İrina Zaretska

İrina Zaretska beynəlxalq səviyyədə birinci turnirinə 2012-ci ilin fevralında Azərbaycanda baş tutan yeniyetmələr arasında Avropa Çempionatı çərçivəsində qatıldı.[3] 1/16 final mərhələsində Rusiya nümayəndəsi Liliya Bespalayanı 4:0, 1/8 final mərhələsində Lüksemburq təmsilçisi Pola Ciorcettini 1:0, 1/4 final mərhələsində Azərbaycan nümayəndəsi Aytac Əliyevanı 6:0, 1/2 final mərhələsində isə Türkiyə təmsilçisi Umay Tohcanı 1:0 hesabları ilə məğlub edən İrina Zaretska, final görüşünə vəsiqə qazandı.[3] Həlledici görüşdə isə o, Fransa nümayəndəsi Sandi Serfati ilə üz-üzə gəldi.[3] Həmin görüşdə rəqibi üzərində 8:0 hesabı ilə qələbə qazanan 15 yaşlı İrina Zaretska, yeniyetmələr arasında Avropa Çempionatının qızıl medalına sahib oldu.[3]

İrina Zaretska 2015-ci ildə birinci turnirinə 22 – 25 yanvarda Fransanın Paris şəhərində baş tutan Premyer Liqa turniri çərçivəsində qatıldı. Birinci görüşdə o, Finlandiya nümayəndəsi Titta Keinanen ilə üz-üzə gəldi və 6:1 hesabı ilə qalib gəldi.

Azərbaycan yığmasına gəlişi

Martda Azərbaycan Milli Karate Federasiyası (AMKF) tərəfindən İrina Zaretskaya Azərbaycan yığmasının heyətində mübarizə aparmaq üçün müraciət olundu. O, həmin müraciətə müsbət cavab verdi.

İrina Zaretska Azərbaycan yığmasının heyətində beynəlxalq səviyyədə birinci nüfuzlu turnirə 18 – 22 martda İstanbul şəhərində baş tutan Avropa Çempionatı çərçivəsində qatıldı.[4] Avropa Çempionatının birinci görüşündə o, Rusiya nümayəndəsi İnqa Şeroziyanı 1:0, növbəti görüşündə isə Ukrayna təmsilçisi İrina Kaminshanı 4:0 hesabı ilə məğlub eləsə də, 1/4 final mərhələsində Monteneqro nümayəndəsi Marina Rahoviça 0:2 hesabı ilə məğlub oldu və çempionatı 8-ci pillədə başa vurdu.[5] Avropa Çempionatından sonra o, 1 – 4 mayda İstanbulda baş tutan "Bosphorus Open" beynəlxalq turnirində də mübarizə apardı.[6]

I Avropa Oyunları

2015-ci ilin əsas turnirlərindən biri isə 12 – 28 iyunda Azərbaycanda baş tutan I Avropa Oyunları oldu.[7][8][9] İrina Zaretska I Avropa Oyunlarında iyunun 14-də çıxış elədi.[10] O, qrup mərhələsində Avstriya nümayəndəsi Alisa Buçinqer, İspaniya təmsilçisi Kristina Vizcaino Qonzalez və Yunanıstan nümayəndəsi Vasilihi Panetsidou ilə birgə "A" qrupunda mübarizə apardı.[11] Birinci görüşdə İrina Zaretska İspaniya təmsilçisi Kristina Vizcaino Qonzalez üzərində 6:1 hesabı ilə qələbə qazandı. Növbəti görüşdə isə o, martda İstanbulda Avropa Çempionatının qalibi olan Avstriya nümayəndəsi Alisa Buçinqer ilə üz-üzə gəldi və rəqibinə 0:4 hesabı ilə məğlub oldu. Qrup mərhələsinin sonuncu görüşündə İrina Zaretska, Yunanıstan təmsilçisi Vasilihi Panetsidou ilə qarşılaşdı. Həmin görüşdə rəqibi üzərində 1:0 hesabı ilə qələbə qazanan İrina Zaretska, qrup mərhələsini uğurla adladı və yarım-final mərhələsinə vəsiqə qazandı. Bu mərhələdə o, martda Avropa Çempionatında məğlub olduğu Monteneqro nümayəndəsi Marina Rahoviç ilə üz-üzə gəldi. Gərgin idman mübarizəsi şəraitində baş tutan görüşün nəticəsində, İrina Zaretska 1:0 hesabı ilə qalib gəldi və I Avropa Oyunlarının finalına vəsiqə qazandı. Həlledici görüşdə o, qrup mərhələsində məğlub olduğu Avstriya təmsilçisi Alisa Buçinqer ilə qarşılaşdı. Kristal Zalında baş tutan final görüşündə yerli tamaşaçılar qarşısında İrina Zaretska təcrübəli və titullu rəqibi üzərində 8:1 hesabı ilə inamlı qələbə qazandı. Bununla da o, I Avropa Oyunlarının qalibi oldu.[12]

Azərbaycan Prezidenti İlham Əliyevin 29 iyun 2015-ci il tarixli 1299 nömrəli Sərəncamına əsasən I Avropa Oyunlarında qazandığı nailiyyətlərə və Azərbaycan idmanında xidmətlərinə görə İrina İqorevna Zaretska "Şöhrət" ordeni ilə təltif edildi.[13]

I Avropa Oyunlarından sonra İrina Zaretska 6 – 10 sentyabrda İstanbul şəhərində baş tutan Premyer Liqa turnirində mübarizə apardı. Birinci görüşdə o, Türkiyə nümayəndəsi Nurcan Çiçeji 8:0 hesabı ilə məğlub elədi.[14] Daha sonra İrina Zaretska 1/8 final mərhələsində Braziliya nümayəndəsi Letisiya Silveriya Britonu 3:0, 1/4 final mərhələsində Avstriya təmsilçisi Alisa Buçinqeri 4:0, 1/2 final mərhələsində isə Finlandiya nümayəndəsi Titta Keinaneni 4:2 hesabları ilə məğlub elədi və turnirin final görüşünə vəsiqə qazandı.[14] Həlledici görüşdə o, Latviya təmsilçisi Vihtoriya Rzayeva ilə üz-üzə gəldi.[15] Gərgin idman mübarizəsi şəraitində baş tutan görüşdə İrina Zaretska 4:3 hesabı ilə qalib gəldi və İstanbul Premyer Liqasının qalibi oldu.[15][16]

Daha sonra o, Avstriyanın Zalsburq şəhərində baş tutan Premyer Liqa turnirində çıxış elədi.[17] İrina Zaretska turnirin birinci görüşündəcə İtaliya nümayəndəsi Silviya Semeranoya 0:6 hesabı ilə məğlub oldu və mübarizəni dayandırdı.[17]

İrina Zaretska 2015-ci ildə sonuncu turnirinə 12 – 15 noyabrda İndoneziyada baş tutan U-21 Dünya Çempionatı çərçivəsində qatıldı.[18] Çempionatın birinci görüşündə o, Yaponiya nümayəndəsi Maya Suzuhi üzərində 7:5 hesabı ilə qələbə qazandı.[18] Daha sonra İrina Zaretska 1/8 final mərhələsində Venesuela təmsilçisi Marian Kuervo Bateni 2:0, 1/4 final mərhələsində Fransa nümayəndəsi İman Hassunini 2:0, 1/2 final mərhələsində isə İngiltərə təmsilçisi Ameliya Jayne Harveyi 4:1 hesabları ilə məğlub elədi və turnirin final görüşünə vəsiqə qazandı.[18] Həlledici görüşdə o, Misir nümayəndəsi Nada Məhəmməd ilə üz-üzə gəldi.[19] Həmin görüşdə rəqibinə 0:3 hesabı ilə məğlub olan İrina Zaretska, U-21 Dünya Çempionatının gümüş medalına sahib oldu.[19]

İrina Zaretska 2015-ci il ərzində 9 turnirdə mübarizə və onların 2-də qızıl medala, 2-də gümüş medala, 1-də isə bürünc medala sahib oldu.

İrina Zaretska 2016-cı ildə birinci turnirinə fevralda Kiprin Limasol şəhərində baş tutan U-21 Avropa Çempionatı çərçivəsində qatıldı.[20] Həmin çempionatda o, 1/8 final mərhələsində İspaniya nümayəndəsi Selin Roza Zamoranı 6:0 hesabı ilə məğlub eləsə də, 1/4 final mərhələsində İsveç təmsilçisi Lisa Rasmussona 0:1 hesabı ilə məğlub oldu və mübarizəni dayandırdı.[21]

İrina Zaretska 2016-cı ildə birinci uğurunu martda qazandı. 18 – 20 martda Niderlandın Rotterdam şəhərində baş tutan Premyer Liqa turnirində çıxış edən İrina Zaretska, 1/32 final mərhələsində Danimarka nümayəndəsi Məryəm Zaqomi, 1/16 final mərhələsində isə Niderland təmsilçisi Mandi Besselinq üzərində 4:0 hesablı qələbələr qazandı və 1/8 final mərhələsinə adladı.[22] Bu mərhələdə o, Polşa nümayəndəsi Kamila Vardanı minimal hesabla məğlub elədi və 1/4 final mərhələsinə adladı.[22] Bu mərhələdə İrina Zaretska bir ay əvvəl Limasolda U-21 Avropa Çempionatında məğlub olduğu İsveç təmsilçisi Lisa Rasmusson ilə üz-üzə gəldi.[22] Bu səfər o, rəqibi üzərində 6:1 hesabı ilə inamlı qələbə qazandı və Premyer Liqanın yarım-final mərhələsinə adladı.[22] Finala gedən yolda İrina Zaretska Qazaxıstan nümayəndəsi Guzaliya Qafurova ilə qarşılaşdı.[23] Bu səfər o, qələbələr seriyasının davamını gətirə bilmədi və rəqibinə 1:3 hesabı ilə məğlub oldu.[23] Bürünc medal uğrunda görüşdə isə İrina Zaretska Slovakiya təmsilçisi Vihtoriya Pillarovanı 1:0 hesabı ilə məğlub elədi və Premyer Liqanın bürünc medalına sahib oldu.[24]

İrina Zaretska növbəti turnirinə 8 – 10 apreldə Birləşmiş Ərəb Əmirliyinin Dubay şəhərində baş tutan Premyer Liqa çərçivəsində qatıldı.[25] O, əvvəlcə 1/8 final mərhələsində İran nümayəndəsi İlahə Rezazadə üzərində 2:1, sonra isə 1/4 final mərhələsində İngiltərə təmsilçisi Natalie Villiams üzərində 4:0 hesablı qələbələr qazandı və turnirin yarım-final mərhələsinə adladı.[26] Finala gedən yolda İrina Zaretska İtaliya nümayəndəsi Silviya Semerano ilə üz-üzə gəldi.[26] Gərgin idman mübarizəsi şəraitində baş tutan görüşdə o, rəqibinə 1:2 hesabı ilə məğlub oldu və mübarizəni bürünc medal uğrunda görüşdə davam elədi.[26] Həmin görüşdə İrina Zaretska bir ay əvvəl Rotterdamda Premyer Liqa turnirində məğlub olduğu Qazaxıstan təmsilçisi Guzaliya Qafurova ilə qarşılaşdı.[27] Bu səfərdə o, rəqibinə məğlub oldu — 1:2.[27] Bununla da İrina Zaretska Dubay Premyer Liqasını beşinci pillədə başa vurdu.[27]

2016-cı ilin əsas turnirlərindən biri 5 – 8 mayda Fransanın Monpelye şəhərində baş tutan Avropa Çempionatı idi.[28][29] İrina Zaretska çempionatın birinci görüşündə İtaliya nümayəndəsi Silviya Semerano ilə üz-üzə gəldi.[30] Buna qədər o, rəqibi ilə 2015-ci ildə Zalsburq Premyer Liqasında və 2016-cı ildə Dubay Premyer Liqasında üz-üzə gəlmişdi və hamısında məğlub olmuşdu. Bu səfər İrina Zaretska rəqibi ilə görüşdə üstün təsir bağışladı. Nəticədə o, görüşdə 3:0 hesalı ilə qalib gəldi və 1/8 final mərhələsinə adladı.[30] Bu mərhələdə İrina Zaretska Serbiya təmsilçisi İvana Çomaqiç ilə qarşılaşdı.[30] Gərgin idman mübarizəsi şəraitində baş tutan görüşdə İrina Zaretska 6:4 hesabı ilə qalib gəldi və 1/4 final mərhələsinə adladı.[30] Bu mərhələdə o, İspaniya nümayəndəsi Kristina Vizcaino Qonzalez ilə üz-üzə gəldi və rəqibi üzərində 4:1 hesabı ilə qələbə qazanaraq turnirin yarım-final mərhələsinə adladı.[30] Finala gedən yolda İrina Zaretska Avstriya təmsilçisi Alisa Buçinqer ilə qarşılaşdı.[30] Ötən il Avropa Oyunlarının final görüşündə qalib gəldiyi rəqibinə o, bu səfər 0:4 hesabı ilə məğlub oldu.[30] Bununla da İrina Zaretska mübarizəni bürünc medal uğrunda görüşdə davam elədi.[31] Həmin görüşdə isə o, Almaniya nümayəndəsi Yohanna Kner ilə üz-üzə gəldi və bu səfər də məğlub oldu — 0:4.[31] Beləcə İrina Zaretska Avropa Çempionatını da beşinci pillədə başa vurdu.[31]

Avropa Çempionatından sonra İrina Zaretska birinci turnirinə 2 – 4 sentyabrda İstanbul şəhərində baş tutan Premyer Liqa turnirində qatıldı.[32] O, turnirin birinci görüşündəcə Türkiyə nümayəndəsi Büşra Şeyda Turana 1:9 hesabı ilə məğlub oldu. Büşra Şeyda Turan turnirin final görüşünə vəsiqə qazandıqından İrina Zaretska, təsəlliverici qrupda mübarizə apardı. Təsəlliverici qrupda o, əvvəlcə Çin Taybeyi nümayəndəsi Ven Fenqi 1:0, sonra isə Türkiyə təmsilçisi Seray Saniye Koçalini 1:0 hesabları ilə məğlub elədi və bürünc medal uğrunda görüşə vəsiqə qazandı. Həlledici görüşdə İrina Zaretska Yunanıstan nümayəndəsi Vasilihi Panetsidou ilə üz-üzə gəldi. Həmin görüşdə rəqibinə 0:1 hesabı ilə məğlub olan İrina Zaretska, Premyer Liqa turnirini də beşinci pillədə bitirdi.

İrina Zaretska 2016-cı ildə əsas uğurunu 22 – 25 sentyabrda Almaniyanın Hamburq şəhərində baş tutan Premyer Liqa turnirində qazandı. İrina Zaretska tunirin birinci görüşündə İtaliya nümayəndəsi Silviya Semeranonu 2:0 hesabı ilə məğlub elədi.[33] Daha sonra o, Yunanıstan təmsilçisi Vasilihi Panetsidou üzərində 3:1 hesabı ilə qələbə qazandı və 1/8 final mərhələsinə adladı.[33] Bu mərhələdə İrina Zaretska Rusiya nümayəndəsi İnqa Şeroziya ilə üz-üzə gəldi.[33] Həmin görüşdə o, 1:0 hesabı ilə qalib gəldi və 1/4 final mərhələsinə adladı.[33] Bu mərhələdə İrina Zaretska Çili təmsilçisi Lorena Salamana ilə qarşılaşdı və 1:0 hesabı ilə qalib gəldi.[33] Bununlada da o, turnirin 1/2 final mərhələsinə adladı.[33] Finala gedən yolda İrina Zaretska İsveçrə nümayəndəsi Yelena Kuirici ilə üz-üzə gəldi.[33] Gərgin idman mübarizəsi şəraitində baş tutan görüş 1:1 hesabı ilə başa çatdı.[33] Qaydalara əsasən görüşün hesabı heç-heçə olsa, ən fəal idmançı görüşün qalibi hesab olunurdu. Nəticədə referilər tərəfindən İrina Zaretska fəal olduğu üçün görüşün qalibi elan olundu.[33] Bununla da o, final görüşünə vəsiqə qazandı.[33] Həlledici görüşdə İrina Zaretska ABŞ təmsilçisi Çeril Murfi ilə qarşılaşdı.[34] Həmin görüşdə İrina Zaretska rəqibi üzərində 1:0 hesabı ilə qalib gəldi və Premyer Liqa turnirinin qalibi oldu.[34][35] Bu onun WKF Karate-1 Premyer Liqa turnirlərində üçüncü çempionluğu idi.

2016-cı ilin əsas turniri Avstriyanın Lins şəhərində baş tutan Dünya Çempionatı idi.[36] İrina Zaretska çempionatın birinci görüşündə İtaliya nümayəndəsi Silviya Semerano ilə üz-üzə gəldi.[37] Gərgin idman mübarizəsi şəraitində baş görüş 0:0 hesabı ilə başa çatdı.[37] Qaydalara əsasən görüşün hesabı heç-heçə olsa, ən fəal idmançı görüşün qalibi hesab olunurdu. Nəticədə referilər tərəfindən Silviya Semerano fəal olduğu üçün görüşün qalibi elan olundu.[37] Bununla da İrina Zaretska Dünya Çempionatında mübarizəsini dayandırdı.[38]

İrina Zaretska 2016-cı il ərzində 7 turnirdə mübarizə və onların birində qızıl medala, birində isə bürünc medala sahib oldu.

İrina Zaretska 2017-ci ilin 26 – 30 yanvarında Fransanın Paris şəhərində baş tutan Premyer Liqa turnirində mübarizə apardı.[39] İrina Zaretska turnirin 1/32 final mərhələsində İtaliya nümayəndəsi Silviya Semeranonu 1:0, 1/16 final mərhələsində Fransa təmsilçisi Xeyra Belalı 4:0, 1/8 final mərhələsində İngiltərə nümayəndəsi Keyt Karvaçinshini 7:1, 1/4 final mərhələsində isə Yaponiya təmsilçisi Maya Suzuhini 5:0 hesabı ilə məğlub elədi və Premyer Liqanın yarım-final mərhələsinə adladı.[39] Bu mərhələdə onun rəqibi Fransa nümayəndəsi Lamiya Matub oldu.[40] Həmin görüşdə İrina Zaretska rəqibinə 3:1 hesabı ilə qalib gəldi və turnirin final görüşünə vəsiqə qazandı.[40] Həlledici görüşdə o, digər Fransa təmsilçisi Alizi Aqiyer ilə üz-üzə gəldi.[40] Gərgin idman mübarizəsi şəraitində baş tutan göüşdə İrina Zaretska rəqibinə minimal hesabla məğlub oldu (0:1) və Paris Premyer Liqasının gümüş medalına sahib oldu.[40][41]

Azərbaycan Prezidenti İlham Əliyev İrina Zaretskaya "Şöhrət" ordenini təqdim edən zaman (29 iyun 2015-ci il)

• Karate idman növü üzrə Avropa Oyunlarının qalibi olan birinci və yeganə qadın Azərbaycan idmançısı (2015).
• Karate üzrə Komanlararası Avropa Çempionatının qalibi olan birinci Azərbaycan idmançılarından biri (2016).
• Karate üzrə Avropa Çempionatının finalında mübarizə aparan birinci və yeganə qadın Azərbaycan idmançısı (2018).
• Karate üzrə Dünya Çempionatının medalına sahib olan birinci və yeganə qadın Azərbaycan idmançısı (2018).
• Karate üzrə Dünya Çempionatının qalibi olan birinci və yeganə qadın Azərbaycan idmançısı (2018).
• Karate idman növü üzrə 2 dəfə Avropa Oyunlarının medalına sahib olan birinci və yeganə qadın Azərbaycan idmançısı (2019).
• Karate üzrə Avropa Çempionatının qalibi olan birinci və yeganə qadın Azərbaycan idmançısı (2021).
• Karate idman növü üzrə Olimpiya Oyunlarının medalına sahib olan birinci və yeganə qadın Azərbaycan idmançısı (2021).
• Karate üzrə 2 dəfə Dünya Çempionatının qalibi olan birinci və yeganə qadın Azərbaycan idmançısı (2021).

• Azerisport.com idman portalının oxucularına görə 2017-ci ilin yanvar ayının ən yaxşı 2-ci idmançı (15 % səslə).[44][45]
• Azerisport.com idman portalının oxucularına görə 2017-ci ilin fevral ayının ən yaxşı 2-ci idmançı (15 % səslə).[46][47]
• Azerisport.com idman portalının versiyasına görə 2018-ci ilin ən yaxşı üçüncü idmançı.[48]
• Azerisport.com idman portalının versiyasına görə 2020-ci ilin ən yaxşı altıncı idmançı.[49]