Aleksis Bledel

Aleksis Bledel 16 sentyabr, 1981-ci ildə Hyuston şəhərində, Texasda anadan olub. Atası Martin Bledel Argentinadan, anası Nanett Bleyk isə Meksikadandır. Doğma dili ispanca olan Aleksis uşaqlıqda çox utancaq olduğundan, səkkiz yaşında vaildeynləri onu özfəaliyyət teatrına vermişdilər. O, "Bizim şəhər" və "Oz ölkəsindən olan sehrbaz" tamaşalarında oynamışdı. Yeniyetmə istedada bu işlərlə məşğul olan bir agent diqqət yetirmiş və o, model kimi fəaliyyətə başlamışdı. Aleksis Hyustondakı Müqəddəs Aqnessa Akademiyasına girmişdi. O, Reyc Parks Model və Aktyorluq Məharəti Məktəbində təhsil almış, bir il ərzində Nyu-York Universitetində kinematoqrafiya üzrə ixtisaslaşmışdı.

Tezliklə Aleksis onu məşhur edən "Gilmorun qızları" (2000-2008) serialında Rori Gilmor rolunu aldı. Bu serial onun televizyadakı debütü oldu. 2002-ci ildə "Teen People" dərgisi onu "Ən parlaq gənc ulduzlar"ın siyahısına daxil etdi. Bu ərəfədə aktrisa doğma şəhərində çəkilən "Raşmor Akademiyası" filmində kiçik rol da aldı. Aleksis Bledel, Natali Bebbitə aid povestin ekranlaşdırılmış versiyası olan "Əbədi Tuk" (2002) filminə çəkildi. 2005-ci ildə aktrisanın iştirakı ilə birdən-birə iki film ekranlara çıxdı. "Tilsim-cins" adlanan birinci filmin quruluşu Enn Breşersin romanı əsasında verilmişdi. Robert Rodriqez və Frenk Millerin çəkdikləri ikinci film isə "Günahlar şəhəri" adlanırdı. Bu filmə görə aktrisa öz ampluasını köklü surətdə dəyişməli oldu. Əvvəllər incə ev qızlarını canlandıran Aleksis, burada fahişə obrazında oynamalı idi.