| Sindicatu Unitariu y Autónomu de Trabayadores de la Enseñanza d'Asturies | ||
|---|---|---|
| Ámbitu | Principáu d'Asturies | |
| Sede central | Uviéu | |
| Sitiu web | suatea.org | |
| [editar datos en Wikidata] | ||
El Sindicatu Unitariu y Autónomu de Trabayadores de la Enseñanza d'Asturies (SUATEA)[1] ye una organización sindical asturiana qu'axunta a los trabayadores del enseñu públicu non universitariu d'Asturies.
Historia
Surdió n'ochobre de 1978 como resultáu de les lluches desenvueltes nos años de la Transición pol profesoráu asturianu. La identidá estremada de SUATEA venía marcada pola so independencia de los distintos partíos políticos de la dómina y pol so funcionamientu horizontal y asambleariu.
La estructura interna de SUATEA entama a partir de les asamblees de zona o sector. Esiste un Secretariáu, escoyíu pola Asamblea, que ye l'órganu dirixente nel que se tomen les principales decisiones y una Comisión Permanente que ye la encargada d'executales.
Xunto con otres organizaciones asemeyaes, acabó empatando na Confederación de Sindicatos de Trabayadores de la Enseñanza (STEs) qu'anguaño conforma la Confederación Intersindical (CI).
Posicionamientu
Ente les principales llinies de trabayu de SUATEA ta la defensa de la escuela pública, refugando los conciertos educativos, asitiándose por un cuerpu únicu del profesoráu y un modelu educativu llaicu. Anguaño tamién caltién posiciones de denuncia y crítica frente a les diverses normes llegales que fueron apaeciendo nel sector educativu: LAU, LODE, LOGSE, LOMCE, Estatutu de Centros, ente otros testos llexislativos.
Dende l'empiezu, SUATEA manifestó una especial sensibilidá cola llingua asturiana y gallegoasturianu que remata cola creación d'una Secretaría de Llingua que trabaya tanto dientro del sindicatu, pa garantizar el so usu y normalización, como nel esterior, declarándose partidariu de la oficialidá del asturianu y gallegoasturianu y movilizándose nes distintes campañes que comparten esi oxetivu.
La Secretaría de la Muyer ye la encargada de trabayar nel campu de la igualdá de derechos ente homes y muyeres, con movilizaciones frente a les agresiones o reclamación de derechos, ellaboración de materiales didácticos, denuncia de llibros de testu con conteníos sexistes, incluyendo aspeutos rellacionaos cola denuncia de la homofobia nes sos distintes variantes. Confederalmente forma parte de la Organización de Muyeres.
Nel ámbitu sociopolíticu, SUATEA ta presente dellos movimientos sociales. Sofita'l desenvolvimientu del Movimientu Social pola Escuela Pública (MSEPA), el movimientu feminista, la solidaridá internacionalista, la llucha contra'l paru y los efeutos de la crisis económica y reconversión industrial n'Asturies, el movimientu de reivindicacíon llingüística a favor de la Oficialidá. Ún de los oxetivos de SUATEA ye xenerar conciencia de la importancia de defender la Escuela Pública y tresvasar a la escuela dalgún de los valores surdíos de los movimientos sociales.
Referencies
- ↑ Academia de la Llingua Asturiana (2007). Cartafueyos Normativos. Abreviatures, rotulaciones y propuestes d’espresión y llocución. ISBN 978-84-8168-421-6.
