Sakit Yaqubov

Sakit Məmədi oğlu Yaqubov 01 iyul 1953-cü ildə Saatlı rayonunun Məzrəli kəndində anadan olmuşdur. 1969-cu ildə D.Bünyadzadə adına Azərbaycan Xalq Təsərrüfatı İnstitutunun əyani şöbəsinə daxil olmuş, 1973-cü ildə həmin İnstitutu "Statistika" ixtisası üzrə bitirmişdir.

1973–1974-cü illərdə həqiqi hərbi xidmətdə olmuşdur.

1975–1977-ci illərdə Azərbaycan SSR Mərkəzi Statistika İdarəsinin (İndiki Dövlət Statistika Komitəsi) "Kənd təsərrüfatı statistikası" şöbəsində iqtisadçı, baş iqtisadçı və müdir vəzifələrində çalışmışdır.

1977–1980-ci illərdə D.Bünyadzadə adına Azərbaycan Xalq Təsərrüfatı İnstitutunun "Statistika" kafedrasının aspiranturasında əyani təhsil almış və 1980-ci ildə Moskva İqtisadi-Statistika İnstitutunda (Московский Экономико- Статистический Институт) "Statistika" ixtisası üzrə namizədlik dissertasiyası müdafiə etmişdir.

1980–1990-cı illərdə D.Bünyadzadə adına Azərbaycan Xalq Təsərrüfatı İnstitutunun və Leninqrad Maliyyə-İqtisad İnstitutu Bakı filialının "Statistika" kafedrasında müəllim və baş müəllim vəzifələrində çalışmışadır.

1990–1993-cü illərdə Moskva İqtisadi-Statistika İnstitutunun doktoranturasında əyani təhsil almış və 1993-cü ildə həmin institutda "Statistika" ixtisası üzrə doktorluq dissertasiyası müdafiə etmişdir.

1993–2000-ci illərdə Azərbaycan Dövlət İqtisad İstitutunun "Statistika" kafedrasında professor vəzifəsində çalışmışdır.

2000-ci ilin iyul ayından 2017-ci ilin sentyabr ayına qədər Azərbaycan Dövlət İqtisad Universiteti "Statistika" kafedrasının müdiri, 2017-ci ilin sentyabr ayından 2018-ci ilin fevral ayına qədər "Statistika və ekonometrika" kafedrasının müdiri vəzifəsində işləmişdir.

2014-cü ilin oktyabr ayından 2018-ci ilin fevral ayına qədər eyni zamanda Azərbaycan Dövlət İqtisad Universitetinin "Elm və İnnovasiyalar Mərkəzi"nin direktoru vəzifəsində çalışmışdır.

2018-ci ilin fevral ayından 2021-ci ilin oktyabr ayına qədər Azərbaycan Dövlət İqtisad Universitetinin Elm və İnnovasiyalar üzrə prorektoru vəzifəsində işləmiş, 2021-ci ilin oktyabr ayından Elm üzrə prorektor vəzifəsində çalışır.

Statistikanın aktual problemlərinə həsr olunmuş, ümumilikdə 130 ç.v. həcmində 120 elmi-metodiki əsərin, o cümlədən 2 monoqrafiya, 8 dərslik və dərs vəsaitinin müəllifidir. 20-dən çox elmi məqaləsi xarici ölkələrdə dərc olunmuşdur.

Onun rəhbərliyi ilə 1 nəfər elmlər doktorluğu, 20 nəfər fəlsəfə doktorluğu dissertasiyasını müdafiə etmişdir.

2002–2004-cü illərdə Azərbaycan Respublikası Prezidenti yanında Ali Attestasiya Komissiyasının Ekspert Şurasının üzvü, 1994–2014-cü illərdə müxtəlif ixtisaslaşdırılmış Dissertasiya Müdafiəsi Şuralarının üzvü, 2015–2016-cı illərdə Azərbaycan Dövlət İqtisad Universitetində fəaliyyət göstərən Dissertasiya Müdafiəsi Şurasının sədri olmuşdur. Hazırda Azərbaycan Dövlət İqtisad Universitetində fəaliyyət göstərən Dissertasiya Müdafiəsi Şurasının üzvüdür.

2005-ci ildən Azərbaycan Respublikası Dövlət Statistika Komitəsi yanında "Statistika Şurası"nın üzvü və 2015-ci ildən Dövlət Statistika Komitəsinin "Statistika xəbərləri" elmi-praktiki jurnalın baş redaktorudur.

O, hazırda Azərbaycan Respublikasında "Statistika" ixtisası üzrə yeganə elmlər doktoru, professordur.

• Heyvandarlığın inkişafının iqtisadi problemləri. Monoqrafiya, Bakı, Azərnəşr, 1986, 8.1 ç.v.
• 1990–2000-ci illərdə Azərbaycan iqtisadiyyatı: inkişaf meyli, strategiyası və problemləri. Monoqrafiya, "X.K.B. və poliqrafiya". Bakı, 2001, 10.8 ç.v.
• Əhali statistikası. Dərs vəsaiti. ADİU nəşriyyatı, Bakı 2002, 12.5 ç.v.
• Maliyyə və bank statistikası. Dərs vəsaiti, ADİU nəşriyyatı, Bakı 2006, 10.5 ç.v.
• Sosial-iqtisadi statistika. Dərs vəsaiti, ADİU nəşriyyatı, Bakı 2006, 15 ç.v.
• Sosial-iqtisadi statistika. Dərslik, ADİU nəşriyyatı, Bakı 2011, 25 ç.v.
• Statistika. Dərslik, ADİU nəşriyyatı, Bakı 2015, 37 ç.v.
• Пути преодоления экономического кризиса и роль статистики в принятии решений: опыт Азербайджана. Жур. "Статистика Украины" 2017, № 3.
• Əhali statistikası. Dərs vəsaiti. İqtisad Universiteti nəşriyyatı, Bakı 2022, 15,0 ç.v.
• Məlumatlar elmi. Dərs vəsaiti. UNEC nəşriyyatı, Bakı 2023, 21,5 ç.v.