Hörümçək-adam 3

Piterin indi ən vacib öyrənməli olduğu şey qisasçı və ya qəhrəman kimi qırmızı və göy kostyumunu geyib hər cinayətkarı ədalətə təslim edərkən əslində Ben əminin ölümü haqqında keçirdiyi günahkarlıq hissinin əvəzini çıxmağa çalışır. O, yaxaladığı cinayətkarlardan fərqli olaraq özünü qəhrəman və ya günahsız şəxs hesab edir. Biz düşündük ki, onun həyatın ağ-qara tərəfini və bu insanlardan yuxarıda olmadığını öyrənməsi böyük şey olardı".

"Hörümçək-adam 2" filminin iyun ayında buraxılmasından öncə, 2004-cü ilin mart ayında "Sony" şirkəti 2007-ci ilin yayı üçün "Hörümçək-adam 3" filmi üzərində işləməyə başlamışdır.[15] "Hörümçək-adam 2" filminin buraxılmasından sonra "Hörümçək-adam 3" üçün buraxılış tarixi 2 may 2007-ci il seçilmişdir.[16] Daha sonra bu tarix 4 may 2007-ci il olaraq dəyişdirilmişdir. 2005-ci ilin yanvarında "Sony Pictures Entertainment" şirkəti əvvəlki filmin ssenaristi Alvin Sarcentlə müqavilə imzalayaraq 3-cü filmin, eləcə də, potensial 4-cü filmin ssenarisini yazması barədə razılığa gəlmişdir.[17]

"Hörümçək-adam 2" filminin buraxılmasından dərhal sonra Ayvan Reymi 2 ay boyunca film üçün ilkin ssenari yazmışdır.[18] Sem Reymi filmdə Piter Parkerin günahsız qisasçı olmadığını və cinayətkar hesab etdiklərinin içində də insanlıq ola biləcəyini kəşf etməsini istəmişdir.[14] Reymi Herri Ozbornun hekayəsini tamamlamaq üçün onu yenə filmə daxil etmişdir.[14] Reymi Herrinin atasının yolu ilə getməyəcəyini, lakin "təxminən ortada bir yerdə" olacağını təxmin etmişdir.[19] Qum-adam antaqonist kimi təqdim olunmuşdur və Reymi onu vizual cəhətdən möhtəşəm personaj hesab etmişdir.[14] Qum-adamın komikslərdə cinayətkar olduğunu nəzərə alan ssenaristlər, Piterin Ben əminin ölümü haqqındakı peşmançılığını gücləndirmək[20] və hadisənin ona adi görünən qavrayışına meydan oxumaq üçün Qum-adamı Ben əminin qatili kimi təqdim etmişdirlər.[14] Ümumilikdə, Reymi filmin Piter, Meri Ceyn, Herri və Qum-adam haqqında olduğunu bildirmişdir.[21][22]

Reymi filmdə başqa bir supercinayətkar da istəmişdir və Ben Kinqsli Kərkəs rolunu oynamaq üçün studiya ilə görüşməyə başlamışdır. Lakin personaj daha sonra ssenaridən atılmışdır.[18] Venomun alter-eqosu olan Eddi Brokun artıq ssenaridə kiçik rolu var idi.[23] Filmin prodüseri Avi Arad hesab edirdi ki, Reymi filmlərində müasir fanatların maraqlandığı yox, öz favorit Hörümçək-adam düşmənlərinə daha çox üstünlük verirdi.[24] Buna görə də Reymi fanatları məmnun etmək üçün Venom personajını ssenariyə daxil etmiş,[21] hətta daha sonra özü də personajı müsbət qiymətləndirməyə başlamışdır.[24] Venomun film versiyası Venom hekayələrinin qarışığından ibarətdir. Venomun insan tərəfi Eddi Brok Piterin güzgü versiyasını təmsil edir, hər iki personajın bənzər işləri və romantik münasibətləri var.[24] Brokun filmdə jurnalist kimi işləri müasir paparatsiya və bulvar qəzeti jurnalistikası mövzularına toxunur.[25] Prodüserlər artıq Reyminin yaratmış olduğu "başqa qız" personajının yerini dolduraraq rəqib sevgili Qven Steysini də əlavə etməyi təklif etmişdirlər.[21] Bir çox əlavədən sonra Sarcent ssenarinin çox qarışıq olduğunu hesab etmiş və onu iki filmə bölməyi düşünmüşdür. Lakin filmlər arasında yaxşı aralıq klimaks yarada bilmədiyindən bu fikrindən əl çəkmişdir.[18]

Filmin kamera ekipajlarına 2 həftə, 5-18 noyabr 2005-ci il tarixli vaxt sərf olunmuşdur. “Sony Pictures Imageworks” layihənin başlanğıcında filmin güclü vizual effektlərinin yaranması üçün işlərə başlamışdır. Şirkət trilogiyanın ikinci filmi — “Hörümçək-adam 2” filmində supercinayətkar Doktor Osminoqun səhnələrində əhatəedici istifadə edilən vizual effektləri üçüncü filmdə də istehsal etmişdir.[26]

“Hörümçək-adam 3” filminin əsas çəkilişləri 19 yanvar 2006-cı il tarixində başladıldı. 2006-cı ilin iyul ayına kimi film üçün 100 gündən çox çəkiliş edildi. Filmin heyəti çəkilişləri 19 may 2006-cı il tarixinə kimi Los-Ancelesdə davam etdirdi.[26] 2006-cı ilin yazında filmin məkan meneceri Piter Martorano film üçün Klivlenddən yeni kamera ekipajları gətirdi.[27] Daha sonra “Böyük Klivlend Film Rəhbərliyi” filmin çəkilişlərinin şəhərin mərkəzində baş tutmasını əlavə məbləğsiz icazə verdi.[28] Klivlenddə filmin zirehli maşında Qum-adamla Hörümçək-adamın baş tutan döyüş səhnələri ekranlaşdırıldı.[18] Daha sonra çəkiliş qrupu Manhettenda yerləşdi. Filmin qızğın döyüş və əsas çəkilişləri 26 may 2006-cı ildən 1 iyul 2006-cı il tarixinə kimi Çan-Çeyz-Menhetten-Plaza daxil olmaqla, müxtəlif məkanlarda davam etdirildi.[26] Filmdə şəkil çəkilişlərinin yaranması Reyminin üzərində gərginlik meydana gətirdi. Rejissor bunun üçün müxtəlif ekipajlardan istifadə etdi.[18] Operator Bill Poup üçün də səhnələrin çəkilməsi çətinliklə başa gəldi. Çünki Simbiot Hörümçək-adam, Venom və Yeni qoblinin gecə vaxtı reallaşan döyüşlər ərzində personajlar qara kostyum geyinirdilər.[29]

Avqust ayından etibarən Reymi daha qızğın döyüş səhnələrini ekranlaşdırmaq üçün pik-ap çəkilişlərinə rəhbərlik etdi.[30] Filmin çəkilişləri 2006-cı ilin oktyabr ayında tamamlandı. Lakin filmin istehsalını bir ay sonra tamamlamaq üçün çəkilişlərə bir neçə xüsusi effektlər əlavə edildi.[31] 2007-ci ilin əvvələrində Qum-adamın hekayəsinin son hissəsi ilə əlaqədar olaraq dörd fərqli versiyadan ibarət olan pik-ap çəkilişləri başladıldı.[32]

Hörümçək-adamın Qum-adamın qarın nahiyəsinə yumruq atdığı səhnənin vizual effekti kompüterlə verilmişdir. Qum-adam obrazını Tomas Heyden Çörç ifa etmişdir. Hörümçək-adam zirehli maşında Qum-adama zərbələr endirir, daha sonra isə yumruğunu onun bədəninin digər tərəfində görür.

“Hörümçək adam 2” filminin vizual effektləri işində “Vizual Effektə görə Akademiya Mükafatı”na layiq görülən Con Daykstra trilogiyanın üçüncü filmdə vizual effekt işindən imtina etdi. Con Daykstranın əməkdaşı Skott Stokdik vizual effekt işini öz üzərinə götürdü.[33] O, “Sony Pictures Imageworks” şirkətində 200 nəfərlik proqramçı komandasına rəhbərlik edirdi. Bu komanda “Hörümçək-adam 3” filmi istehsala başladıqdan sonra mövcud olmayan xüsusi kompüter proqramları hazırlamaqla yanaşı, 900 vizual effekt görüntüsü yaratdı.[34]

Komiksdən fərqli olaraq, toxuma motivinə sahib olan Venom supercinayətkar kostyumunun konsepsiyası Simbiotun idarəsini nümayiş etdirmək və obrazı Hörümçək-adamla ziddiyətli bir vəziyyətdə göstərmək üçün hazırlanmışdır.

Filmin yeni hazırlanmış vizual effektlərinə əlavə olaraq, Stokdik “New Deal” studiyasının əməkdaşları Ayan Hanter və Devid Sencerlə birlikdə 1:16 miqyaslı göydələn hissəsinin miniatürünü yaratmışdı. Stokdik minatürün dizaynınının seçilməsində kompüter qrafikası görüntülərindən istifadə etmişdi.[35] O, dizaynı binaya zərər yetirəcək kimi realistcəsinə təsvir etmişdir. Dizaynlarda kompüter modelləri seçilmişdir. Əlavə olaraq “Sony Pictures Imageworks” şirkətinin “Cafe FX” bölməsi filmin ən çətin kran səhnəsi olan Hörümçək-adamın Qven Steysini xilas etməsi səhnəsini, eləcə də klimaktik döyüş səhnələrinin görüntülərini vizual effektlə təmin etmişdir.[36] Qum-adamın qumla olan çəkilişlərinin effektləri on iki növ qumla həyata keçirilmişdir. Kaskadyorların işə salınması ilə səhnədə qumdan sıçrayırmış kimi və çıxıntıların üzərinə tökülən vəziyyətdə effekt yaradılmışdır. Qum-adam səhnələrində vizual effektlərin yaradılması üçün nəticələr kompüterdə yamsılanmışdır.[34] Vizual effektlərin əhatə etdiyi səhnələrdə kompüter qrafikasının görüntüləri də tətbiq olunmuşdur. Obrazı canlandıran Tomas Heyden Çörç ekran qarşısında super-vadaredici kimi görünmüşdür.[37] Qumla çəkiliş etməyin mümkün qədər təhlükəli olduğunu düşünən çəkiliş heyəti qum əvəzinə qarğıdalı qıçasının özəyindən istifadə etmişdir.[38] Qum ilə bənzərliyi səbəbindən, Arizona qumu normal qumun əvəzedicisi kimi istifadə edilmişdir.[34] Hörümçək-adamın Qum-adamın qarın nahiyəsinə yumruq atdığı döyüşdə, amputasiya döyüş sənəti mütəxxəsisi Bakster Hambi bu səhnədə Tobi Maquayrı əvəz etmişdir. Bakster Hambi, sağ əli amputasiyada olarkən Qum-adamın qarın nahiyəsinə endirilən zərbəni nəzərdə tutduğu kimi gerçəkləşdirə bilmişdi.[39]

Hörümçək-adam tərəfindən təsvir edilən Simbiot kostyumunun orijinal görünüşü ön və arxa tərəflərdə ağ hörümçəklə təşkil olunmuş qara bir şəkildə idi. Film üçün kostyumun dizaynı Hörümçək-adamın ənənəvi kostyumunun qara versiyası kimi, toxuma motivinə sahib olan bir şəkildə dəyişdirilmişdir. Bunun nəticəsi olaraq, kostyumdan Tofer Qreysin ifa etdiyi Venom personajında da istifadə edilmişdir. Bu personaj da toxuma motivindən təşkil olunmuşdu. Filmin prodüserlərindən biri olan Qrant Körtis qeyd edir ki, “Bu kostyum Hörümçək-adamın ənənəvi geyimidir. Lakin bükülmüş və əzilmiş bir vəziyyətdə hazırlanmışdır.”[40] Əlavə olaraq, Simbiotun həyat tərzində toxuma motivinə sahib olması onun uydurma personaj bioqrafiyasında dahilik səviyyəsində intellektin peyda olmasına səbəb olmuşdur.[41] Simbiotu filmə əlavə etdikdən sonra Reymi personajın hörümçəyə və ya osminoqa bənzəməyini istəmirdi. Rejissor personaja dahilik səviyyəsində intellekt verilməsini istəyirdi. Personajın kostyumu müxtəlif materiallardan hazırlanmışdır.[42] Personajın filmə əlavə edildiyi məlum olduqdan sonra animasiyaçılar personajın çevik hərəkətlərini yaratmaq üçün şir və hepard kimi böyük yırtıcı pişiklərin müşahidə olunan görüntülərini istifadə etmişdilər.[43]

“Hörümçək-adam” trilogiyasının digər iki filminin bəstəkarı olan Denni Elfmen, rejissor Sem Reymi ilə yaranan çətinliklər səbəbi ilə üçüncü filmin bəstəkarı olmaqdan imtina etdi. Elfmen bildirirdi ki, “Mənim Sem Reymi ilə “Hörümçək-adam” trilogiyasının filmləri üzərində işləməyim “acınacaqlı təcrübə” idi. Mən filmin musiqilərini rahat uyğunlaşdıra bilmirdim.”[44] Daha sonra bəstəkar Kristofer Yanq, Elfmanın imtina etdiyi “Hörümçək-adam 3” filminin musiqi işini öz üzərinə götürməyi qərara aldı.[45] 2006-cı ilin dekabr ayında filmin prodüserlərindən biri olan Qrant Körtis Elfmanın imtina etdiyi “Hörümçək-adam 3” filminin musiqi işində bəstəkar Kristofer Yanqla əməkdaşlıq etdiyini elan etdi.[46]

Qum-adam səhnələrinin mövzusunu “aşağı, aqressiv və ağır” səsləndirmək üçün “iki kontrabas saksafonu, iki kontrabas klarneti, iki kontrabas faqotu və səkkiz çox aşağı fransız valtornu”ndan istifadə edilmişdir. Kristofer Yanq Venom mövzularında etdiyi təsviri bu cür açıqlamışdır: “Mənim bu zərərvericiyə olan təlimatlarım o idi ki, o, şeytanın personifikasiyasıdır. Bu mövzunun musiqiləri çox şeytani səslənir.”[47] Venomun mövzularında səkkiz fransız valtornundan istifadə edilmişdir.[48] Reymi ortaya çıxan yeni mövzuları ilk çıxışlar ərzində bəyənirdi. Lakin Qum-adam yaranarkən səslənən musiqiləri rədd etdi. Səbəbini isə musiqinin çox irihəcmli, eyni zamanda dəhşətli olduğunu və kifayət qədər faciəvi olmadığını bildirərək açıqladı. Yanq sonrakı mərhələlərdə bəstələdiyi film musiqisinin çoxunu yenidən bəstələməli olmuşdur, çünki prodüserlər keçmiş filmlərdən çoxlu musiqinin olmadığını düşünmüşdülər.[47] Nəticədə, sevgi hekayəsi, Mey xala və Meri Ceyn üçün olan musiqilər rədd edilmişdir.[48]

Hörümçək-adamın uydurma kainatının doğma şəhəri olan Nyu-Yorkun turizm məntəqələrində “Hörümçək-adam 3” filminin nümayiş edilməsi üçün 30 aprel 2007-ci il tarixində tədbirlər və sərgilər təşkil olunmuşdur. Unikal kompaniyaya Amerika Tarixi Təbiət Muzeyinin hörümçək sərgisi, Nyu-York Botanika Bağının körpə hörümçək bitkiləri emalatxanası, Manhattan Uşaqlar Muzeyinin Yaşıl qoblin maska istehsalı studiyası, Mərkəzi Zooparkda bir zibilçi ovu və böcək şousu daxil idi.[62]

“Marvel Comics” personajları ilə bağlı lisenziyaya sahib olan “Hasbro” şirkəti film üçün tie-in növlü bir neçə oyuncaq istehsal etmişdir. Bu oyuncaqlar toratanlardan (hörümçək üçün), uşaqlar və kolleksiyaçılar üçün nəzərdə tutulmuş ekşn personajının bir neçə çizgilərindən təşkil olunmuşdu.[63] Trilogiyanın ilk iki filmindən sonra istehsal edilən Yaşıl qoblin və Doktor Osminoq oyuncaqları yeni personajlar üçün kiçikmiqyaslı bir şəkildə uyğunlaşdırılmışdı. Kərtənkələ, Mak Qarqan, Ovçu Kreyven, Kərgədan komikslərinin oyuncaqları filmləri xatırladan tərzdə istehsal edilmişdi.[64][65] “Techno Source” şirkəti “oyunçunun əlinin içində oynadığı, hörümçəyin toratan hərəkətlərini təqlid edən və əllə tutulan “Battle Tronics” cihazı” xüsusiyyətlərindən ibarət interaktiv oyuncaqlar yaratmışdı.[66] “Japanese Medicom Toys Corporation” şirkəti ABŞ-nin “Sideshow Collectibles” şirkəti tərəfindən distribüsiya edilmiş film mövzusunda olan kolleksiyaları istehsal etmişdir.[67]

“Hörümçək-adam 3” filmi 18 sentyabr 2007-ci il tarixində Avstraliyada “DVD Region 4” (anamorfik genişekran) üçün buraxılmışdır.[68] Film 2007-ci il oktyabr ayının 15-də Birləşmiş Krallıqda “DVD Region 2” üçün çıxarılmışdır.[69] “Hörümçək-adam 3” filmi 30 oktyabr 2007-ci il tarixində “Region 1” ərazisində DVD üçün yayımlanmışdır. Film birbaşa disk və ikili disk buraxılışlarında, standart nəşrlərdə, Blu-ray formatlarında, əvvəlki filmlərdən ibarət olan buraxılışlarda və PSP video-oyun konsulunda peyda olmuşdur. Sem Reymi, Tobi Maquayr, Kirsten Danst, Ceyms Franko, Tomas Heyden Çörç, Tofer Qreys, Brays Dallas Hovard, Laura Ziskin, Avi Arad və Qrant Körtis filmin audio şərhlərinin yaranmasına imkan yaratmışdılar.[70]

“Sony” şirkəti 30 oktyabr 2007-ci il tarixində Hollivudda yerləşən “ən böyük” marketinq kompaniyasını DVD-də buraxmağı planladığını elan etmişdi. “Papa John's” şirkəti ilə əməkdaşlığa başlayan “Sony” şirkəti pizza qutuları, televiziya, radio və onlayn reklamlar üçün 8,5 milyarda yaxın impressiya çap etdirmişdi. “Sony” şirkəti həmçinin “Pringles” kartof çipsləri, “Blu Tack”, “Jolly Time Pop Corn” və “Nutella” şirkətləri ilə də əməkdaşlıq etmişdir. “Sony” şirkətinin marketinq bölməsi üzrə vitse-prezidenti Cennifer Enderson studiyanın rəqəmsal reklam kompaniyalarına marketinq büdcəsinin təxminən 15 və ya 20 %-ni xərcləmişdir. Bundan əlavə, “Papa John's” şirkəti mobil telefonlara mətn mesajlarını reklamlarla göndərmişdi. Cennifer Enderson bildirirdi ki, “müştərilər üçün 3 dəfə lotereya baş tutacaq. Onlar “Sony” şirkətindən, həmçinin digər reklam şirkətlərindən mükafatlar qazana biləcəklər.”[71]

Film ABŞ-də DVD buraxılışından 125 milyon ABŞ dollarından çox gəlir gətirmişdir.[72] Həmçinin film, 11 həftə ərzində “DVD/Home Video Rentals” istehsalından 43,76 milyon dollardan çox gəlir qazanmışdır.[73] DVD satış nəticələrindən sonra film sənaye gözləntiləri ilə qarşı-qarşıya gəlmədi.[74] Filmin DVD satışları, “Sony” şirkətinin filmin Blu-ray versiyasını yeni PS3 oyun konsolu və Blu-ray pleyeri ilə birlikdə buraxmaq fikri səbəbi ilə məhdudlaşdırıldı.[75] “Hörümçək-adam 3” filmi “Hörümçək-adamın irsi toplanışı”-na daxil edilmişdir. Film beş əsas Hörümçək-adam filminə daxil edilərək 17 oktyabr 2017-ci il tarixində “4K UHD Blu-Ray” kolleksiyasında buraxılmışdır.[76]

2017-ci ildə “Sony” şirkəti “Hörümçək-adam 3” filminin istehsalından 10 il sonra filmin “Hörümçək-adam 3: Redaktorun versiyası” hissəsini çıxaracağını açıqladı. Film “Hörümçək-adam: Mənşələr” istehsalı ilə birlikdə 13 iyun 2017-ci il tarixində Blu-ray kolleksiyasında buraxıldı. Filmdə Kristofer Yanqın bəstələdiyi istifadəsiz musiqidən istifadə edilmişdir. “Hörümçək-adam 3: Redaktorun versiyası” filmi teatr versiyasından iki dəqiqə qısadır. Bəzi səhnələr bir neçə dəyişikliyə məruz qalmış və ya tamamilə silinmişdir. Filmə üç yeni səhnə, üç alternativ səhnə və bir genişləndirilmiş səhnə əlavə edilmişdir. “Hörümçək-adam 3: Redaktorun versiyası” filmi daha sonra “Hörümçək-adamın irsi toplanışı” istehsalı ilə birlikdə “4K UHD Blu-Ray” kolleksiyasında buraxılmışdır.[77]

“Hörümçək-adam 3” filmi Şimali Amerikada 336,5 milyon ABŞ dolları, digər ölkələrdə isə 554,3 milyon dollar qazanmışdır. Filmin ümumi gəliri dünyəvi nümayişindən sonra 890,9 milyon ABŞ dolları olmuşdur.[5] Film “2007-ci ilin ən yüksək gəlirli filmləri” siyahısında üçüncü yerdə qərarlaşmış və Sem Reyminin “Hörümçək-adam” trilogiyasında “ən yüksək gəlirli filmlərin siyahısı”nda yer almışdır. Film 2012-ci ildə “007: “Skayfoll” koordinatı” filminin çıxarılmasına qədər “Sony” və “Columbia” şirkətlərinin istehsal etdiyi ən yüksək gəlirli film olmuşdur.[78] Trilogiyanın üçüncü filmi çıxarıldığı ilk cümə günü dünyəvi tək günlük rekordunu qırdı (104 milyon dollar) və daha sonra isə şənbə günü öz rekordunu yenilədi (117,6 milyon dollar).[79][80] Həmçinin film 381,7 milyon dollarla dünyəvi açılış həftəsonu rekordunu qırmışdır.[80] Bununla da beşinci ən böyük yerdə qərarlaşmışdır (ilk dəfə “Herri Potter və Mələz Şahzadə” istehsalı tərəfindən geridə qoyulmuşdur).[81][82] Filmin “IMAX” teatrı nümayişləri 30 gündə 20 milyon dollar gəlir gətirmişdir. Bu gəlir formatda buraxılan digər 2D filmlərindən daha sürətli gəlmişdir.[83]

Şimali Amerikada “Hörümçək-adam 3” filmi 54-cü ən yüksək gəlirli filmi, “Hörümçək-adam” trilogiyasının ən yüksək gəlirli filmi, “Sony” və “Columbia” şirkətlərinin istehsal etdiyi ən yüksək gəlirli film, 2007-ci ilin ən yüksək gəlirli filmi olmuşdur.[5][84][85] Film üçün təxminən 48,914,300 milyon bilet satılmışdır.[86] 2007-ci ilin 4 may tarixində, cümə günü film 4252 teatrda (təxminən 10,300 ekran) nümayiş edilmişdir.[87] Film tək və açılış günündə 59,8 milyon dollar qazanaraq rekord qırmışdır[79] (ilk dəfə bu rekord “Qara cəngavər” filmi tərəfindən geridə qoyulmuşdur). Bu gəlirin 10 milyon dolları gecəyarısı nümayişlərindən qazanılmışdır.[88] “Hörümçək-adam 3” filmi 151,1 milyon dollar qazanaraq açılış həftəsonu rekordunu qırmışdır (ilk dəfə bu rekord “Qara cəngavər” filmi tərəfindən geridə qoyulmuşdur). Həftəsonu günlərinin rekordunda hər teatrdan ortalama 35,540 dollar qazanılmışdır (ilk dəfə bu gəlir “Hanna Montana və Mayli Sayrus: Ən yaxşı iki dünya konserti” filmi tərəfindən geridə qoyulmuşdur).[89] “IMAX” teatrı açılış həftəsonu nümayişlərində 4,8 milyon dollar gəliri ilə rekord qırmışdır (ilk dəfə bu rekord “Qara cəngavər” filmi tərəfindən geridə qoyulmuşdur).[90][91] Film cümə[92] və şənbə günləri[93] rekordunu təzələmişdir. “Hörümçək-adam 3” filmi ikinci, üçüncü və dördüncü günlərdə nümayiş ediləndən sonra da böyük ölçüdə gəlir qazanmağa nail olmuşdur (ilk dəfə bu göstərici “Qara cəngavər” filmində görünmüşdür).[94] Film bazar günü də rekordunu yeniləmişdir (bu göstərici “Marvelin qisasçıları” filmində də görünmüşdür).[95]

Şimali Amerika xaricində “Hörümçək-adam 3” filmi ən yüksək gəlirli 23-cü film, Sem Reyminin “Hörümçək-adam” trilogiyasının ən yüksək gəlirli filmi, “Sony” və “Columbia” şirkətlərinin istehsal etdiyi ən yüksək gəlirli film idi.[96] “Hörümçək-adam 3” filmi ilk açılış günündə (çərşənbə axşamı, 1 may 2007-ci il) 16 ərazidə nümayiş edilməsindən sonra 29,2 milyon dollar qazanmışdır. Bu məbləğ “Hörümçək-adam 2” filminin ilk açılış günündə qazandığı gəlirlərdən 86 % yüksək idi. 16 ərazinin 10-unda “Hörümçək-adam 3” filmi yeni açılış rekordunu qırmışdır.[53] Bu ərazilərə Yaponiya, Cənubi Koreya, Honq Konq, Tayland, Malayziya, Sinqapur, Tayvan, Filippin,[55] Fransa[97] və İtaliya[98] daxil idi. Almaniyada film “Hörümçək-adam 2” filminin açılış günündə qazandığı gəlirləri geridə qoymuşdu.[97] Altıgünlük açılış həftəsonunda film 107 bazarda 230,5 milyon dollar qazanaraq, həftəsonunu 1-ci sırada tamamladı.[80] “Hörümçək-adam 3” filmi İtaliya, Çin, Cənubi Koreya, Hindistan, Honq Konq, Tayland, Malayziya, Sinqapur, Tayvan, Filippin, İndoneziya, Meksika, Braziliya, Argentina, Kolumbiya və Peru ərazilərində 29 bazarda[80] açılış həftəsonu rekordu qırmışdır (bu göstərici eyni ildə istehsal edilən “Karib dənizinin quldurları: Dünyanın sonu” filmində də görünmüşdür).[99] Bu rekordların bir çoxu ilk günlük açılış həftəsində əldə edilmişdir. Bəzi ölkələrdə altıgünlük açılış həftəsi üç günlə əvəz edilmişdir. Ənənəvi olaraq digər ölkələrdə isə altıgünlük həftə ikigünlük, üçgünlük, dördgünlük və ya beşgünlük həftələrlə əvəz edilmişdir. Hindistanda film 16,4 milyon gəlir gətirmişdir. Bununla da Hindistanda 2007-ci ilin ən yüksək gəlirli filmlərinin siyahısında yeddinci yerdə dayanmışdır.[100][101] “Hörümçək-adam 3” filmi Şimali Amerikanın xaricində, üç ardıcıl həftəsonunun bilet satışında birinci yerdə qərarlaşmışdır.[102][103]

Tənqid toplayıcısı saytı Rotten Tomatoes 256 tənqid əsasında filmə 63% təsdiq reytinqi və 6.24/10 ortalama reytinqi vermişdir. Saytın tənqidçilərinin konsesnsusunda bildirilir ki, "Daha çox personaj və hekayə xətti olmasına, döyüş səhnələrinin gözqamaşdırıcı olmasına baxmayaraq "Hörümçək-adam 3" filmi ilk iki film qədər yaxşı deyil."[104] Metacritic saytında 40 tənqidçi filmə 59/100 xal vermişdir və "qarışıq və orta tənqidlər" bildirmişdir.[105] CinemaScore saytı filmə A+-dan F-ə qədər olan şkala üzrə "B+" ortalama dərəcəsi vermişdir.[106]

"The New York Times" qəzetindən Manola Darqis filmdə hekayənin çox ağır irəliləməsini bəyənməmiş və filmin yumor baxımından geri qaldığını bildirmişdir.[107] "Chicago Sun-Times" qəzetindən Riçard Roeper filmə 4 ulduz üzrə 2 ulduz vermiş, "hər həyəcanlandırıcı döyüş kadrında çox cansız səhnələr olduğunu" bildirmişdir.[108] "New York" jurnalından Devid Edelşteyn Alfred Molinanın personajı kimi "mərkəzi təhlükə"nin olmamasından şikayətlənmiş, "filmdəki 3 supercinayətkarın bir Doktor Osminoq vermədiyini" əlavə etmişdir (Molinanın əvvəlki filmdəki ifasına istinad edir).[109] Ceyms Berardinelli rejissor Sem Reyminin çoxlu supercinayətkar əlavə etməklə "həddini aşdığını" bildirmiş, "təkcə Venomun olması çoxdur" deyə əlavə etmişdir.[110] "Hörümçək-adam 2" filminə müsbət rəylər bildirən Rocer Ebert sikvelə 4 ulduz üzrə 2 ulduz vermiş[111] və Doktor Osminoqun əvvəlki filmdə "qisasla" etdiyi kimi Çörçün Qum-adamın yeni gücləri haqqında nə hiss etdiyini heç vaxt ifadə etmədiyini söyləmişdir. O, filmin bərbad olduğunu, çoxlu supercinayətkar, altssenari, romantik qarışıqlıqlar, söhbətlər və "gah bu tərəfi, gah da o tərəfi işarə edib təəccüblənən küçə izdihamları" ilə dolu olduğunu bildirmişdir.[112] Əvvəlki filmə müsbət tənqid yazan "The New Yorker" qəzetindən Antoni Leyn bu filmə mənfi rəylər bildirmiş,[113] filmi "qarışıqlıq"la xarakterizə etmişdir.[114]

"Fox News" qəzetindən Rocer Fridman filmi "4 ulduzlu opera" adlandırmış, eyni zamanda filmin yumor və döyüşlə zəngin olduğunu demişdir.[115] Comic Book Resources vebsaytından Endi Xori filmi "indiyə kimi çəkilmiş ən kompleks və ustalıqla idarə olunmuş superqəhrəman elmi fantastika filmi ... çoxlu personajın, döyüşün və elmi fantastik ssenariyə baxmayaraq "Hörümçək-adam 3" filmi ağır, bezdirici, maraqsız hiss etmişdir" sözləri ilə təsvir etmişdir.[116] Komikslərin böyük fanatı Conatan Ross filmi trilogiyanın ən yaxşı filmi hesab etmişdir.[117] "Time" jurnalından Riçard Korliss istehsalçıları "İnqmar Berqman filminə layiq şəxsi xəyanət və peşmançılıq hissini drammatikləşdirmək, daha sonra onları parlaq komiks rəngləri ilə bəzətmək" bacarıqlarına görə tərifləmişdir.[118] Filmdə 5 ulduz üzrə 4 ulduz verən "The Boston Globe" qəzetindən Uesli Morris "filmin yaxşı hazırlandığını, izləniləsi olduğunu bildirsə də, izləyicinin başını qarışdırdığını bildirmişdir."[119] "Total Film" film jurnalından Conatan Din "filmin qarışıq ssenarisinin filmin gedişatına kömək etdiyini bildirmişdir."[120] "Entertainment Weekly" jurnalı Qum-adamı ən yaxşı 8-ci kompüter qrafikası ilə hazırlanmış film personajı elan etmişdir.[121]

"MSNBC" vebşəbəkəsindən Con Hartl "Hörümçək-adam 3" filminə müsbət rəylər bildirmiş, lakin filmin "həddən çox hekayəyə malik olması" kimi bir çox qüsura sahib olduğunu bildirmişdir.[122] Onun fikirləri "Houston Chronicle" qəzetindən Emi Byankolli tərəfindən təkrar edilmişdir.[123] O, "ssenarinin çoxlu yan personaj və qarışıqlarla dolu olduğunu, buna görə də seriyanın görkəmli xüsusiyyətinin bəzən bu qarışıqlıqda itdiyini" bildirmişdir. "Daily News" qəzetindən Cek Mettyüs filmin Piter və Meri Ceynin "sakit söhbətlərinə" çox həsr edildiyini, lakin fanatların döyüş səhnələrindən razı qaldıqlarını" bildirmişdir.[124] Nəhayət, "Philadelphia Weekly" qəzetindən Şon Börnsa görə isə rejissor "əvvəlki iki filmi yaddaqalan edən coşqunluğa görə öz məqsədini və miqyasını dəyişib."[125] Reymi daha sonra bir müsahibədə filmi "dəhşətli" adlandırmışdır.[126] 2018-ci ildə "Screen Rant" vebsaytına danışan Avi Arad Reymini filmə Venomu daxil etməyə sövq etməsinin və personajın bir çox fanatını məyus etməsinin məsuliyyətini qəbul etdiyini bildirmişdir: "Düşünürəm ki, biz Venomun bir bəzək olmadığını öyrəndik. Ədalət naminə, günahı öz üzərimə götürürəm, çünki Seymini bütün müsahibələrində günahkar hiss etməsinə mən məcbur etmişəm."[127]

Həm 35-ci “Enni Mükafatları”, həm də “61-ci BAFTA Mükafatları” filmə bir nominasiya təqdim etdilər. “Enni” filmə “Ən Yaxşı Animasiya Effektləri” nominasiyanı, ”BAFTA” isə “Ən Yaxşı Xüsusi Vizual Effektlər” nominasiyasını verdi. “Hörümçək-adam 3” filmi qəbul edildiyi dörd “Vizual Effektlər Cəmiyyəti Mükafatları” nominasiyasından heç birini qazana bilmədi. Tobi Maquayr və Kirsten Danstın filmdəki performansı “Milli Film Mükafatları”nın filmə bir nominasiya verməsinə səbəb oldu. Həmçinin Kirsten Danst 2008-ci ildə “Kids’ Choice Awards” mərasimində “Favorit Film Aktrisası” nominasiyasına qəbul olundu. Film “Yeniyetmə Seçimi” mükafatlarının yeddi nominasiyasına qəbul olunmuşdu: Seçilmiş film: Supercinayətkar (Qreys üçün), Seçilmiş film: Rəqs (Maquayr üçün), Seçilmiş film: Öpüşmə (Danst və Maquayr arasında bölüşdürüldü).