ziba Əmrah qızı 1960-cı ildə dünyasını dəyişib[2].

Xatirəsi

Azərbaycan müstəqilliyini bərpa etdikdən sonra Bakıdakı Çiçerin küçəsinin adı dəyişdirilərək Yusif bəy İbrahimli küçəsi adlandırılıb və burada onun barelyefi quraşdırılıb[7][8].

İstinadlar
  1. Məmməd Əmin Rəsulzadə. "İbrahimli Yusuf". Odlu Yurd. İstanbul. 1929-04-27. 112.
  2. Hafiz Sadıqov. "Yusif bəy İbrahimli kimdir?". Novruz. Bakı. 12 March 1991. 7.
  3. Nəsiman Yaqublu. Məhəmməd Əmin Rəsulzadə ensiklopediyası. Bakı: Kitab Klubu. 2013. səh. 23. ISBN 978-9952-8202-2-5. 2023-03-01 tarixində arxivləşdirilib. İstifadə tarixi: 2023-03-01.
  4. Müşfiqə. "Küçəniz kimin adınadır?" (az.). yeniazerbaycan.com. 2021-09-21. 2023-03-01 tarixində arxivləşdirilib. İstifadə tarixi: 2023-03-01.
  5. Sevda İsmayıllı. "'100-ə nə qaldı?': Cümhuriyyət nazirləri: Nəsib bəy Yusifbəyli [5-ci yazı]" (az.). Azadlıq Radiosu. 2013-01-23. 2022-05-22 tarixində arxivləşdirilib. İstifadə tarixi: 2023-03-01.
  6. Qoşqar Salmanlı. ""Mənim balaca xalqımın böyük ürəyi var, bu xalq kiməsə qul olmağa razılaşmaz"" (az.). alp.az. 2021-08-04. 2023-03-01 tarixində arxivləşdirilib. İstifadə tarixi: 2023-03-01.
  7. Qara Məşədiyev. Bakı küçələri: adlar və talelər. Bakı: Elm . 2013. səh. 39.
  8. "Старые наименования улиц и площадей Баку". 2022-09-13 tarixində arxivləşdirilib. İstifadə tarixi: 2023-03-01.

Xarici keçidlər
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.