Leave Me Alone

“Leave Me Alone” mahnısı Cekson haqqında mətbuatda tez-tez yayılan neqativ və saxta məlumatlara, həmçinin 1986-cı ildə “Thriller” albomunun qazandığı uğurdan sonra yayılmış tabloidlərə cavab olaraq nəzərdə tutulmuşdu.[1] 1986-cı ildən etibarən tabloidlərdə Cekson haqqında saxta məlumatlar yayılmağa başlayır, onlardan birində Ceksonun qocalma prosesinin qarşısını almaq üçün hiberbarik oksigen otağında yatması qeyd edilirdi. Mətbuata sızmış şəkildə Ceksonun xəstəxanada hiperbarik oksigen qutusunda uzanması görünürdü. Əslində isə foto Ceksonun maraq üçün kameranı yoxladığı zaman naməlum şəxs tərəfindən çəkilmişdi.

Cekson Babls adlı şimpanzeni evində saxlamağa qərar verdikdə isə, media bunu onun reallıqdan uzaqlaşmasının sübutu kimi təqdim etmişdi.[2] Başqa bir məlumatda isə Ceksonun “Fil adam” kimi tanınan Cozef Merrikin sümüklərini aldığı bildirilsə də, cekson açıqlamasında bunun “tamamilə yalan” olduğunu bildirmişdi.[2][3] Məhz bu məlumatla əlaqədar Ceksona bir müddət "Wacko Jacko" ləqəbi verilmişdi ki, bu da müğənninin heç xoşuna gəlmirdi. Medianın tez-tez gündəmə gətirdiyi digər bir məsələ isə Ceksonun plastik əməliyyatlar keçirməsi ilə bağlı idi. Ceksonun meneceri bu mövzu ilə bağlı mediada yayılmış məlumatları tənqid edərək qeyd edirdi ki, “Həddən artıq qorxunc məlumatlar yayılır. Ok, o burunun formasını dəyişib. Sizə bir məlumat verim, mənim burnum beş dəfə sınıb və iki dəfə formasını dəyişib. Niyə heç kim heç nə demir? Kimə nə dəxli var? Elvis də burnunu dəyişmişdi. Merlin Monro burnunu və döşlərini dəyişmişdi. Hər adam harasınısa dəyişir.”[4]

Mahnıda Ceksonun əvvəlki albomlarında tez-tez müraciət etdiyi “paranoya mövzusu”na da toxunulub.[5] “The Atlantic”də qeyd edilir ki, mahnıda Cekson “açıq inamsızlıq nümayiş etdirir” və bu mahnı Ceksonun “daimi yalnızlığının əks etdirildiyi” nadir mahnılardan biridir.[6] 2009-cu ildə “Rolling Stone” jurnalından Edvard Keyes yazır ki, “ “Leave Me Alone” “vintaj Maykl” kimi səslənir və mahnının uğurunun səbəbi onun qalın akkordlarıdır.” Keyes qeyd edir ki, mahnı sanki “The Way You Make Me Feel” mahnısının qaranlıq inversiyasıdır, “Leave Me Alone” mahnısı üzərində çalışarkən müğənni qəzəbli olub və yüksək notlar Ceksonun ürək qırıqlığını əks etdirir.[7]

Mahnı müasir musiqi tənqidçiləri tərəfindən əsasən yaxşı qəbul edilmişdir. “Allmusic” yazarı Stefan Tomas Erlvayn qeyd edir ki, “Leave Me Alone” mahnısının “Bad” albomundakı ən yaxşı mahnı olduğunu hiss edir və bildirir ki, “niyə onun ən yaxşı mahnıları paranoya himni kimi səslənir?”[5] “The Boston Globe”dan Stiv Morza qeyd edir ki, “Leave Me Alone” Ceksonun “paparazzilərlə dolu tabloidlərə” cavabıdır.[11] “The New York Times”dan Con Parales isə bildirir ki, “Leave Me Alone” “açıq mesajdır”.[12] 2009-cu ilin iyununda Ceksonun vəfatından sonra “Rolling Stone” jurnalı “Leave Me Alone” mahnısını Ceksonun monumental işləri sırasına daxil etmiş və yüksək qiymətləndirmişdir.[7]

“Leave Me Alone” bir çox hit-paradlara daxil olmuşdur. Mahnı ABŞ və Kanada xaricində də sinql kimi stışa çıxarılmışdır. “Bad” albomundan çıxarılmış əvvəlki sinqllar kimi bu sinql da beynəlxalq uğur qazanmışdır. “Leave Me Alone” üçün ən uğurlu ərazi hit-paradda birinci yerə yüksəldiyi İrlandiya olmuşdur.[13] Oxşar şəkildə Birləşmiş Krallıq, Niderland, Norveç və İsveçrədə də uğur qazanan mahnı iki, beş, altı və onuncu yerlərə kimi yüksələ bilmişdir.[14][15] Avstriya, Fransa və İsveçdə ilk iyirmiliyə daxil olan mahnı 15, 17 və 19-cu pillələrə kimi yüksələ bilmişdir.[14] Sinqlın ən zəif göstəricisi Avstraliyada qeydə alınmışdır. Bu ölkədə “Leave Me Alone” otuz yeddinci yerdə qərarlaşmışdır.[16]

"Maykl hiperbarik oksigen otağında yatır" sərlövhəsini oxunduğu qəzet. Mayklın hiperbarik oksigen otağında yatması haqqında şaiyə (müğənni bunun yanlış məlumat olmasını açıqlamışdı) onun şüşə qutuda uzanmış şəklinin mediaya sızmasından sonra yayılmışdır.

Cim Blaşfildin rejissorluğu, Blaşfild və Pol Dinerin prodüserliyi ilə çəkilmiş “Leave Me Alone” musiqi videosu 2 yanvar 1989-cu ildə çıxarılmışdır.[17] Mahnı həm də 1988-ci ildə çıxarılmış “Ay yürüşçsü” filmində istifadə olunmuşdur.[18] Əslində video Ceksonun 1982-ci il “Thriller” albomundan sonra qazandığı uğurları əks etdirən mövzulu əyləncə parkı xarakteri daşıyır. Əsasən Cekson haqqında tabloidlərdə yayılan məlumatların diqqət mərkəzinə alındığı videoda, medianın 1980-ci illərdə müğənniyə verdiyi "Wacko Jacko" ləqəbinə də toxunulur.[19] Ceksonun Cozef Merrikin sümüklərini alması haqqında yayılmış əsassız şaiyələri göstərmək üçün musiqi videosunda müğənni sümüklərlə rəqs edir.[19] Məhz bu səhnə (sümük təsvirləri olmadan) sinqlın üz qabığında istifadə olunmuş, sümüklərsiz videofraqment isə “Moonwalker” filmində istifadə olunmuşdur.

Videoda həyatda Ceksonla yaxın dost olmuş aktrisa Elizabet Teylorun fotosundan da istifadə edilmişdir. Klip boyu “Mayklın kosmos-yaşlı dietası”, “Maykl Lizə təklif edir” kimi “National Intruder” tərəfindən Cekson haqqında nəşr edilmiş məqalələrin sərlövhələri göstərilir. Musiqi videosunun digər bir məşhur səhnəsi isə burun və skalperin təsvir edildiyi səhnədir ki, bununla da rejissor müğənninin plastik əməliyyat keçirməsi haqqında kütləvi mətbuatda yayılmış çoxsaylı tənqidlərə işarə etmişdir. Videonun sonunda məlum olur ki, nəhəng Cekson özü böyük bir əyləncə parkıdır. O, parkı parçalayaraq ayağa qalxır. Bu səhnə “Qulliverin səyahəti”ndən Qulliverin Liliputların kəndirlərini qıraraq azadlığa çıxmasını xatırladır.[20] Video “Michael Jackson's Vision” və “Bad 25” video-məcmuələrində satışa çıxarılmışdır.

“Leave Me Alone” müxtəlif mükafatlara nominant göstərilmişdir. 1990-cı ildə XXXII Qremmi mükafatlarının təqdim edilməsi mərasimində musiqi videosu “Ən Yaxşı Qısa Musiqi Videosu” nominasiyasında mükafata layiq görülmüşdür.[21] Video 1989-cu il MTV Video Musiqi Mükafatlarının təqdim edilməsi mərasimində altı nominasiyada mükafata layiq görülmüşdür: İlin videosu, İzləyicilərin seçimi, Nailiyyətli video, Ən Yaxşı montaj və Ən Yaxşı quruluşçu rejissor. Lakin video, yalnız Ən Yaxşı xüsusi effektlər nominasiyasında qalib ola bilmişdir.[22] Digər nominasiyalarda isə Nil Yanqın “This Note Is for You” (İlin videosu), Art of Noise qrupu (Nailiyyətli video), Paula Abdul (Ən Yaxşı montaj), Madonnanın “Express Yourself” (Ən Yaxşı operator işi və Ən Yaxşı quruluşçu rəssam) və “Like a Preyer” (İzləyicilərin seçimi) mahnılarına məğlub olmuşdur.[22] Erlvayn musiqi videosunu “daha çox klausttrofobik” kimi təsvir edir və “Bad” albomundan olan “ən yaxşı musiqi videosu” olduğunu bildirir.[22]

• Sözlər, musiqi, vokal sintez, solo və fon vokal - Maykl Cekson
• Prodüser - Kuinsi Cons
• Prodüser köməkçisi - Maykl Cekson
• Zərb alətləri proqramlaşdırıcısı və sintezotor - Larri Vilyams
• Gitara - Pol Cekson
• Sinklavyer, sintezator proqramlaşdırıcısı - Keysi Yanq
• Ölçü verici - Qreq Fillinceyns
• Ritm və vokal aranjimanı - Maykl Cekson

• "Leave Me Alone" — YouTube