Walter Winchell
Vida
Nacimientu	Nueva York, 7 d'abril de 1897[1]
Nacionalidá	Estaos Xuníos
Llingua materna	inglés
Muerte	Los Angeles, 20 de febreru de 1972[1] (74 años)
Causa de la muerte	cáncanu de próstata
Estudios
Llingües falaes	inglés
Oficiu	presentador de televisión, periodista, llocutor radiofónicu, actor, guionista
Premios	ver Estrella del Paséu de la Fama de Hollywood
Miembru de	New York Drama Critics' Circle (en)
IMDb	nm0934595

Walter Winchell (7 d'abril de 1897, Nueva York – 20 de febreru de 1972, Los Angeles) foi un periodista d'Estaos Xuníos, consideráu como l'inventor de la columna de sociedá actual.

Biografía

Winchell nació en Nueva York en 1897, y na so mocedá actuó en delles compañíes de vodevil y espectáculos. Empezó la so carrera periodística na década de 1920, en publicando delles informaciones de cotilleo rellacionaes coles xires de los grupos d'espectáculos. En 1924 foi contratáu pol New York Evening Graphic como columnista de la seición de sociedá y cronista de sucesos. Cinco años dempués pasó a formar parte de la plantía del New York Daily Mirror, propiedá de William Randolph Hearst, y la so columna empezó a distribuyise a otros periódicos de tol país pertenecientes a King Features.

En mayu de 1930 foi contratáu por Blue Network (propiedá de NBC hasta 1943, y darréu de ABC) pa narrar noticies de sociedá y espectáculos, dientro d'un espaciu patrocináu pola empresa Lucky Strike. Gracies al so estilu a la de cuntar les hestories y les sos esclusives, Winchell llogró un espaciu propiu nesa cadena y pasó a ser unu de los reclamos pa les ventes de los diarios de Hearst. Calteniendo'l mesmu estilu, introdució noticies de política pa ser unu de los primeros qu'atacó direutamente a Adolf Hitler y los partíos ultraderechistes estauxunidenses. Cola entrada d'Estaos Xuníos na Segunda Guerra Mundial, les sos columnes pasaron a tar apoderaes por esa tema.

Walter Winchell tuvo una evolución política: anque na década de 1930 defendió idees consideraes como izquierdistes y sofitó al presidente Franklin D. Roosevelt, al términu de la Guerra Mundial, pasó depués a tener una ideoloxía conservadora y antisoviética, llegando a sofitar tesis como'l macartismo na so columna y programa. El programa de radio pasó a ser retresmitíu de forma simultánea pa televisión en 1955 por ABC, pero la perda d'espectadores fixo que'l so espaciu de TV fuera canceláu. La so fama empezó a cayer, pasó a realizar otros trabayos como la narración de la serie Los Intocables o un espaciu de variedaes, y terminó per cayer nel olvidu como periodista. En 1957 dexó la radio y en 1963 desvenceyóse definitivamente de la empresa Hearst.

El suicidiu del so fíu en 1968 llevólu a anunciar la so retirada definitiva de los medios de comunicación. En 1972, Winchell finó en Los Angeles víctima d'un cáncer de próstata.

Estilu

Winchell marcó un enclín a la de revelar secretos de los famosos y diversos espectáculos, y el so estilu foi siguíu por otros periodistes como Ed Sullivan y Louella Parsons. El so estilu ye conocíu n'Estaos Xuníos como gossip column (lliteralmente, "columna de cotilleos"), y taba basáu en frases curties llenes de llinguaxe coloquial y evasives pa refugar la desaprobación de los editores, escribiendo pa tou tipu de llectores. Nel so programa de radio narraba les noticies de forma rápida y valiéndose d'un telégrafu, que faía sonar pa crear una sensación d'urxencia. Dada la so influencia de cara al públicu, los comentarios de Winchell podíen afectar a la carrera profesional d'un artista o inclusive de políticos y periodistes, especialmente dempués de la Segunda Guerra Mundial.

Referencies

Enllaces esternos

• Reseña de Winchell en Museum of Broadcasting Communications
• Walter Winchell na Internet Movie Database (n'inglés)