Baloncestu
[editar datos en Wikidata]

El baloncestu^[1] ye un deporte al que se xuega con un balón nel que lo importante ye metelu dientro una canasta allugada a 3,05 metros d'altura.

Les lligües más destacaes d'España son l'ACB y la LEB. España ye campeona del mundu de baloncestu de 2006 y ganó'l títulu en Xapón.

N' estos momentos Asturies ta reprsentau polos siguientes equipos na competición profesional o semiprofesional:

• Uviéu Baloncesto (LEB ORO)
• ADBA (Lliga Femenina 2)
• Universidá d' Uviéu (Lliga Femenina 2)
• BVM 2012 (Lliga EBA)
• Xixón Basket 2015 (Lliga EBA)

Regles

El baloncestu ye un deporte que se xuega ente dos equipos de cinco xugadores caún permitiendose hasta siete suplentes, y que consiste n'intentar meter coles manes un balón per un aru asitiáu n'alto del terrén contrariu.

Xuégase en cuatro tiempos de 10 minutos caún. Los descansos detrás del primer y tercer tiempu son de 2 minutos y de 15 minutos el de depués del segundu tiempu.

El campu de xuegu de 28m x 15m, qu'en nengún casu pue ser de yerba, tien forma rectangular y ha de tar separtáu'l metru como poco de cualesquier estorbu. A lo alto los pilancos han de tar como pocu a 7 metros d'altor. A cada llau hai un tableru con un aru pel qu'hai que facer pasar la pelota. Gana l'equipu que más canastes faiga.

Orixe

El baloncestu nació en 1891 cuando James A. Naismith, un profesor d'Ohio (Estaos Xuníos), viendo que les actividaes físiques que se facíen n’iviernu nun yeren abondes porque nun podíen salir albentestate, pensó nuna actividá física que se pudiera facer nun sitiu zarráu, que nun fuera mui bruta, que nun se corriera cola pelota nos pies y na que nun hubiera porteros. Basándose nun xuegu de la so neñez, asitió dos paxos nos estremos del ximnasiu, afitaos a 3m d'altor nos qu'había que meter la pelota direutamente con una llinia curva usando la maña más que la fuercia. Nun principiu, los paxos teníen la parte d'abaxo y había que recoyer la pelota coles manes depués d'encestar. En 1906 apaecieron aros de metal con tableros.

El so espardimientu foi rápidu y yá en 1936 créase en Xinebra la Federación Internacional de Baloncestu (FIB) al tiempu que tornaba deporte olímpicu. Foi tamién en 1936 cuando naz la Federación Española de Baloncestu.

Participantes

El baloncestu cunta colos participantes que siguen darréu:

• Ala-Pivot: Tien una función más física que l'aleru, en munchos casos con un xuegu mui paecíu al pivot. Mantién la mayoría de los puntos nel poste baxu, magar que dalgunos puen llegar a convertise en tiradores mui efeutivos. Ayuden al pivot pa torgar el xuegu interior del equipu contrariu y zarren el rebote. Na terminoloxía emplegada polos entrenadores, conócense como “4”.
• Aleru: Xugador que n’ataque ocupa les zones llaterales de la cancha.
• Anotador: Ún de los árbitros de mesa que tien de llevar cuenta escrita de los equipos, los puntos, les faltes, los tiempos y demás asocedíos del xuegu. Pue haber dos por partíu.
• Árbitru: Persona encargada de xulgar les aiciones del partíu acordies col reglamentu. En cada partíu va haber un árbitru principal y ún o dos auxiliares. Tien de dir uniformáu.
• Árbitru auxiliar: Hai ún o dos en cada partíu y la so función ye ayudar al árbitru principal pa que se cumpla’l reglamentu del xuegu.
• Árbitru principal: Ye la persona que mira por que se cumplan les regles del xuegu y que, demientres el partíu, ta dientro la pista. En casu de duda col auxiliar, tien siempre la razón.
• Base: Ye l'encargáu d'empecipiar l'ataque del so equipu llevando la pelota hasta’l campu contrariu.
• Capitán: Representante del equipu que pue empobinase a los árbitros con rellación a interpretaciones sobre les sos decisiones o pa tener información. Si esti xugador abandonara’l terrén de xuegu, tien de comunicá-y al árbitru quién lu sustitúi.
• Comisariu: Persona encargada de supervisar a los oficiales de mesa y ayudar al árbitru principal y los auxiliares. Va tar sentáu na mesa.
• Cronometrador: Ye ún de los árbitros de mesa que, con un reló de partíu y un cronómetru, tien de llevar la cuenta de los tiempos de xuegu y los tiempos muertos.
• Delegáu: Persona que tien funciones complementaries enantes, durante y depués de los partíos (buscar hotel, entregar les fiches al árbitru, apuntar les canastes y les faltes personales de los xugadores...)
• Encargáu de los 24 segundos: Árbitru de mesa que tien un dispositivu pa mirar por que se cumpla la regla de los 24 segundos.
• Entrenador: Persona encargada de dirixir los entrenamientos, definir l'esquema del xuegu, etc. Tien de vistir de forma distinta a los xugadores que tán na cancha a nun ser que seya tamién el capitán.
• Equipu: Conxuntu organizáu de persones que s’axunten pa xugar en comuña al baloncestu. Ta compuestu como muncho por 12 xugadores y 5 asistentes que se puen sentar nel bancu.
• Escolta: Xugador davezu más baxu, rápidu y áxil que’l restu, sacante a veces el base. Tien de consiguir puntos pal equipu con un buen tiru (incluyendo’l de tres puntos), tener un buen dominiu del balón y una gran capacidá d'entrar a canasta. Na terminoloxía emplegada polos entrenadores, conócense como “2”.
• Oficial de mesa: Caún de los xueces qu'ayuda a los árbitros dende la mesa d'anotadores. Van ser un anotador, un ayudante d'anotador, un cronometrador y un encargáu del dispositivu de 24 segundos. Tamién ha llevar uniforme.
• Pivot: Xugador xeneralmente mui altu, que s’asitia cerca del tableru pa recoyer rebotes y facer puntos.
• Preparador físicu: Persona encargada de tener a los xugadores en buena forma física.
• Reserva: Xugador que sustitúi a otru como consecuencia d'una decisión táutica.
• Tirador: Xugador especializáu en facer llanzamientos a canasta.

Terrén de xuegu

El terrén de xuegu tien los siguientes elementos:

• Aries restrinxíes: Espacios marcaos nel terrén de xuegu llendaos poles llinies de fondu, les de tiros llibres y les que salen de les llinies de fondu. De pintales, hai que lo facer nel mesmu color que’l círculu central.
• Círculu central: Asitiáu nel centru del terrén de xuegu, tien un radiu de 1,80m. Dende equí l'arbitru llevanta’l balón ente dos xugadores contrarios al entamar el partíu, en caún de los tiempos o na prórroga.
• Llinies: Marquen les zones del campu, han tar trazaes nel mesmu color, meyor si son blanques, y tener 5 cm d'anchor.
• Llinia central: Va paralela a les llinies de fondu.
• Llinia de tiros llibres: Paralela a les llinies de fondu, ta asitiada a 5,80m de la parte interior de la llinia de fondu y mide 3,60m.
• Llinies de fondu: Encuadren los 15 metros d'anchor de la pista.
• Llinies de saque: Llinies fuera del terrén de xuegu, na llinia llateral enfrente a la mesa d'oficiales.
• Llinies llaterales: Encuadren los 28 metros de llargor de la pista.
• Mesa d'anotadores: Mesa asitiada a l'altura de la llinia central de los dos campos, onde l'anotador, el cronometrador y otros xueces rexistren dellos datos sobre’l desarrollu d'una competición.
• Pasiellos de tiru llibre: Aries restrinxíes ampliaes con un semicírculu con radiu de 1,80m. Hai que dibuxar semicírculos iguales pero discontinuos, dientro de les aries restrinxíes.
• Pista delantera: Parte de la pista que contién la canasta del equipu adversariu que llenda cola propia pola llinia central.
• Pista trasera: Parte del terrén de xuegu que contién la propia canasta y llenda cola pista delantera pola llinia central.
• Zona de bancos de los equipos: Ta marcada fuera del terrén de xuegu, nel mesmu llau que la mesa d'anotadores.
• Zona de canasta de tres puntos: Ye tol terrén de xuegu sacante l'área más cercana a la canasta de los adversarios, que ta marcada na pista.

Situaciones de xuegu

Nel baloncestu puen dase les situaciones de xuegu que siguen darréu:

• Anotar: Aición de meter la pelota nel aru.
• Asistencia: Pase que fai un xugador a un collaciu, asitiáu cerca l'aru d'ataque, que tien toles ventayes pa meter canasta.
• Ataque: Conxuntu d'aiciones que tienen como oxetivu cimeru meter el balón na canasta.
• Bloquéu: Aición llegal que fai un xugador sobre un rival col envís de torgar que continúe la so progresión.
• Canasta: Aición d'entrar el balón penriba l'aru. El valor de cada canasta camuda dependiendo de los casos: 1 puntu nos tiros llibres y 2 ó 3 puntos dependiendo de la zona. Si por accidente la canasta se ficiere nel propiu aru, l'equipu contrariu anota 2 puntos.
• Contrataque: Ataque rápidu que fai un equipu xusto depués de recuperar el balón.
• Cortina o bloquéu: Aición ofensiva na qu'un atacante estorba col cuerpu l'aición del contrariu, pa qu'otru compañeru pueda tirar a canasta cómodamente.
• Defensa: Aición pa torgar l'ataque del rival.
• Defensa en zona: Sistema defensivu nel que los xugadores en misión de defensa se coloquen en bloque nes zones que teníen repartíes de mano, en función de la posición de la pelota nel campu.
• Defensa individual: Sistema defensivu nel que cada xugador tien asignada la defensa d'otru del equipu contrariu.
• Derechu d'opción: Derechu que tien un equipu al que-y dieron dos tiros llibres, a escoyer ente llanzar los tiros o poner el balón en xuegu dende fuera de banda al altor del puntu mediu de la llinia llateral.
• Driblar: Avanzar botando’l balón esquivando al rival.
• Drible d'avance: Cuando se fai’l drible nun momentu d'ataque.
• Drible de proteición: Cuando se fai’l drible como aición defensiva.
• Drible de retención: Cuando se fai’l drible demientres s’espera que se faiga un movimientu determináu.
• Encestar: Aición de meter la pelota nel aru.
• Interposición: Aición na qu'un xugador toca’l balón de la que ta de camín a la canasta nun tiru llibre o cuando, nun tiru de campu, ta cayendo yá p'abaxo hacia canasta.
• Llanzamientu: Tiru que fai un xugador a canasta azotandó’l balón.
• Marcar: Defender enforma a un xugador a menos de 1 metru de distancia.
• Palméu: Güelpe que se-y da al balón colos deos pa ponelu na canasta de los contrarios.
• Pantalla o bloquéu: Aición llegal que fai un xugador atacante sobre un defensa ensin qu'haya contautu ente ellos dos.
• Pase: Movimientu que fai un xugador pa pasa-y el balón a otru pente medies d'un llanzamientu o bote.
• Pivotar: Movese’l xugador que tien la pelota manteniendo un pie en contautu col suelu de contino, demientres l'otru muévelu d'un llau a otru. L’envís últimu d'esta aición ye torgar que’l contrariu garre’l balón.
• Posesión alterna: Métodu pa que’l balón pase a tar vivu per aciu del saque, ensin facer un saltu ente dos.
• Rebote: Aición de recuperar el balón llanzáu a canasta n’ataque o en defensa.
• Recatie: Movimientu d'un balón que fai’l xugador que lu tien na mano llanzándolu, palmiándolu o rodándolu pel suelu.
• Regla de los venticuatro segundos: Norma pola que l'equipu que tien el balón tien de facer por tirar a canasta enantes que pasen venticuatro segundos.
• Saltu ente dos: Puesta en xuegu del balón pol árbitru colos xugadores preparaos na posición reglamentaria. L’árbitru tien de llanzar el balón a lo alto ente los xugadores, que tienen qu'esperar qu'entame a cayer pa poder tocalu.
• Sustitución: Cambéu de xugadores que se fai parando’l partíu.
• Tapón: Aición d'esviar un balón llanzáu a canasta.
• Tiru: Llanzamientu de la pelota a la canasta col envís de qu'entre. Val 2 puntos.
• Tiru llibre: Tiru direutu al aru que se fai dende detrás de la llinia de tiru llibre. El xugador encargáu de tiralu ta designáu pol árbitru como víctima d'una falta y tien de facelo enantes de 5 segundos de tener garráu’l balón. Val 1 puntu.
• Triple: Canasta conseguida dende una distancia superior a 6,25m. Val 3 puntos.
• Triple amenaza: Posición dende la que se pue pasar, tirar o botar

Referencies

Bibliografía

Rodríguez López, M.X. (Coor.) (2012). El palabreru del baloncestu. Asturies: Oficina Municipal de la Llingua del Ayuntamientu de Xixón.

Ver tamién

• Campeonatu del Mundu de Baloncestu de la FIBA

Enllaces esternos

• Wikimedia Commons acueye conteníu multimedia sobre Baloncestu.