Silvino Argüelles
Vida
Nacimientu	Veguín, 5 de febreru de 1919
Nacionalidá	España
Muerte	Mieres, 3 de payares de 1986 (67 años)
Estudios
Llingües falaes	castellanu
Oficiu	cantante de tonada

Silvino Argüelles Menéndez (5 de febreru de 1919, Veguín – 3 de payares de 1986, Mieres) foi un cantante asturianu de tonada.

A pesar de nacer nel conceyu d'Uviéu la so vida ta xunida al de Mieres. Foi so madre Luz, La Calandria, la que-y pega la so afición pola tonada. Silvino actúa nun escenariu por primer vez a la edá de 15 años, en 1934, nel cine de Vegadotos, nel que taba actuando con una compañía de teatru. Darréu entamó la so carrera como cantante que compaxinaba cola de actor. Depués de la Guerra civil española tuvo que trabayar de mineru na zona pirinaica, onde continúa cantando y alternando la canción asturiana col flamenco, tal y como lo facíen otros cantantes asturianos. Finalmente, depués d'un grave accidente llaboral torna p'Asturies.

Nuevamente subió a los escenarios nel cine La Montera de Sama. A lo llargo de los años sesenta participó en númberosos concursos y actuaciones a lo llargo de tola xeografía asturiana.

Yera Silvino Argüelles un cantante con una fuerte personalidá sobre l'escenariu qu'interpretaba a la so manera la canción que tuviera ente manes, imprimiendo la so voz de barítonu un toque propiu a los cantares. Texedora de Bayu, Canta'l malvís (dedicada de Juanín de Mieres), A la salida del Sella, La vaca pinta, Caleya arriba cantando, Viva la xente minera … son delles de les sos canciones que mayor sonadía algamaron.

Cola agrupación musical «Asturies canta», na que s'aconceyaben los meyores cantantes asturianos del momentu, continuó recorriendo los escenarios d'Asturies y d'otres ciudaes como Barcelona, Madrid, Valladolid, … En 1980 representó a Asturies nel Festival Celta de Berlín, nel que tuvo acompañáu por Enrique García Palicio, L'Abogáu. Tamién cantó en Xinebra pa los emigrantes asturianos en Suiza.

Silvino Argüelles morrió d'un tumor cerebral el 3 de payares de 1986. Dende l'añu siguiente na llocalidá de Mieres tiene llugar la celebración del Memorial "Silvino Argüelles" onde s'aconceyen los meyores intérpretes de tonada del momentu y que dende'l añu 2003 reconoz el trabayu y les condiciones artístiques de 10 cantantes y un gaiteru acompañante de tonada. El 18 d'abril de 1999, el Conceyu de Mieres puso-y el so nome a una cai de la plaza del Requexo.

Referencies

Enllaces esternos