| Tamién | Tang Soo Do |
|---|---|
| País d'orixe | Corea |
| Fundador | Hwang Kee (Moo Duk Kwan Tang Soo Do) |
| Fecha de fundación | 9 de payares de 1945 (fundación de la escuela Moo Duk Kwan) |
| Prauticantes famosos | Choi Hong Hi, H.C. Hwang, Hong Chong Soo, Hwang Kee, Kim Young Taek, Lee Kang Ik, Won Kuk Lee, Dennis Hawn, Dale T. Drouillard, Chuck Norris |
| Antepasaos | Kárate Shotokan, Subak, Taekkyon, Kung Fu |
| Artes descendientes | Chung Do Kwan, Oh Do Kwan, Moo Duk Kwan Taekwondo, Tang Soo Do Mi Guk Kwan, Chun Kuk Do, Soo Bahk Do |
| Deporte olímpicu | Non |
 | |
El Tangsudo o Tang Soo Do (당수도, “Vía de la Mano de China”) ye un arte marcial tradicional coreanu.
Esti arte marcial cinca na disciplina y práutica de kates y movimientos de defensa personal. Hwang Kee, el fundador d'esti arte (per aciu de la escuela Moo Duk Kwan), dixo que lu creara de la llectura de testos antiguos de subak (un arte marcial coreanu antiguu) de la que vivía en Manchuria na década de 1930. El kárate xaponés y los enfoques internos chinos pue qu'influyeren tamién nel Tangsudo. En munchos aspeutos el Tangsudo aseméyase al kárate y al taekwondo, sacantes el bien pocu interés qu'aquel tien nes competiciones deportives.
Historia del tangsudo
Antigües dómines
El nome tangsudo, que significa “la vía de la mano de China”, fai referencia a la Dinastía Tang, que reinó de 618 a 907. Les téuniques chines amestáronse a otres coreanes pa crear esti nuevu arte marcial, que namái tien unes poques semeyances col Tangsudo modernu.
Resurdimientu modernu
Na península de Corea, munches escueles d'artes marciales foron prohibíes 35 años polos invasores xaponeses. Ensin embargu los maestros siguieron formando a los sos discípulos y asina foron, pa la fin de la Segunda Guerra Mundial, a desendolcar les artes marciales coreanes modernes. Dalgunos decidieron fundar el Tangsudo modernu.
Hwang Kee, prauticante de Taekkyon dende neñu y tamién, de la que tuviera en Manchuria, d'artes marciales chines, organiza y funda’l Moo Duk Kwan el 9 de payares de 1945 en Seúl, escomenzando asina la enseñanza del tangsudo.
Por aciu de la dixebra resultante de la guerra de Corea, en setiembre de 1953 interrumpióse’l desendolcu de les artes marciales. Al algamar Corea del Sur la independencia, el nuevu gobiernu, con un rixu nacionalista, atalantó que yera meyor prohibir toles escueles y artes marciales con téuniques aniciaes en Xapón y en China. Pero munchos d'estos maestros y profesores axuntárense a otros que siguíen entrenando en Corea, y foron abriendo adulces delles delles escueles (kwans) d'otros estilos d'artes marciales, gobernaes pola "Moo Duk Kwan" y ordenaes pol “Kwan Ja Nim” Hwang Kee. En realidá estableciérense cinco escueles (Chung Do Kwan, Jidokwan, Chang Moo Kwan, Moo Duk Kwan, y Song Moo Kwan). col deber y l'oxetivu de caltener les téuniques de pataes y puñaes. De 1945 a 1950, enantes de la guerra de Corea, estes escueles llamábense "o geh khan dojang". La organización más grande y influyente yera la Moo Duk Kwan. El so puxu naz del aspeutu científicu del arte y del desarrollu filosóficu y cultural marcial. En 1953 entama l'esporpolle de les artes marciales coreanes. En 1957 espublízase, afaláu pol xeneral Choi Hong Hee, un decretu qu'obliga a los maestros y escueles (kwans) a adautase y aunise a un solu nome y téunica prauticada en Corea, el Tae Soo.
Esi mesmu añu de 1957 ye d'especial significancia pal “Kwan Ja Nim” Hwang Kee y el so arte marcial, darréu que descubrió’l “Moo Yei Dobo Tong Ji”, perimportante y valiosu documentu con téuniques d'artes marciales d'unos 300 años d'antigüedá. Yera l'únicu documentu con téuniques tan antigües como de 2.000 años aproximao.
En mayu de 1961 entama un refileru d'engarraes y persecuciones polítiques que dura 30 años, faciendo asina que la Moo Duk Kwan seya marxinada. El regresu del gobiernu militar tuvo darréu un impautu negativu na vida d'Hwang Kee y de la Moo Duk Kwan. El gobiernu y los sos xenerales cometieron los mesmos errores que l'antiguu gobiernu xaponés d'ocupación, persiguiendo y obligando a los maestros coreanos a aunise al nuevu arte marcial del Tae Soo, colo que cayó de manera la influencia de la Moo Duk Kwan y del Tangsudo, a los que’l gobiernu consideraba una gran amenaza. En xineru de 1964 créase l'Asociación Coreana de Tae Soo. Al añu siguiente camuda’l nome a “Asociación Coreana de Tae Kwon Do”.
En 1964 tuvieren llugar alderiques y movimientos pa la unificación del "Tangsudo" y del "Taekwondo", afalaos por un grupu de maestros de taekwondo encabezáu pol xeneral Choi Hong Hee. Hwang Kee aceutó los argumentos pa la unificación, y barruntábala posible mentanto se cumpliera’l criteriu d'igualdá pa entrambos grupos, pero dempués d'un númberu cafiante de xuntes y alderiques decidióse refugar la unificación, cola sida de que’l Tangsudo yera un arte marcial coreanu tradicional dafechu.
El “Kwan Jan Nim” Hwang Kee atalantó que la so responsabilidá yera caltener les téuniques orixinales y tresmitir el Moo Duk Kwan como lu desendolcaren les xeneraciones pasaes, siguiendo’l deprendimientu de les xeneraciones futures, al envís de qu'él y tol pueblu coreano sintiera arguyu d'esti arte marcial poderosu y noble.
En resultes del fracasu de la unificación del Tangsudo y el Taekwondo, un movimientu de los maestros de Taekwondo, col xeneral Choi Hong Hee a la cabeza, entamaron presiones polítiques, faciendo afartes maniobres torcíes pa tracamundiar a munchos instructores de la Moo Duk Kwan. Pasu ente pasu la disciplina de la Moo Duk Kwan cayó en desgracia per aciu de les influyencies polítiques de los maestros de Taekwondo. Los miembros foron despidíos, persiguíos y obligaos a cambiar el nome a Taekwondo. Asina escomencipia otra falcatrúa de la política coreana y la traición de dellos miembros de la Moo Duk Kwan y de maestros de Taekwondo. Púnxose’l nome de Taekwondo Moo Duk Kwan, pero en realidá la téunica yá nun yera orixinal, porque estos disidentes escaecieron les téuniques orixinales aceutando los nuevos movimientos.
Hwang Kee caltúvose fitu como cabezaleru de la organización mientres duró esti acosu políticu; les sos mires, bien sabies, taben puestes nel futuru y creyía na importancia y nel valor pergrande de conservar esti arte marcial y les sos téuniques perantigües, y sabía tamién que col tiempu estes artes coreanes habíen recibir el reconocimientu del mundu occidental y de les autoridaes llocales. Hubo intentos de destruir el Bu Kwan Yeok (llibru de rexistru) pa desaniciar los archivos de la escuela y les téuniques de la Moo Duk Kwan, pero nun tuvieron ésitu. Esti llibru abriéralu Hwang Kee cuando’l so alumnu Kim Um Chong foi reconocíu como primer graduáu de la escuela.
Por fin, en payares de 1965, el "Kwan Jan Nim" Hwang Kee foi reconocíu poles autoridaes por mor de la so neciura y insistencia en caltener el so métodu d'artes marciales, pasando a ser llegal y a conservar l'asociación, magar que la engarrada siguió siendo llarga y abegosa. En 1966 la Corte Suprema concedió a Hwang Kee'l derechu d'esparder el Moo Duk Kwan y el Tangsudo a otros países, escomenzando de siguío un desafíu nuevu pal Tangsudo. Los países escoyíos foron: Estaos Xuníos, Grecia, Gran Bretaña, Francia, Bélxica, Alemaña, Italia, Suiza, Holanda, Puerto Rico, Arxentina, Malasia, Australia, Brunéi, y Méxicu. El Tangsudo sigue anguaño cruciando fronteres y espoxigando cada día más en tol mundu. Pa Hwang Kee nun yera un entueyu qu'otres organizaciones tuvieren rellación col Moo Duk Kwan; namái dicía que tenía qu'haber una única y verdadera Moo Duk Kwan.
Téuniques de combate del tangsudo
Les postures
Hai mui bien de postures nel tangsudo, asemeyaes en xeneral a les d'otres artes marciales. Dalgunes son básiques, por exemplu la "postura de preparación", mientres qu'otres dependen más del equilibriu, como la "postura sobre un solu pie" o la "postura de la grulla".
Les téuniques básiques
Les téuniques básiques son simples y eficaces. Los estudiantes aprienden toles téuniques básiques (bloqueos, golpes de puñu, golpes de pie) que pueden atopase nel arte clásicu del Tangsudo. Nos dojang (el “llugar de la vía”) se solliña "l'arte", non solamente’l combate. Les téuniques de mano impliquen, ente otres, una variedá de téuniques de puñu y de "mano-cuchiellu" (sonnal, sudo). Caúna d'elles tien una forma y una aplicación determinaes, y empléguense nel bloquéu y n’ataque. El tangsudo ye un arte marcial que cinca nes téuniques de pierna y na flexibilidá. Les piernes tamién son utilizaes pa bloquiar y atacar.
L'entrenamientu en Tangsudo
Nel métodu tradicional, l'estudiante tien d'aprender de mano los fundamentos (gibon), y siguidamente prauticar el combate a un pasu (hanbon gyeoreugi) y el combate a tres pasos (sambon gyeoreugi). El combate a un pasu apriende cómo concentrase, pero’l combate a tres pasos apriende cómo movese p'alantre y p'atrás, y a utilizar la distancia. En xunto dan al estudiante l'enfotu necesariu pa bloquiar y p'atacar amañosamente en combate llibre.
L'entrenamientu mental
Los maestros solliñen la importancia de los principios y el creu del Tangsudo; los estudiantes aprienden la disciplina y el respetu. L’enfotu, la concentración y el control son asina sorrayaos, darréu que son aspectos perimportantes de la vida cotidiana.
La práutica de les bases (kibon)
Práuticamente en cada lleición los estudiantes prautiquen les téuniques básiques moviéndose. Esto áidalos a pescanciar la dinámica d'un movimientu y afina la téunica pola repetición. Les bases aprienden al estudiante’l bon equilibriu y la bona postura.
Les formes (hyeong)
Les formes son riestres predeterminaes de téuniques básiques. Les del tangsudo deriven de dellos estilos d'artes marciales. Al efeutu, la mayoría son versiones de kata de kárate. Los hyeong demuestren l'aplicación de toles téuniques básiques en bien de situaciones. El prauticante de la forma imaxínase defendiéndose contra dellos adversarios. Estos modelos reglaos de téuniques prautíquenlos los estudiantes de tolos niveles. El deprendimientu de les formes aumenta la comprendoria y l'acordanza de les téuniques. Fáense con téuniques básiques y deprienden la estratexa, les táutiques, la sincronización y l'equilibriu. Si’l tangsudo se trata como “l'arte pol arte”, les formes depriéndense con facilidá y asemeyen un tipu de danza al presentales. Según l'estudiante va progresando en capacidá, los hyeong vuelen más complicaos y conviértense nun retu. Les formes son una parte del entrenamientu del tangsudo qu'un estudiante pue prauticar fácilmente cuasi ondequiera.
El combate (daeryeon)
El combate d'entrenamientu permite utilizar llibremente toles téuniques contra ún o más oponentes. Ye importante l'autocontrol. Tamién se prautica’l momentu xustu, l'asitiamientu y los métodos acionaos pa superar les defenses del contrariu. Úsense cascos acolchaos, y proteiciones de mano y de pie, pero respétase la regla d'evitar el contautu plenu.
El combate a un pasu (hanbon daeryeon)
Esti exerciciu aplica controlaes les téuniques baxo la forma de defensa personal contra un ataque conocíu. L’oxetivu ye desendolcar respuestes automátiques condicionaes por una situación dada. Permiten deprender la distancia xusta y la sincronización, que son los dos factores cruciales nun combate real. Tamién la seguridá y el control son parte del procesu. Ye una manera de prauticar mui controlada, segura, y ensin contautu.
El combate llibre (jayu daeryeon)
El combate llibre val pa prauticar les téuniques contra otros en condiciones controlaes, al envís de poder defendese nuna situación desconocida. Sollíñase tol tiempu la seguridá. Acordies col enfoque tradicional, l'estudiante nun precisa solmena-y golpaes a un sacu pesáu p'aumentar la potencia de los golpes y pa preparase pal combate llibre, porque los estudiantes prautiquen el control, ensin contautu. Frenen los golpes cuasimente al tocar l'oxetivu. D’esta miente, si nun combate real deciden que’l golpazu llegue a pintoriu, van poder facelo fácil.
Diz la teoría tradicional que si l'estudiante fai contautu de cutiu, será-y de xuru abegoso controlar les sos téuniques cuando lo precise. Pero si prautica siempre’l control, pue escoyer golpiar cuando seya necesario. Si l'estudiante fai contautu constante en combate llibre, el so espíritu volveráse xabaz. Pero si l'estudiante prautica’l combate controláu, el so espíritu volveráse más controláu. Los dos estaos d'ánimu pueden calistrar la vida diaria de so. Como se torga’l contautu plenu, los estudiantes nun necesiten usar proteiciones acolchaes fuertes. L’usu de guantes de boxéu y proteiciones grueses de pies afalen a cutir con fuercia, y cuando cuten llevando esta mena de proteiciones, nun son quien a sentir si la so téunica ye correuta. Pa evitar esti pilancu, los maestros tradicionales escueyen proteiciones llixeres pa los puños y los empeines, qu'abonden pa evitar mancadures cuando se fai contautu ensin querer.
Dende’l puntu de vista modernu, non tradicional, el combate llibre aseméyase al de kickboxing. Los estudiantes usen guantes de boxéu, proteiciones de pies y de cabeza.
Si’l combate llibre ta orientáu a la competición o al combate caleyeru, l'estudiante tien que s’esforciar en meyorar el so endurecimientu. Por esto tien que tener bones bases y ser amañosu nel combate a ún y tres pasos, porque aumenten el so endurecimientu. Esti nun aporta darréu, sinón que va llevar de dos a tres meses construyir dél. Lo importante ye una respiración acionada: l'estudiante tien que respirar xustamente al golpiar y bloquiar. Si retién l'aliendu cuando fai una téunica, podrá facela, pero minutu a minutu va dir galdiendo, acabando por perder la so capacidá de siguir. Al endefechu, cada vez qu'inspira y espira correutamente, allarga’l tiempu nel que pue combatir.
L'entrenamientu de la defensa personal (hoshinsul)
Esta actividá apriende a un estudiante la forma de defendese contra agarres y atrapes. Tamién inclúi un aprendimientu sobre la manera de tratar situaciones nes que ye necesario defendese ensin causar un dañu permanente al atacante, y l'usu de puntos de presión. El jayu daeryeon vistu enriba ye perfeutu pa meyorar les capacidaes de defensa personal. L’estudiante pue combinar toles téuniques: golpes de pie, de puñu, torciones…
El rompimientu de tables (kyeokpa)
El rompimientu de tables ye l'actividá preferida de munchos estudiantes y espectadores. El rompimientu prueba’l nivel téunicu de los estudiantes y áidalos a pescanciar l'efeutu que les sos téuniques pueden tener nun oxetivu. Faise nos exámenes de grau, y sollíñase la seguridá en tou momentu. Esta actividá apriende a concentrase, a enfocar la mente y a visualizar correutamente l'oxetivu. Esto tamién aida a los estudiantes a pasar les barreres mentales y a meyorar l'enfotu.
