Cadarma esterna

Los sistemes esternos soporten proporcionalmente menos pesu que los endoesqueletos del mesmu tamañu; por esta razón los animales más grandes, como los vertebraos tienen sistemes esqueléticos internos.

Los principales exemplos d'exoesqueletu atópense ente los artrópodos, dellos invertebraos, nos que'l exoesqueletu forma un cascu o estructura esterna que protexe a los órganos internos.

Teniendo en cuenta que los exoesqueltos llinden obviamente la crecedera del animal, les especies con esta carauterística desenvolvieron evolutivamente variaes soluciones. La mayoría de los moluscos tienen conches caliares qu'acompañen a la crecedera del animal per aciu crecedera nel diámetru calteniendo la so morfoloxía. Otros animales, tales como los artrópodos abandonen el vieyu exoesqueletu al crecer, procesu que se conoz como "muda". El nuevu exoesqueletu endurezse per aciu procesos de calcificación y esclerotización.

L'exoesqueletu d'un artrópodu presenta frecuentemente estensiones internes, que se conocen como endoesquelétiques, magar que nun constituyan verdaderamente un endoesqueletu.

Sistema oseu internu

Una sistema oseu interu consiste n'estructures ríxides o semiríxides dientro del cuerpu, que muévense gracies al sistema muscular. Si tales estructures tán mineralizaes o osificaes, como nos humanos y otros mamíferos, denómase-yos güesos. Otru componente del sistema esqueléticu son los cartílagos, que complementen la so estructura. Nos seres humanos, por casu, la ñariz y oreyes tán sofitaes por cartílagu. Dellos organismos tienen una cadarma interna compuesta dafechu de cartílagu, ensin güesos calcificaos, como nel casu de los tiburones. Los güesos y otres estructures ríxides tán coneutaes por lligamentos y xuníes al sistema muscular al traviés de tendones.

La cadarma del home ye interna, polo tanto denómase-y endoesqueletu, ye una estructura que ta xunida por güesos, que formen un armazón resistente y coles mesmes presenta articulaciones.

Sistema oseu fluyíu o hidrostaticu

L'hidroesqueletu consiste nuna cavidá llena de fluyíu, celomática o pseudocelomática, arrodiada de músculos. La presión del fluyíu y l'aición de los músculos que lu arrodien, sirven pa camudar la forma del cuerpu y producir un movimientu como cavar o nadar. La socesiva contraición de diversos metámeros, que tán provistos de faces de fibres musculares circulares y llonxitudinales, espurriendo y engrosando partes del cuerpu, déxen-y movese n'horizontal. Les cadarmes hidrostátiques tienen un rol na llocomoción de los equinodermos (roncheles o estrelles de mar, oricios), anélidos, nemátodos y otros invertebraos. L'hidroesqueletu tien semeyances colos músculos hidrostáticos.

Ye carauterísticu d'organismos celomados como los anélidos. Estos animales pueden movese contrayendo los músculos qu'arrodien la bolsa de fluyíos, creando una presión dientro de la mesma que xenera movimientu. Dellos viérbenes de tierra usen la so cadarma hidrostática pa camudar de forma mientres avancen, contrayendo y dilatando'l so cuerpu.