Ələmdar Quluzadə

1952-ci ildə Qarabağın Xocalı kəndində anadan olmuşdur[1]. O, kənd orta məktəbini bitirdikdən sonra 1973-cü ildə N.Tusi adına Azərbaycan Dövlət Pedaqoji Universitetinin Xankəndi filialında Azərbaycan dili və ədəbiyyat fakultəsini bitirib. 1988-ci ilin sentyabr ayına qədər Xankəndində yaşayıb və bu müddətdə keçmiş, DQMV radio verilişləri komitəsinin Azərbaycan verilişləri redaksiyasında müxbir vəzifəsində çalışmışdır. O, Azərbaycan Yazıçılar Birliyinin üzvüdür.

Yaradıcılığa gənc yaşlarında başlayan şairin şeirləri “Azərbaycan gəncləri”, “Ədəbiyyat və incəsənət” qəzetlərində və “Ulduz” jurnallarında dərc edilmişdir. Ələmdar Quluzadənin ilk kitabı “Dağların yaddaşı” adlanır. Sonralar Ələmdar müəllimin bir-birindən maraqlı kitabları dərc edilmişdir. O, “Tumurcuqlar”, “Beş qitənin uşaqları”, “Şəhid şəhər”, “Alay komandiri”, “Ömür-gün qabaqdadır”, “İsti ocaq”, “Mənə söz verin”, “Məhləmin uşaqları”, “Məni yoldan eləmə”, “Qürbətə düşən daş”, “Dilotu”, “Ürəyindən keçəydim”, “Ətirşah ətri”, “Boğça”, “Qadan mənə Qarabağ” kitablarının müəllifidir. Şairin kitablarını kiçiklərlə yanaşı, böyüklər də sevərək oxuyur.

Ələmdar Quluzadənin çoxsahəli yaradıcılığında uşaq ədəbiyyatının özünəməxsus yeri var. Təbiətə, folklora, xalq yaradıcılığına, insanların psixologiyasına yaxından bələd olması şairin uşaqlar üçün qələmə aldığı şeir və nağıllarda da özünü aydın şəkildə göstərir. Ələmdar müəllimin “Qürbətə düşən daş” kitabında vətənə, xalqa, əməyə, anaya, dosta sevgi mövzularında yazılmış nağıllar (“Papaqçı”, “Dəmirçi Daşdəmir”, “Bar ağacı”, “Bənövşə”, “Yuva”, “Kiçik qardaş”, “Nökər alim”, “Göyərçin”) geniş yer almışdır. Bu kitabda müəllif özünü nəsrdə sınamış, həm də uşaqlara haqq-ədalət, vətənpərvərlik, mərdlik, qorxmazlıq, cəsurluq, barədə düşüncələrini çatdırmışdır.

Yazıçı-şair Ələmdar Quluzadənin nağılları ilə yanaşı, onun şeirləri,poemaları, pyesləri də bütün yaş oxucularda maraq doğurmaqla yanaşı, onları vətənpərvər ruhda tərbiyə edir.

Azərbaycan uşaq seirinin maraqlı nümunələrini yaratmışdır.

• Alay komandiri.- B.: Ozan, 1999.- 80s.
• Beş qitənin uşaqları. B.: Gənclik, 1991. – 96 s.
• Dağların yaddaşı.-B.: Azərnəşr, 1976.-38 s
• İsti ocaq.- B.: Yazıçı, 1985.- 143 s.
• Qarabağ oyunu.-B.: Azərnəşr, 1993.- 48 s.
• Məhləmizin uşaqları.-B.: Şirvannəşr, 2004.- 80 s.
• Mənə söz verin.- B.: Ozan, 2001.- 248 s.
• Məni yoldan elemə.-B.: Ozan, 2005.- 255 s.
• Ömür-gün qabaqdadır.- B.: Yazıçı, 1980.-83 s.
• Şəhid şəhər.- B.: Ozan, 1998.- 67 s.
• Tumurcuqlar.- B.:Gənclik, 1985.- 28 s.