La colonización

Dende'l sieglu XVI la fastera costera del Surinam foi esplorada por navegantes franceses, españoles ya ingleses. Un sieglu dempués, colonos ingleses ya holandeses establecieron colonies de plantación nes fértiles llanures de la Guayana, nes vegues de los ríos. La colonia más antigua documentada ye un asentamientu inglés, nomáu Marshall's Creek, a lo llargo del ríu Surinam^[12].

Les lluches ente ingleses y holandeses pol control d'esti territoriu finaron en 1667. Nesi añu, nes negociaciones que llevaron a la robla del tratáu de Breda, los holandeses decidieron conservar la colonia de plantación de Surinam, que-yos ganaran a los ingleses. A cambiu, los ingleses quedáronse con Nueva Amsterdam, la principal ciudá de l'antigua colonia de Nueva Holanda, na costa atlántica norteamericana: de siguíu camudáron-y el nome pol de Nueva York.

En 1683 fundóse, col envís de gobernar y defender la colonia, la Sociedá de Surinam, na que participaron la ciudá d'Ámsterdam, la familia Van Aerssen van Sommelsdijck y la Compañía Holandesa de les Indies Occidentales. Los colonos dexaban en manes d'esclavos africanos, a los que trataben permal^[13], el cultivu, el collecháu y el procesáu del café, el cacáu, la caña de zucre y l'algodón que se cultivaba nes vegues de los ríos.

Paramaribu en 1955.

Munchos esclavos escapáronse de les plantaciones y, cola ayuda de les poblaciones natives de les viesques circundantes, establecieron una cultura nueva y única nel interior del país. Son los conocíos como cimarrones, nomaos en francés Nèg'Marrons, que significa lliteralmente "negros marrones", esto ye, "negros de piel claro". Los cimarrones, al traviés d'un procesu d'etnoxénesis, fueron evolucionando pa formar varies tribus independientes a partir de la xuntura d'esclavos de diferentes etnies africanes. Estes tribus incluyeron los saramaka, paramaka, ndyuka, kwinti, aluku y matawai.

Loa cimarrones entamaron a atacar las plantaciones pa reclutar nuevos miembros d'ente los esclavos y pa capturar muyeres, armes, comida y ferramienta. A vegaes mataben tamién a los dueños de les plantaciones y les sos families. Estos entamaron a construyir defenses, importantes en dellos casos^[14] pero cuasi siempre insuficientes. Tamién organizáronse campañes armaes p'acabar con ellos, pero los cimarrones escapaben pente la viesca, que conocíen abondo meyor que los sos perseguidores. Finalmente, p'acabar coles lluches, les autoridaes coloniales europees roblaron nel sieglu XVIII dellos trataos de paz coles diferentes tribus. Nellos reconocíen l'estatus soberanu d'estes tribus y el derechu a comerciar nos sos territorios del interior de la colonia.

L'abolición de la esclavitú

Holanda abolió la esclavitú en Surinam en 1863, nún procesu gradual qu'obligaba a los esclavos, como forma de compensación parcial pa los propietarios, a trabayar nes plantaciones demientres diez años de transición a cambiu d'una paga mínima. Tres de 1873 la mayoría de los esclavos lliberaos abandonaron les plantaciones nes que ellos y los sos antepasaos trabayaran por varies xeneraciones y colaron pa la capital, Paramaribu.

Como colonia de plantación que yera, Surinam tenía una economía dependiente de cultivos agrícoles con manu d'obra intensiva. Pa solucionar la falta de trabayadores los holandeses reclutaron y transportaron trabayadores dende les Indies Orientales Holandeses (l'actual Indonesia) y, tres d'un alcuerdu colos ingleses, que controlaben la zona, la India. Amás, a finales del sieglu XIX y entamos del XX, aportaron tamién al territoriu trabayadores, la mayoría homes, reclutaos en China y n'Oriente Próximu.

De resultes de too ello la población del Surinam, magar que perpequeña en númberu, ye una de les más multiétniques y multiculturales del mundu^[15].

La descolonización

Demientres la Segunda Guerra Mundial, el 23 de payares de 1941, los Estaos Xuníos alcordaron col gobiernu holandés nel exiliu la ocupación del Surinam pa protexer les mines de bauxita del territoriu. En 1942 el gobiernu holandés nel exiliu entamó a revisar les rellaciones ente Holanda y les sos colonies cara al periodu postbélicu. De resultes d'ello, Surinam convirtióse en 1954 nuna parte constituyente del Reinu d'Holanda, xunto coles Antilles Holandeses y Holanda. Dábase-y con ello l'autogobiernu, desque Holanda solo caltenía'l control de los asuntos esteriores y la defensa. En 1974 el Partíu Nacional de Surinam, formáu mayoritariamente por criollos, esto ye, xentes d'etnia africana o mestiza, entamó les negociaciones con Holanda p'algamar la independencia total, que foi efectiva'l 25 de payares de 1975.

El Surinam independiente

Henck Arron, la reina Beatriz d'Holanda y Johan Ferrier el día de la independencia de Surinam (25 de payares de 1975).

El primer presidente del país foi Johan Ferrier, col antiguu gobernador y cabezaleru del Partíu Nacional Henck Arron como primer ministru. Nos primeros años tres de la independencia la economía dependió en bona medida de l'ayuda económica del gobiernu holandés. Amás, neso años coló del país cuasi una tercera parte de la población, qu'emigró a Holanda por miéu a que al nuevu país-y fora a dir peor de lo que taba como parte constituyente del reinu d'Holanda. Nun andaben mui escaminaos. La política surimanesa dexeneró bien ceo en lluches ente etnies y corrupción, col Partíu Nacional usando les perres de l'axuda holandesa nel so propiu provechu partidista. Los sos cabezaleros foron acusaos de fraude nes eleiciones de 1977, nes que volvió ganar Arron, y esto agudizó la salida de xente del país en direición a Holanda

El 25 de febreru de 1980 un golpe d'estáu, entamáu por un grupu de 16 sarxentos lideraos por Dési Bouterse, derrocó'l gobiernu d'Arron^[16]. Los militares contrarios al nuevu gobiernu intentaron contragolpes n'abril y agostu de 1980, el 15 de marzu de 1981 y otra vuelta'l 12 de marzu de 1982. El primer intentu dirixolu Fred Ormskerk^[17], el segundu dellos militares marxistes-leninistes, el terceru Wilfred Hawker y el cuartu Surendre Rambocus.

Hawker escapó de prisión demientres el cuartu intentu de contragolpe, pero foi capturáu y executáu. Dempués, la nueche del 7 d'avientu de 1982, ente les 2 y les 5 de la madrugada, l'exércitu, dirixíu por Dési Bouterse, detuvo a 13 ciudadanos destacaos que teníen criticao la dictadura, y encerrolos en Fort Zeelandia, en Paramaribu^[18]. Nos trés díes siguientes toos ellos, amás de Rambocus y Jiwansingh Sheombar, otru militar implicáu nel cuartu intentu de contragolpe, foron asesinaos.

Dési Bouterse, presidente del Surinam.

En 1987 celebráronse eleiciones. L'Asamblea Nacional aprobó una nueva constitución que permitió a Bouterse quedar como xefe del exércitu. Esti, descontentu col gobiernu, fizo dimitir a tolos ministros, por teléfonu, en 1990; esti fechu conociose de magar popularmente como'l golpe d'estáu telefónicu. Sicasí, el so poder entamó a menguar dempués de les eleiciones de 1991. Influyó nello la guerra civil ente l'exércitu y la guerrilla lleal al cabecilla Ronnie Brunswijk, qu'entamó en 1986. El momentu más baxu de Bouterse llegó en 1999, cuando foi xulgáu in absentia por tráficu de drogues n'Holanda. Magar que foi declaráu culpable y sentenciáu a dir a prisión, permaneció en Surinam y siguió marcando'l ritmu de la política del país.

Asina, el 19 de xunetu de 2010 volvió al poder al ser elixíu pola Asamblea como presidente del país^[19]. Primero d'ello elli, y otres 24 persones, foran xulgadas polos asesinatos d'avientu de 1982. Dos meses antes de que saliera'l veredictu, en 2012, l'Asamblea Nacional estendió una llei d'amnistía que-yos perdonó los crímenes. El 14 de xunetu de 2015 Bouterse foi reelixíu presidente^[20]