Carrera nel programa espacial soviéticu

Dempués del vuelu de Yuri Gagarin en 1961, Serguéi Koroliov, principal inxenieru de cohetes, tuvo la idea de realizar un vuelu llevando a una muyer al espaciu. El 16 de febreru de 1962, Valentina Tereshkova foi escoyida para xunise al cuerpu de cosmonautes femenín. De les más de cuatrocientes candidates, fueron escoyíes cinco: Tatiana Kuznetsova, graduada como pilotu de caza del Institutu Aereu de Moscú, Irina Soloviova, que yera miembru del equipu nacional de paracaidismu de la Xunión Soviética, Zhanna Yérkina, maestra d'escuela, Valentina Ponomariova esperta paracaidista y Tereshkova. Los requerimientos incluyíen que fueren paracaidistes menores de 30 años d'edá, menores de 1.70 metros d'altu y de menos de 70 kg de pesu.^[11]

Tereshkova foi considerada como una candidata particularmente digna, en parte por cuenta del so orixe «proletariu», y porque'l so padre, el líder y sarxentu de tanque Vladimir Tereshkov, foi un héroe de guerra.^[12] Morrió n'aición mientres la Guerra d'Iviernu que se desenvolvió en Finlandia mientres la Segunda Guerra Mundial nel área de Lemetti en Carelia. Nesi momentu, Tereshkova tenía dos años. Dempués de la so misión, consultóse-y que podía faer la Xunión Soviética en forma d'agradecimientu pol so serviciu al país. Tereshkova pidió que'l gobiernu buscara'l llugar onde'l so padre morrió n'aición. Esto fixo, y el gobiernu construyó un monumentu qu'anguaño ta en Lemetti -anguaño nel llau rusu de la frontera-. Tereshkova visitó Finlandia delles vegaes.

La capacitación incluyó vuelos d'ingravidez, pruebes d'aislamientu, pruebes en centrifugador, teoría de cohetes, naves espaciales d'inxeniería, 120 saltos en paracaíes y formación de pilotos n'aviones de combate MiG-15UTI. El grupu pasó dellos meses nun entrenamientu intensivu, acabando con exámenes en payares de 1962, dempués de lo que les cuatro candidates restantes graduáronse como subtenientes de la Fuercia Aerea Soviética. Tereshkova, Soloviova y Ponomariova fueron les otres principales candidates, y desenvolvióse un programa de misiones que llograría que dos muyeres volaren al espaciu, en dos vuelos Vostok en díes siguíos en marzu o abril de 1963.^[13]

Pa xunise al Cuerpu de Cosmonautes, Tereshkova foi almitida de mou honorariu na Fuercia Aerea Soviética polo que foi la primera civil en volar al espaciu.^[14]

Orixinalmente pretendíase que Tereshkova viaxara primero nel vuelu Vostok 5 ente que Ponomaryova siguiría n'órbita nel Vostok 6. Sicasí, esti plan de vuelu alteróse'n marzu de 1963. Vostok 5 agora llevaría a un cosmonauta masculín, Valeri Bykovski realizando la misión en xunto con una cosmonauta a bordu del Vostok 6 en xunu de 1963. La Comisión Estatal del Espaciu nomó a Tereshkova para pilotar Vostok 6 nel so aconceyamientu del 21 de mayu y esto foi confirmáu por Nikita Khrushchov. Tereshkova yera exautamente diez años más nueva que l'astronauta más nuevu del Mercury 7, Gordon Cooper.

Sellu de la Xunión Soviética conmemorando'l vuelu espacial de la primer muyer cosmonauta.

Dempués del esitosu llanzamientu del Vostok 5 el 14 de xunu, Tereshkova empezó los preparativos finales para'l so propiu vuelu. Ella tenía 26 años nesi momentu. Na mañana del 16 de xunu de 1963, Tereshkova y Soloviova fueron vistíos colos traxes espaciales correspondientes y llevaos a la plataforma de llanzamientu n'autobús. Dempués de completar les sos comunicaciones y comprobar l'encontu vital, quedó sellada dientro de la Vostok. Dempués d'una cuenta de dos hores, el Vostok 6 foi puestu en marcha ensin errores, y Tereshkova convirtióse na primer muyer en llegar al espaciu.^[15] La so señal de llamada nesti vuelu yera Chaika (inglés: Gavilueta, rusu: Чайка), más tarde conmemoráu como'l nome d'un asteroide, 1671 Chaika.^[16]

Anque Tereshkova esperimentó estomagaes y malestar físico mientres gran parte del vuelu, y dolor nel pescuezu polo pesao del cascu, orbitó la Tierra 48 vegaes y tuvo casi trés díes nel espaciu.^[17] Con un solu vuelu, rexistró más tiempu de vuelu que la sumatoria de tolos tiempos de tolos astronautes estauxunidenses que volaren antes d'esa fecha. Tereshkova tamién caltuvo un rexistru de vuelu y tomó fotografíes del horizonte, que seríen utilizaes para identificar les capes d'aerosol de l'atmósfera.^[18]

Vostok 6 foi'l vuelu final de la misión Vostok, y foi llanzáu dos díes depués de Vostok 5, que condució a Valeri Bykovski a una órbita asemeyada mientres cinco díes, aterrizando trés hores dempués que Tereshkova. Les dos naves averáronse a cinco quilómetros nun puntu, y Tereshkova comunicó per radio con Bykovski y con Khrushchov.

A pesar de qu'esistíen planes pa futuros vuelos con cosmonautes muyeres, pasaron 19 años hasta que la segunda muyer, Svetlana Savítskaya, voló al espaciu. Nenguna de les otres cuatro muyeres del grupu de Tereshkova voló, y n'ochobre de 1969 el grupu foi disueltu.

Serguéi Koroliov taba descontentu col comportamientu de Tereshkova n'órbita y nun se-y dexó tomar el control manual de la nave, tal que taba entamáu. Anque taben previstos más vuelos nos que participaren muyeres, pasaron 19 años hasta qu'otra muyer, Svetlana Savítskaya, viaxara al espaciu. Nenguna de les otres cuatro cosmonautes del grupu de Tereshkova viaxó al espaciu. Ella mesma era consciente d'esta situación y asina lo espresó na primer entrevista que dio a un periodista español n'ochobre de 1967.^[19]

Tres la misión espacial estudió na Academia de la Fuercia Aerea de Zhukovski, y graduóse como inxeniera espacial en 1969. En 1977 recibió'l doctoráu n'inxeniería. Por cuenta de la so prominencia desempeñó diversos cargos políticos: de 1966 a 1974 foi miembru del Sóviet Supremu, de 1974 a 1989 formó parte del Presidium del Sóviet Supremu, y de 1969 a 1991 perteneció al Comité Central del Partíu Comunista. Tuvo políticamente activa dempués del colapsu de la Xunión Soviética y sigue siendo considerada como un héroe na Rusia post-soviética.

En 1997 retiróse de la fuercia aerea y del cuerpu de cosmonautes. Na ceremonia d'inauguración de los Xuegos Olímpicos d'Iviernu de 2014, foi portadora de la bandera olímpica.^[20]

El 3 de payares de 1963 casóse col cosmonauta Andrián Nikoláyev (1929-2004) y un añu más tarde dio a lluz a la so fía Yelena Andriánovna Nikoláyeva-Tereshkova (8 de xunu de 1964), qu'agora ye doctora en medicina y que foi la primer persona nacida de dos cosmonautes que salieren al espaciu.^[21] Valentina divorcióse del so primer home'n 1982. El so segundu home, el Dr. Shapóshnikov, morrió en 1999.

En 2013, Tereshkova, con 76 años, sorprendió a toos espresando'l so deséu de viaxar a Marte, anque'l viaxe fuera namái d'ida.^[22]