Bəxşeyiş Əsgərov

Bəxşeyiş Məmməd oğlu Əsgərov (25 May 1963, Qaradağlı, Ağdam rayonu) – Bakı Dövlət Universitetinin Hüquq fakültəsinin Kriminalistika və Məhkəmə ekspertizası kafedrasının dosenti, Mərkəzi Seçki Komissiyasının (2011-ci ildən) üzvüdür.

Bəxşeyiş Əsgərov
Şəxsi məlumatlar
Doğum tarixi
Doğum yeri Qaradağlı, Ağdam rayonu, Azərbaycan SSR, SSRİ
Partiya
Təhsili
Fəaliyyəti siyasətçi
Elmi fəaliyyəti
Elm sahəsi Hüqüq
Elmi dərəcəsi Hüqüq üzrə Fəlsəfə Doktoru, Dosent

Həyatı

Bəxşeyiş Məmməd oğlu Əsgərov 1963-cü il may ayının 25-də Ağdam rayonunun Qaradağlı kəndində anadan olub. 1979-cu ilədək Ağdam şəhərindəki 3 saylı orta məktəbdə, sonra isə Bakı şəhərindəki 53 saylı orta məktəbdə təhsil alıb. 1980-ci ildə orta məktəbi bitirdikdən sonra Azərbaycan Dövlət Politexnik İnstitutunun (indiki Azərbaycan Texniki Universiteti) Elektrotexnika fakültəsinin axşam şöbəsinə daxil olub.

1981-ci ilin yanvarından Azərbaycan Dövlət Universitetinin (indiki Bakı Dövlət Universiteti) Filologiya fakültəsinin Müasir Azərbaycan dilçiliyi kafedrasında əmək fəaliyyətinə başlayıb. 1981–1983-cü illərdə hərbi xidmətdə olub. 1984–1985-ci illərdə 4 saylı Dəmir-beton zavodunda fəhlə işləyib.

O, 1985-ci ildə Bakı Dövlət Universitetinin Hüquq fakültəsinin axşam şöbəsinə daxil olub və 1991-ci ildə fərqlənmə diplomu ilə bitirib.

1986–1989-cu illərdə "Yazıçı" nəşriyyatında ekspeditor işləyib.

1989–1992-ci illərdə Ədliyyə Nazirliyinin Azərbaycan Elmi-Tədqiqat Məhkəmə Ekspertizası, Kriminalistika və Kriminologiya Problemləri İnstitutunun (indiki Məhkəmə Ekspertizası Mərkəzi) Məhkəmə Ballistika-Trasologiya Elmi-Tədqiqat laboratoriyasında baş laborant, elmi işçi vəzifələrində çalışıb. Məhkəmə ballistikası və trasologiya üzrə tədqiqatlar sahəsində müvafiq ekspert ixtisas dərəcəsi alıb.

1992–1993-cü illərdə Azərbaycan Respublikası Prezidenti Aparatının Dövlət-hüquq şöbəsində böyük məsləhətçi vəzifəsində çalışıb.

1995–2001-ci illərdə o, Azərbaycan Respublikası Elm və Texnika Komitəsində hüquq məsləhətçisi, 1994–2008-ci illərdə isə Azərbaycan Respublikasının Prezidenti yanında Ali Attestasiya Komissiyasında böyük məsləhətçi-hüquqşünas vəzifəsində işləyib.

Ailəlidir, iki övladı və üç nəvəsi var.

Elmi-pedaqoji fəaliyyəti
"Сinayət işləri üzrə sübutetmədə əməliyyat-axtarış informasiyasından istifadənin problemləri" adlı monoqrafiyası, 2018 * ISBN 978-9952-37-049-2

B. Əsgərov kriminalistika, əməliyyat-axtarış fəaliyyəti və məhkəmə ekspertizası sahəsində elmi tədqiqatlar aparır.

1992–1996-cı illərdə Ədliyyə Nazirliyinin Elmi-Tədqiqat Məhkəmə Ekspertizası, Kriminalistika və Kriminologiya Problemləri İnstitutunun (indiki Məhkəmə Ekspertizası Mərkəzi) aspirantı olub;

1998-ci ildə "Məhkəmə ballistikasında diaqnostik tədqiqatlar (nəzəri və metodik məsələlər)" mövzusunda dissertasiya müdafə edərək hüquq üzrə fəlsəfə doktoru elmi dərəcəsi alıb;

2003-cü ildə Azərbaycan Respublikasının Prezidenti yanında Ali Attestasiya Komissiyasının qərarı ilə Kriminalistika və məhkəmə ekspertizası kafedrası üzrə dosent elmi adı alıb.

1993-cü ilin dekabrından Bakı Dövlət Universitetinin Hüquq fakültəsinin Kriminalistika və məhkəmə ekspertizası kafedrasında müəllim, baş müəllim və dosent kimi fəaliyyət göstərir.[1]

Moskvada nəşr olunan dissertasiyaların elmi nəticələrinin dərc olunması tövsiyə edilən elmi nəşrlər siyahısına daxil olan nüfuzlu "Оперативник (сыщик)" [2] Ümumrusiya dövri elmi-praktiki jurnalının redaksiya heyətinin üzvüdür.

Hal-hazırda "Əməliyyat-axtarış fəaliyyəti dövlətin cinayətkarlığa təsir vasitəsi kimi (Azərbaycan Respublikasının materialları üzrə)" mövzusunda doktorluq dissertasiyası üzrə tədqiqatları başa çatdırıb.

Elmi əsərləri
  • Kriminalistika, məhkəmə ekspertizası və əməliyyat-axtarış fəaliyyəti sahəsində 6 dərsliyin və dərs vəsaitinin, o cümlədən Kriminalistika və məhkəmə ekspertizası sahəsində Respublikada dərc olunan ilk dərsliklərin, Azərbaycan Respublikasının Cinayət və Cinayət-Prosessual məcəllələrinin elmi-praktiki kommentariyalarının müəlliflərindən biridir.
  • 2018-ci ildə doktorluq dissertasiyasının mövzusu üzrə "Cinayət işləri üzrə sübutetmədə əməliyyat-axtarış informasiyasından istifadənin problemləri" adlı monoqrafiyası [3] dərc olunub.

20-dən çox respublika və beynəlxalq elmi konfransda məruzəçi qismində iştirak edib. 50-dən çox elmi məqalənin müəllifidir.

Bir sıra qanunların, o cümlədən "Patent haqqında", "Əmtəə nişanları və coğrafi göstəricilər haqqında" Azərbaycan Respublikası qanunlarının, "Patent müvəkkilləri haqqında" Əsasnamənin, "Əmtəə nişanına dair iddia sənədinin tərtibi və verilməsi Qaydaları"nın, "İxtiraya dair iddia sənədinin tərtibi, verilməsi və baxılması Qaydaları"nın, "Azərbaycan Respublikasının Prezidenti yanında Ali Attestasiya Komissiyası haqqında" və "Alimlik dərəcələrinin və elmi adların verilməsi qaydaları haqqında" əsasnamələrin, eləcə də bir çox qanun qüvvəli normativ-hüquqi sənədlərin layihələrinin müəlliflərindən biridir.

O, ayrı-ayrı normativ-hüquqi aktların, o cümlədən Cinayət Məcəlləsinin normalarının təfsiri ilə əlaqədar Azərbaycan Respublikası Konstitusiya Məhkəməsində ekspert kimi çıxış edir.

Yüksək ixtisaslı elmi və elmi pedaqoji kadrların hazırlanması sahəsində Azərbaycan Respublikasının bir sıra MDB ölkələri ilə bağladığı qarşılıqlı əməkdaşlığa dair saziş və müqavilə layihələrinin hazırlanmasında yaxından iştirak edib.

İctimai-siyasi fəaliyyəti

B. Əsgərov Azərbaycanın müstəqilliyi uğrunda gedən mübarizənin fəal iştirakçılarından və tələbə hərəkatının öncüllərindən biri olub.

1990-cı il 20 Yanvar hadisələrinin və 1991-ci ildə Qarakənd üzərində içərisində ali dövlət hakimiyyəti orqanlarının yüksək vəzifəli şəxslərinin və yüksək rütbəli hərbçilərin olduğu vertolyotun ermənilər tərəfindən vurulması üzrə işlərin açılmasında və istintaqında fəal iştirak edib.

1990-cı il yanvarın 19-dan 20-nə keçən gecə Bakı şəhərinə qoşunların yeridilməsi ilə əlaqədar faciəli hadisələrinin təfsilatının və səbəblərinin təhqiqi üzrə Azərbaycan Respublikası Ali Soveti İstintaq komissiyasının işçi qrupunun üzvü və işçi qrupunun işinin təşkilatçılarından biri kimi göstərdiyi səmərəli fəaliyyətə görə Azərbaycan Respublikası Ali Soveti Milli Şurasının təşəkkürünə (19 yanvar 1992-ci il, N-68) layiq görülüb [[4]

2011-ci ilədək Böyük Quruluş Partiyasının üzvü olmuşdur.[5]

2011-ci ildən Azərbaycan Respublikası Mərkəzi Seçki Komissiyasının üzvüdür. 2016-cı ilədək namizədliyi Böyük Quruluş Partiyasıtərəfindən irəli sürülmüşdür. 9 aprel 2016-cı ildə isə Böyük Quruluş Partiyası və Azərbaycan Demokratik Maarifçilik Partiyası tərəfindən ortaq namizəd olaraq irəli sürülüb.[6] 2021-ci ildə namizədliyi Böyük Quruluş Partiyası tərəfindən sürülmüş və 27 aprel tarixində üzv seçilmişdir.

Hal-hazırda bitərəfdir.

Mənbə

İstinadlar
  1. "Arxivlənmiş surət". 2020-02-21 tarixində arxivləşdirilib. İstifadə tarixi: 2021-01-28.
  2. "Arxivlənmiş surət". 2022-12-04 tarixində arxivləşdirilib. İstifadə tarixi: 2021-01-28.
  3. "Arxivlənmiş surət". 2021-02-07 tarixində arxivləşdirilib. İstifadə tarixi: 2021-01-28.
  4. "Arxivlənmiş surət". 2021-02-03 tarixində arxivləşdirilib. İstifadə tarixi: 2021-01-28.
  5. "HANSI PARTİYANIN PROFESSORU ÇOXDUR?". 2023-04-20 tarixində arxivləşdirilib. İstifadə tarixi: 2023-04-20.
  6. "Arxivlənmiş surət". 2023-07-04 tarixində arxivləşdirilib. İstifadə tarixi: 2021-03-12.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.