.jpg.webp)
Trucha ye'l nome común dau a delles especies de pexes d'agua dulce pertenecientes a la familia del salmón, Salmonidae.
Tolos pexes denomaos propiamente trucha son miembros de la subfamilia Salmoninae, pero'l nome úsase específicamente pa pexes de tres xéneros de tala subfamilia: Salmo, qu'inclúi les especies Atlántiques, Oncorhynchus qu'inclúi les especies del Pacíficu, y Salvelinus.
Les truches afáyense davezu n'agües fríes y llimpies de ríos y llagos, y alcuéntrese distribuyíes a lo llargo de Norteamérica, el norte d'Asia y Europa. Delles especies de trucha foren introducíes nel sieglu XIX na Patagonia Chilena y Arxentina, Australia y Nueva Zelanda por pescaores aficionaos, desplazando a los pexes autóctonos.
Les aletes de les truches carecen d'espines, y toles especies tienen una pequeña aleta adiposa en llombu, averada a la cola. Les poblaciones aisllaes presenten desemeyances morfolóxiques. Sicasí, munchos d'estos grupos nun amuesen diverxencies xenétiques significatives, polo que los ictiólogos considérenlos namái como variedaes d'un númberu d'especies munchu menor.
La trucha del oeste de los Estaos Xuníos ye un bon exemplu d'esto. La trucha brook, l'aurora y la estinguida trucha platiada tienen carauterístiques físiques y de coloración que permite distinguiles fácilmente. L'analis xenéticu amuesa, sicasí, que se trata de la mesma especie:Salvelinus fontinalis. La trucha arcoiris, de llagu, toro y marrón o café tamién formen parte d'esti grupu.
La mayoría de les truches namái s'alcuentren n'agua dulce, pero unes poques, como la tiesta d'aceru (o steelhead) (Oncorhynchus mykiss)—que ye la mesma especie que la trucha arcoiris—pasa tola so vida adulta nel océanu y torna a fregar nel ríu nel que nació. Esti fenómenu denómase reproducción anádroma y adícase tamién nel salmón. La trucha, polo xeneral aliméntase d'invertebraos blandios como los merucos, y marabayos, o d'inseutos y crustáceos, magar que les especies más grandes de trucha marrón o café comen otros pexes.
Les truches tienen el cuerpu llaráu d'espines, pero la so carne ye abondo sabrosa. Arriendes, ye un animal que llucha con rixu cuando ye pescáu a caña, polo que son abondo cotizaes na pesca deportiva. L'esguín de trucha recibe'l nome d'esguirriu.
Ente les diferentes especies de truches alcuéntrense: la trucha marrón (Salmo trutta), trucha iris (Oncorhynchus mykiss), trucha dorada (Oncorhynchus mykiss aguabonita), trucha degollada Lahontan (Oncorhynchus clarki henshawi), y trucha degollada Bonneville (Oncorhynchus clarki)
Referencies
Enllaces esternos
Wikimedia Commons tien conteníu multimedia tocante a Trucha.
